जकर्‌याह 10

छुटकारान वायदु

1वरसातेन आकरी टेम मां यहोवा सी पाणी मांगु, यहोवा सी जु ईजळी चमकाड़े, ने चु तीनुक पाणी देसे, ने हर एक खेत मां फसल उपजाड़से।1 2काहाकी फालतु वात कह्‌वे, ने हात देखणे वाळा झुटो सपनो देखे, ने झुटा सपना सामळावे, ने फालतु सांती आपे, हेरे वजे सी माणसे गाडरान तसा भटकी गुया; ने गुवाळ्‌या नी हवणेन वजे सी दुख मां पड़ र‌या।2

3मारी रीस गुवाळ्‌या पर आय पड़ी, ने जे मारा माणसे पर राज करे, तीनुक मे डंड आपीस; काहाकी आखा सी ताकत वाळु यहोवा आपसा टुळा मतलब यहुदान घरन्‌यान बारामां देखणे करीन आवसे, ने लड़ाय मां तीनुक आपसान मातालीस घुल्‌लान तसु बणावीस। 4यहुदा मां सी खुणान दगड़ु, तेरेत मां सी खुटु, तेरेत मां सी लड़ाय्‌न धंदली, तेरेत मां सी आखा मुख्‌या उजेंता हवसे। 5चे असा ताकुत वाळान तसा रवसे, जे लड़ाय मां आपणा दुस्‌मन काजे सयड़केन कीचड़ेन तसा कुचळता हय; चे लड़ाय करसे, काहाकी यहोवा तींद्‌रे पुठ्‌ये रवसे, तेरेमां चे हीम्‌मत सी लड़ायसे, ने घुल्‌ला पर बठण्‌यान आस टुट जासे।

6मे यहुदान घराणा काजे ताकतवाळा करीस,

ने युसुफेन घरन्‌या काजे वाचाड़ीस,

मेसेक तींद्‌रे पर दया आवी,

हेरे वजे सी मे तीनुक लावीन, तीनात देस मां आपसा,

ने चे असा हवसे, मे तीनुक मन सी नी उतार्‌यु;

मे तींद्‌रु भगवान यहोवा छे, हेरेसी तींद्‌री सामळी लीस।

7एप्‌रेम वाळा माणसे ताकतवाळान तसा हवसे,

ने हींद्‌रो मन असो खुस हवसे, जसो अंगुरेन रस सी हवे,

ज देखीन तींद्‌रा पुर्‌या खुस हवसे,

ने हींद्‌रो मन यहोवान वजे सी खुस हवसे।

8“मे सीड़ी वाजाड़ीन तीनुक भेळा करीस,

काहाकी मे तीनुक छुड़ावणे वाळु छे,

ने चे असा वदसे जसा पेहेल वदला हतला।

9कदी मे तीनुक राज्‌ये-राज्‌येन माणसे मां आवरी दीस,

तेबी चे लाम्‌बे-लाम्‌बे देस मां मेसेक हेर करसे,

ने आपसा पुर्‌या भेळा जीवतेला पछा आवसे।3

10मे तीनुक मीस्‌र देस मां सी पछु लावीस,

ने अस्‌सुर सी भेळा करीस,

ने गीलाद ने लबानोनेन देस मां लाय्‌न,

अतरो बड़ावीस की चां चे समाय नी सके।

11चु तीना दुख-देण्‌या दर्‌या मां सी हय्‌न,

तेरी झलक दड़पतु जासे,

ने नीळ नदीन आखो उंडलो पाणी सुकाय जासे,

अस्‌सुरेन मटाय टुट जासे,

ने मीस्‌र देसेन हक हापकी लेसे।

12मे तीनुक यहोवान साहरे ताकतवाळा बणावीस,

ने चे हेरे नाव सी चालसे-फीरसे,”

यहोवान जेत बुल छे।