Bhilali Bible
जकर्याह 12
आवणे वाळा दाहड़ा मां यरुसलेमेन छुटकारु
ईस्रायेली माणसेन बारामां यहोवा बेसकु चेतावे, ने सरग मंडळीक तम्बुन तसु ताणन्यु, कळीन नेवु नाखण्यु, ने माणसेन जीव-आत्मा घड़न्यु छे, चु असु कह्वे।1 सामळु, जसु दारुड़्यु दारुन हाय करे, तसात आड़्ये-धड़्येन देसेन माणसे यरुसलेम सहरेक घेर लेसे। ने यरुसलेम भेळे यहुदीया घराणान दीसरा सहरेक बी घेरवी लेसे। तीनी टेमे धरतीन आखा राज्येन माणसे यरुसलेम सहरेन वीरुद हंय जासे, तत्यार मे यरुसलेम सहर काजे भारलु दगड़ु बणाय दीस, की जे तीना दगड़ाक हाकलसे, तीनुक चु बेसकु घायल कर देसे। यहोवान ज्य बुल छे, तीनी टेमे मे एकेक घुल्लाक घायल कर दीस, ने तेरे पर बसण्याक बी घाबराय जासे, मे आड़-जात्यान घुल्लाक आंदळा कर दीस, बाकुन युहुदान घराणान राखवाळी करीस। तत्यार यहुदान घराणान मुख्या आपसाक कवसे, हामु यरुसलेम सहरेन रवण्यान आखाम सी ताकत वाळा यहोवान मदत सी हामु ताकतवाळा बणसुन।
तीनी टेमे मे यहुदा घराणान मुख्या काजे लाकड़ान ढीग मां सीगड़ीन तसु, ने पुळा मां धपतेली टेमेन तसु बणाय दीस मतलब चे जेवड़्ये-डाखर्ये आंग्ये वाळा माणसेक खत्तम कर देसे; ने यरुसलेम सहर जां वसलो छे, चांत वसलो रवसे।
मे यहोवा पेहले यहुदान घराणाक बचाड़ीस, तेरेसी दावुदेन घराणो ने यरुसलेम मां रवण्या आपसा ठाट-बाटेन साहरे यहुदान घराणाक हेटा समजे। तीनी टेमे मे यहोवा यरुसलेम सहरेम रवण्याक ढाल सी बचाड़ लीस, ने तीनी टेमे तींद्रे माय्न लुल्ला माणसे, दावुदेन तसा ताकतवाळा बणसे; ने दावुदेन घराणो भगवानेन तसो हवसे, हव, यहोवा सरगेवाळा चाकर्यान तसो तींद्री अगवाय करन्यो बणसे। ने तीनी टेमे मे तीनु आखा राजेन माणसे काजे मारनेन युजना बणाय्स, जे यरुसलेम सहर पर लड़ाय करीस।
“मे दावुदेन घराणा पर ने यरुसलेम सहर मां रवण्या पर दया करन्यु, ने दुवा सीकाड़न्यु जीव-आत्मा उतारीस, तत्यार चे मार भीणी वळसे मतलब तेरे चे भालु घुदल्ला तेरेत भीणी भाळसे, ने तेरे वाटे तसात रड़से, जसा आपसा एक-खुळ्या पुर्या वाटे रड़े, हव, असा कलपी-कलपीन रड़से जसा पेहेल-खुळ्या पुर्या वाटे रड़े।”2 तीनी टेमे यरुसलेम सहर मां माणसे कलपी-कलपीन रड़से, जसा हदोद-रीम्मोन परगाणान मगीदो सहर मां रड़ला। आखा देसेन घराणा कल्पी-कल्पीन रड़से; हंय, दावुदेन घराणो अलग रड़से, ने तींद्रा बायरा अलग रड़से, नातानेन घराणो अलग रड़से, ने तींद्रा बायरा अलग रड़से, लेवी कुळीन घराणो अलग रड़से, ने तींद्रा बायरा अलग रड़से; सीमीयान घराणो अलग रड़से ने तींद्रा बायरा अलग रड़से; ने बचला दीसरा घराणा ने तींद्रा बायरा बी कल्पी-कल्पीन रड़से; हंय, अदमी अलग रड़से ने बायरा अलग रड़से।
Source notes (2)
- Cross-reference यसाया 42:5
- Cross-reference भजन सहीता 22:16; युहन्ना 19:34,37; उजेंता बुले 1:7; युहन्ना
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.