जकर्‌याह 6

च्‌यार घुड़ागाड्‌यान सपनो

1मे अळी डुळा उघाड़्‌यु, ने काय देख्‌यु की दुय बयड़ान ईचमां सी चार घुड़ा-गाडी चालीन आवे; ने चे बयड़ा पीतळेन छे। 2पेहली घुड़ा-गाडी रात्‌ला घुल्‌ला, ने दुसरी घुड़ा-गाडी मां काळला घुल्‌ला,1 3तीसरी घुड़ा-गाडी मां धळला घुल्‌ला ने चोवथी घुड़ा-गाडी मां काबर्‌या-चीतर्‌या ने काठला घुल्‌ला छे।2 4तत्‌यार मे तीना काहवाळ्‌या सी जु मार साते वात करतेलु तीनाक पुछ्‌यु, “ए मारा मालीक, जे आखा काय छे?”

5काहवाळ्‌यु मार सी कह्‌यु, “जे आदळान चारु वाहळो आत्‌मा छे, जु आखी धरतीन मालीक धड़े भेळा रवे, बाकुन हंय नीकळी आय।3 6जीनी घुड़ा-गाड़ी मां काळा घुल्‌ला छे, ची अखणाव देस भीणी जाय, ने धळला घुल्‌ला बुडण भीणी जाय, ने काबर्‌या-चीतर्‌या घुल्‌ला दखणाव देस भीणी जाय। 7काठ्‌ला घुल्‌ला नीकळीन चाह्‌या की जाय्‌न धरती पर फीर्‌या करे।” अळतेन काहवाळ्‌यु कह्‌यु, “जाय्‌न धरती पर फीर्‌या करु।” तत्‌यार चे धरती पर फीरने बाजी गुया। 8तत्‌यार हयु मारे सी आयड़ीन कह्‌यु, “देख, चे जे दखणाव देस भीणी जाणे बाजी रया, चां मारी आत्‌मा काजे सेळी करलु छे।”

यहोसुन नेवाड़ु करनु

9अळतेन यहोवान जे बुल मारे धड़े पुग्‌यो। 10गुलामी मां सी माणसे, हेल्‌दे, तोबीय्‌याह ने यदायाह सी काहीस ले, ने तीनेत दाहड़े तु सपन्‌याहन पुर्‌यु योसीयाहन घर मां जाय्‌न तीना मां चे बेबीलोन सी आवीन उतर्‌या। 11तींद्‌रा हात सी सोना-चांदी ले, ने मुड़ बणाय्‌न तीनुक यहोसादाकेन पुर्‌यु यहोसु मुखी पुजारान मुणका पर मेक; 12ने तेरे सी असु कव, आखा सी ताकत वाळु यहोवा असु कवे, तीना माणुस काजे देख तीना पुर्‌यान नाव डाळखो छे, चु आपसान जागा पर उंगीन ने यहोवान मंदीर काजे बणावसे।4 13हीयुत यहोवान मंदीर काजे बणावसे ने सेक-सींगार जड़से, ने आपसा राज-गादी पर बठीन राज करसे। तेरी राजगादी धड़े एक पुजारु बी बठी रवसे, ने दुयुन ईचमां सांती ने मेळ रवसे। 14ने चे मुकुट हेलेम, तोबीय्‌याह, यदायाह, ने सपन्‌याहन पुर्‌यु हेन काजे जड़ जाय, ने चे यहोवान मंदीर मां हेर करने करीन बणीन रवे।

15“अळतेन लाम्‌बे-लाम्‌बे देसेन माणसे आवीन यहोवान मंदीर बणावणे मां मदत करसे, ने तुहुं जाण लेसु की आखा सी ताकत वाळु यहोवा मेसेक तुंद्‌रे धड़े मकली र्‌यु। कदी तुहुं मन लागाड़ीन तुंद्‌रा यहोवा भगवान हुकुमेन पाळन करु ती जी वात पुरी हवसे।”