Bhilali Bible
जकर्याह 7
झुठी उपासेन वाक-काडणु
तत्यार दारा राजान चवथा सालेन कीसलवे1 नावेन नव्वा महनान चोवथे दाहड़े यहोवान बुल जकर्याह धड़े पुग्यो।
बेतेल मां रवण्या सरेसेर ने रेगेम्मेलेक काजे हेरसी मकल्यु की यहोवा सी वीन्ती करे, ने आखा सी ताकत वाळा यहोवान मंदीरेन पुजारा काजे ने भगवानेन अघी सी आवणे वाळी वात बताड़न्या सी असो पुछे, “काय हामुक उपास करीन रड़नु चाहजे, जसा की कतरा साल सी हामु पांचवा महना मां बी करता आय रया?”2
तत्यार आखा सी ताकत वाळा यहोवान ज बुल मारे धड़े पुग्यो। आखा दीसरा माणसे सी ने पुजारा काजे कहें, “जत्यार तुहुं हीनु सत्तर सालेन ईचमां पांचवु ने सातवे महना मां उपास ने दुखी हया करतेला, ती काय तुहुं छाचलीन मारे वाटेत करतेला?3 जत्यार तुहुं खावु ने पीयु, ती काय तुहुं आपसात वाटे नी खावु, ने आपसात वाटे नी पीत्ला काय?”
कांय ज च बुल नी हय, जु यहोवा पेहलुत सी भगवानेन अघी सी आवणे वाळी वात बताड़न्यान साहरे तीनी टेमे आयड़ीन कवतु रयु, जत्यार यरुसलेम तेरे चारे-मेर सहर भेळ आराम सी वसलो हतलो, ने दखणाव देस ने नेचला देसे बी वसला हतला?
हुकुम नी मान्ने सी गुलामी मां जाणु
अळतेन यहोवान ज बुल जकर्या धड़े पुग्यो: “आखा सी ताकत वाळु यहोवा असु कह्यु, छाचाय सी नीयाव चुकाड़नु, ने एक दीसरा साते दया ने परम सी काम करजु,4 नीते रांडायली पर आंधारो करनु, ने नी पुरायला पर, नी दीसरा देस पर, ने नी गरीब पर; ने नी आपणा-आपणा मन मां एक दीसरान नुकसाण करनेन वीच्यार करनु।”
बाकुन चे नी धीयान लागाड़्या, ने घमट कर्या, ने आपसा कान्टा बुज लेदा की सामळी नी सके।5 बाकुन चे आपणा मन काजे हेरसी दगड़ान तसो बणाय लेदा, की चे तीना कायदा ने तीनु बुले काजे नी सामळी सके, काहाकी आखा सी ताकत वाळु यहोवा आपसा जीव-आत्मा सी पेहलुत सी भगवानेन अघी सी आवणे वाळी वात बताड़न्या सी खबर कय मकल्यु। हेरे वजे सी आखा सी ताकत वाळा यहोवा भीणी सी तीनु पर मटु रीस भड़क उठ्यु। आखा सी ताकत वाळा यहोवान जत बुल छे: “जसु मारे आयड़ने सी चे नी सामळ्या, तसोत चे आयड़से ती मे बी नी सामळो; बाकुन मे तीनुक आखा राज्येन ईचमां जीनुक चे नी जाणे, आंधी सी तीनुक रावण्या-तीवण्या कर दीस, ने तींद्रो देस बी, तींद्रे पछळ असु उजाड़ रवसे की, हेरे मां बी आवणु-जाणु नी हवसे; हीनी रीत सी चे वारु देस काजे उजाड़ देदा।”6
Source notes (6)
- Footnote कीसलवे नवम्बर ने दीस्मबरेन महनो
- Cross-reference 2 राजा 25:8
- Cross-reference 2 राजा 25:25; यसाया 58:4
- Cross-reference यसाया 1:17
- Cross-reference यसाया 48:4
- Cross-reference वेवस्थावीवरन 4:27
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.