जकर्‌याह 13

1“तीने टेमे काहनुक दावुदेन घरन्‌या ने यरुसलेमेन रहण्‌या वाटे पाप ने पाप हात-पाय धुवणे वाटे एक उहतेला झीर नीकळसे।”1 2“आखा सी ताकत वाळा यहोवान ज बुल छे, की तीनी टेमे मे ईना देस मां सी मुरतीन नाव मीटाय दीस, ने चे अळी हेर नी रवे; ने मे भगवानेन अघी सी आवणे वाळी वात बताड़न्‌या ने भुतड़ान आत्‌मा काजे ईना देस मां सी नीकाळ दीस। 3ने कदी कुय अळी भगवानेन अघी सी आवणे वाळी वात बताड़े, ती तेरा आयस-बास सी चु पयदा हयु, तीनाक कवसे, ‘तु नी जीवे, काहाकी तु यहोवान नाव सी झुट मेकी र्‌यु;’ हेरसी जत्‌यार चु भगवानेन अघी सी आवणे वाळी वात बताड़े, तत्‌यार तेरा आयस-बास सी चु पयदा हयु तीनाक मार नाखसे। 4तीनी टेमे एक-एक भगवानेन अघी सी आवणे वाळी वात बताड़न्‌यान वात करता जाय्‌न, आपसा-आपसा सपना सी लाजवाय जासे, ने धुकु देणे वाटे कामळ्‌यान पुथल्‌या नी पेहरसे,2 5बाकुन चु कवसे, मे भगवानेन अघी सी आवणे वाळी वात बताड़न्‌यु नी हय, मे किरसाण छे; काहाकी नान्‌लु हतलु ती सी खेतेन काम करतु आय रयु। 6तत्‌यार हेरसी ज्‌य पुछसे, ‘तारी छाती मां जे घाव कसा हंया,’ ती चु कवसे, ‘जे चेत घाव छे, जे मारा परमेन घर मां मेसेक लागी ज्‌या।’”3

मालीकेन गुवाळ्‌या काजे मार नाखणेन हुकुम

7आखा सी ताकत वाळा यहोवान जे बुल छे, “ए तलवार, मारा ठेरावला गुवाळ्‌यान वीरुद मां मतलब जु माणुस मारी समाजेन छे, तेर भीणी चाल, तु तीना गुवाळ्‌या काजे काट, तत्‌यार गाडरा रावण्‌या-तीवण्‌या हंय जासे; ने मे गाडरान पीला काजे बी मारा हात सी डंड आपीस।”4 8यहोवान जीत वात छे, हीना देसेन आखा रवणे वाळा काजे दुय हीस्‌सा मां माराय जासे, ने बचलु हीस्‌सु तेरेमां बणीन रवसे। 9तीना हीस्‌सा काजे मे आक्‌ठा मां नाखीन असु वारु करीस, जसु सीक्‌का चुखु करे, ने असो ज पारखीस जसु सोनो पारखी जाय। चे मारे सी दुवा कर्‌या करसे, ने मे तींद्‌री सामळी लीस। मे तींद्‌रे बारामां कय्‌स, जे मारा माणसे छे, ने चे मारा बारामां कवसे, “यहोवा हामरु भगवान छे।”5