जकर्‌याह 2

मापणे वाळा दुयड़ान सपनो

1अळतेन मे डुळा उघाड़्‌यु ती काय देखो, की हात मां नापणेन दुयड़ो लीन एक अदमी छे।1 2तत्‌यार मे तेरेसी पुछ्‌यु, “तु कां जाणे हींड र्‌यु?” चु मारे सी कह्‌यु,

“यरुसलेम काजे नापणे जाणे हींडी रयु की देखु तेरी चवड़ाय कतरी छे, ने लम्‌बाई कतरी छे।”

3तत्‌यार मे काय देख्‌यु की, जु सरग वाळु काहवाळ्‌यु मारे सी वात करतेलु चु जाती रयु, ने दीसरु सरग वाळु काहवाळ्‌यु तीना काजे भेळु हवणे करीन आयु, 4हीना काजे कह्‌यु, “दवड़ीन हीना माणुस काजे कंय, ‘यरुसलेम माणसे ने घर पाळन्‌या जानवर्‌या बी बेसका मारे दीवालेन बाहर-बाहर बी बठसे। 5यहोवा भगवानेन जो बुल छे, की मे तेरे च्‌यारु मेर आक्‌ठान तसी मट्‌ली दीवाल रय्‌स, ने तेरे ईचमां वीजाळो हय्‌न देखाय्‌स।’”

बांदाय मां गुयला माणसेन घर बुलावणु

6यहोवान जी वात छे, “देखु, सामळु, अखणाव वाळा देस मां सी ढासी जावु, काहाकी मे तुहुं काजे आदळान चारु हवान तसु रावण्‌या-तीवण्‌या कर देदु।” 7ए सीयोन तु जी बाबुलेन पुरे साते रवे, खुद काजे बचाड़ ले। 8काहाकी आखा सी ताकत वाळा यहोवा असु कह्‌वे, तीना सेकेन उजेंतु हवणेन पछे हयु मेसेक तीनु राज्‌य-राज्‌येन माणसे धड़े मकेल्‌लु छे,

जी तुहुंक लुटतेली, काहाकी जे तुहुं काजे छीमे, चु मारा डुळान पापण्‌या काजे छीमे। 9देखु, मे मारु हात तीनु पर उबु करीस, तत्‌यार चे तींद्‌रे सी लुटाय जासे,

जे तेरु गुलाम हवला। तत्‌यार तुहुं जाण लेसु की आखा सी ताकत वाळु यहोवा मेसेक मकेल्‌लु छे।

10ए सीय्‌योन, उंचा बुले सी गाव ने खुसी कर, काहाकी देख, मे आवीन तारे ईचमां रवीस, यहोवान जेत बुले छे।

11तीनी टेमे बेसका राज्‌ये यहोवा सी जुड़ाय जासे, ने मारा माणसे हंय जासे; ने मे तारे ईचमां रवीस, ने तु जाणसी की आखा सी ताकत वाळु यहोवा मेसेक तारे धड़े मकली देदु।2 12ने यहोवा यहुदा काजे चुखला देस मां मारु भाग कर लेसे, ने यरुसलेम काजे अळी नेवाड़से।

13“ए आखा जीवे, यहोवा अगळ हुगा रहु; काहाकी चु जागीन तारा चुखला रह्‌णेन जागा सी नीकळेलु छे।”3