Bhilali Bible
जकर्याह 5
उडतेली चिट्ठीन तसो सपनो
जत्यार मे पछु आयु ती डुळा उघाड़ीन असु देख्यु की, एक लिखली चिट्ठी हवा मां उडणे बाजी रय। काहवाळ्यु मार सी पुछ्यु, “तुसेक काय देखाय पड़े?” मे कह्यु, “मेसेक एक लिखली चिट्ठी उडतेली देखाव पड़े, ने तेरी लंबाय वीस हात ने चवड़ाय दस हात छे।”1
पछेन चु मार सी कह्यु, “जु चु सराप छे, जु देस पर पड़ने वाळु छे; चिट्ठीन एक भीणी लिखलो छे, की हर कुई चुरी करने वाळा काजे देस सी नीकाळ देसे; दीसरे भीणी लिखलो छे की कुय बी सगुन खाय्न बुले, तीनाक बी नीकाळ देसे। आखा सी ताकत वाळा यहोवान जीत वात छे, मे तीनाक असु चालाड़ीस की चु चुट्टान घर मां ने मारा नाव सी झुटी सगुन खाणे वाळान घर मां भराय्न रवसे, ने तीनाक लाकड़ा ने दगड़ा भेळा खत्तम कर देसे।”
चारली मां बायरीन सपनो
तत्यार जु काहवाळ्यु मार सी वात करतेलु, चु मार अगळ आय्न कह्यु, “डुळा उघाड़ीन देख की ची काहनी चीज नीकळती जाय रय?”
मे पुछ्यु, “च काय छे?” हयु कह्यु,
“ची चीज नीकळीन जाय रय, ची एक चारलीन छे।” ची आखा देसेन माणसेन पापे काजे देखाड़े।
अळतेन मे काय देख्यु की चारलीन मापेन ढाकणो उगाड़ी गुयो, च काचेन बन्डलो हतलो, मे देख्यु की हेरे मांह्ये एक बायर बठली हतली।
काहवाळ्यु कह्यु, “हेरो मतलब भुंडो छे।” ने चु तीनी बायर काजे चारलीन मांह्ये दड़पी देदु, ने तीना काचेन ढाकणा सी चारलीन मुंहडो बंद कर देदु। तत्यार मे डुळा उघाड़्यु, ती काय देख्यु की, दुय बायरा जाणे बाजी रया तींद्रे पाखड़ा वाहळा मां फेलायलु छे, ने तींद्रा पाखड़ा बगल्या तसा छे, ने चे चारली काजे सरग ने धरतीन ईचमां उडाड़से।
तत्यार मे तीना काहवाळ्या सी जे मारे साते वात करतेलु, पुछ्यु, “चे चारली काजे कां लीन जाय रय?”
चु कह्यु, “सीनार नावेन देस2 मां ली जाय रय की चां एक घर बणावे; ने जत्यार चु तीयार हंय जाय, तत्यार चारली काजे आपणी पुजा-पाट वाटे चां मेकी सके।”
Source notes (2)
- Cross-reference यहेजकेल 2:9-10; उजेंता बुले 10:9-11
- Footnote सीनार नावेन देस बेबीलोन देस
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.