जकर्‌याह 3

डाहला पुजारान बारामां भगवानेन अघी सी आवणे वाळी वात बताड़न्‌यान सपनो

1अळतेन चु यहोसु मुख्‌या पुजारा काजे यहोवान काहवाळ्‌या अगळ उबु हय्‌न मेसे देखाड़्‌यु, ने भुतड़ु हेरी जेवड़्‌ये आंग्‌ये ने तेरी वीरुद करने करीन उबु हंय रवलु।1 2तत्‌यार यहोवा भुतड़ा काजे कह्‌यु, “ए भुतड़ा, यहोवा तुसे काजे लड़े! यहोवा जु यरुसलेम काजे अपनाय लेय, तेरेमां तुहुंक गुनाळा ठेहरावे! काय जु माणुस आक्‌ठा सी नीकळली धपला लाकड़ान तसी नी हंय?”2

3तीनी टेमे यहोसु ते काहवाळ्‌या अगळ मुयळ्‌ळा पुथल्‌या पेहरलु उबु हंय रवलु। 4तत्‌यार काहवाळ्‌यु तीनुक जु अगळ उबा हंय रवला कह्‌यु, “हेरा जे मुयेळ्‌ळा पुथल्‌या आखा नीकाळु।” अळतेन तीनाक कह्‌यु, “देख, मे तारा भुंडात काम छेटु कर्‌यु, ने मे तुसेक वारु घाटाळा पुथल्‌या पेहराय्‌स।”3

5तत्‌यार मे कह्‌यु, “हेरा मुणका पर एक चुखली पागड़ी मेकु।” अळतेन चे तेरा मुणका पर पुजारा वाटे चुखली पागड़ी मेक्‌यु, ने तीनाक पुथल्‌या पेहरावे; तीनी टेमे यहोवा काहवाळ्‌या धड़े उबु हंय रवलु।

6तत्‌यार यहोवान काहवाळ्‌यु यहोसु काजे चेताड़ीन असु कह्‌यु, 7“आखा सी ताकत वाळु यहोवा तार सी असु कहें, कदी तु मारा वाटे पर चाले, ने जो काय मे तुसेक आप देदलु छे तेरी राखवाळी करे, ती तु मारा घरेन नीयाव करन्‌या ने मारा आंगणान राखवाळ्‌यु हसे; ने मे तुसे काजे तींद्‌रे ईचमां जाणे-आवणे दीस जे धड़े उबा हंय रया।4 8ए यहोसु मुखी पुजारा, ए तेरा भाय-बेटा जे तारे अगळ उबा हंय रया, चे बी सामळनु चाहजे, काहाकी चे नेवाड़ला माणसे सी; काहाकी देखु मे मारा पावर्‌यान डाळखा काजे उजेंतु करीस। 9तीना दगड़ा काजे देख जीनाक मे यहोसु अगळ मेकलु छे, तीना एकुत दगड़ा पर सात डुळा बणला छे, ने आखा सी ताकत वाळा यहोवान ज्‌य बुल छे, देख, मे तीना दगड़ा पर एक आक्‌सर लिखाड़ीस, ने हीना देसेन पाप काजे एकुत दाहड़ा मां छेटे कर दीस।5 10तीने दाहड़े तुहुं आपणा-आपणा आड़े-धड़े वाळा काजे अंगुरेन वाड़ीन ने अंजीरेन झाड़का तळे आवणे वाटे बुलावसु, आखा सी ताकत वाळा यहोवान जत बुल छे।”6