Bhilali Bible
जकर्याह 11
वेला पाड़न्याक नास हवणु
ए लबानोन, आक्ठा काजे खरली वाट बताड़,
की चो आक्ठो आय्न तारा देवदार नावेन झाड़का काजे खत्तम कर देसे।
ए सनोवर नावेन झाड़का रड़ु कलपु,
काहाकी देवदार नावेन झाड़को हीट पड़्यो,
ने मटला-मटला झाड़का खत्तम हंय गुया।
ए बासान ईलाकान बांज नावेन झाड़का, रड़ु कलपु!
काहाकी बेसका झाजला बयड़ान झाड़का काजे काट नाख्या।
गुवाळ्या बेसका छाती ठुकीन आयड़ी रया,
काहाकी तींद्रो सींगार खत्तम हंय गुयलो छे!
जुवान्या नाहारेन डकारनु सामळाय देय,
काहाकी यरदन नदीन धड़े वाळा बेसका झाजला झाड़का खत्तम कर देद्ला छे।
दुय गुवाळ्या
मारु यहोवा भगवान जु हुकुम आप्यु, मरने वाळा गाडरान गुवाळ्यु बण जां। तीनुक मुल लेणे वाळा, तीनुक मारीन वेचे तेबी गुनावाळा नी ठेहरे, ने तींद्रा वेचणे वाळा कवे, यहोवा वारु छे, हामु पयस्या वाळा हंय गुया; ने तींद्रा गुवाळ्या तींद्रे पर काय दया नी करे।1
यहोवान जत बुल छे, मे ईना देस मां रवणे वाळा पर अळी दया नी करो। देखु, मे माणसे काजे एक दीसरान हात मां, ने तींद्रा राजान हात मां धराड़ दीस; ने चे ईना देस काजे नास करसे, ने मे तेरा रवणेवाळा काजे तींद्रा हक मां सी नी छुड़ावो।
हेरेसी मे मरने वाळा गाडरा-बुकड़ा काजे, ने खास करीन तींद्रे मां सी जे नीचळा हतला, तीनुक चारने बाजी गुयु। ने मे दुय डेंगा लेदु; एक डेंगान नाव गीण-दया, ने दीसरा डेंगान नाव एक्कु पाड़्यु, हीनुक लीन मे गाडरा काजे चारने बाजी गुयु। मार पुठे गुवाळी करन्या, तीन गुवाळ्या मार पर रीस करतेला, बाकुन मे गम खातु रयु, ने तीनुक एकुत मोहना मां खत्तम कर देदु। अळी मे तीनुक कह्यु, “हंय सी मे तुहुंक नी चारो, तुंद्रे माय्न जे मरने हींडे चे मरु परा, ने जे खत्तम हवणे, हींडे चे खत्तम हवु परा, ने जे बचला रवे, चे एक-दीसरान मास खावु।” अळतेन मे दया नावेन डेंगु भांजीन आखा राजेन माणसे साते जु वायदु करलु, चु वायदु तुड़ देदु। असु करीन तीनेत दाहड़े वायदु टुट गुयु, ने चे गाडराक वेचण्या समजी गुया की, जी यहोवान वात छे। तत्यार मे तीनुक कह्यु, “कदी तुहुं काजे वारु लागे ती मारी दाहड़की देवु, नीते रहणी देवु।” तत्यार चे मारी दाहड़की मां चांदीन तीस सीक्का भरीन आप देदा।2
तत्यार यहोवा मेसेक कह्यु, “ईनुक कुमारटा अगळ नाख देवु।” चे मेसेक बेसकी वारु दाहड़की आप्या, तत्यार मे चे चांदीन तीस सीक्का ली जाय्न, यहोवान घरेन खजाना3 मां नाख देदु।4 तत्यार मे युहुदीया जीलान ने ईस्रायेल माणसे ईचमां रीसतो-नातो तुड़ने वाटे मारु एकता नावेन दीसरु डेंगु बी भांज देदु।
तत्यार यहोवा मेसेक कह्यु, “हय ते तु उजग्या गुवाळ्या धड़े सी हत्यार मांगी ले।5 काहाकी मे ईना देस मां एक उजग्या गुवाळ्या काजे राखीस; चु खुवायला गाडरान बी फीकुर नी करे, ने रावण्या-तीवण्याक बी भेळा नी करे, ने घायेल काजे बी वारु नी करे, ने भुकला गाडरा अगळ बी चारु नी नाखे; बाकुन मातीलीस रवे, तेरो सीकार खासे ने तींद्रा खुर्या काजे बी फाड़ देसे।” बेसकी दुखेन वात छे, तीना आळस्या गुवाळ्या पर, जु आपसा गाडरा-बुकड़ाक छुड़ीन जात रवे! तेरे हाते ने जेवड़्ये डुळे तलवार लागसे, तत्यार तेरु हात सुक जासे, ने तेरु जेवड़्यु डुळु फुट जासे।6
Source notes (6)
- Cross-reference होसे 12:8
- Cross-reference मत्ती 26:15
- Footnote खजाना हीना सब्देन तीन मतलब हवे, कुमहार, लुहार, खजानो हीनु सब्द मां सी हामु खजाना सब्द काजे लिख्या।
- Cross-reference मत्ती 27:9
- Cross-reference यहेजकेल 34:2
- Cross-reference युहन्ना 10:12
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.