जकर्‌याह 9

आड़े-धड़े वाळा राज्‌येन नीयाव

1हद्‌राक देसेन बारामां यहोवान कवली भारी वात जे दमीस्‌क पर बी पड़से। काहाकी माणसेन नींगा,

ने ईस्‌रायली माणसेन आखी नींगा यहोवान भीणी लागली छे; 2हमात भीणी जो दमीस्‌क धड़े छे, ने सोर, ने सेदा भीणी, जे ते बेसका अक्‌कल वाळा छे। 3सोर आपसा वाटे एक कीलु बणायु, ने धुळा साय चांदी, ने सयड़केन कीचड़ेन तसो चुखलो सोनो भेळो करीन मेकलु छे। 4देखु, भगवान सुर काजे दीसरान हक मां कर देसे, ने तेरी घमट काजे तुड़ीन दर्‌या मां नाख देसे; ने चो सहर आक्‌ठा सी नास हंय जासे।

5ज देखीन अस्‌कलोन बीहसे; गाजा काजे दुखी हवसे, ने एक्‌रोन बी बीहसे, काहाकी तेरी आसा टुट जासे; ने गाजा सहर मां अळी राजु नी रवसे, ने अस्‌कलोन पछो नी वसे। 6अस्‌दोद मां भेसकायला माणसे वस्‌से; हीनी रीते मे पलीस्‌तीन घमट काजे तुड़ दीस। 7मे तेरा मुंहडा मां सी लुही भेळता सीकार ने भुंडी चीजे नीकाळ दीस, ने तींद्‌रे मां सी जे बची रवसे, चु आपणा भगवानेन माणुस रवसे, ने यहुदान घराणान अवल्‌यातेन तसा रवसे; ने एक्‌रोनेन माणसे यबुस्‌यान तसा बणसे।1 8आपणा घरेन आड़े-धड़े डेरु नाखीस, ने कुय बी एला-पाड़ने वाळा अळी तींद्‌रे धड़े मायन नी जासे, काहाकी मे जी वात हंय बी देखो।

सीय्‌योनेन आवणे वाळु राजु

9ए सीय्‌योन बेसकु खुस हव!

ए यरुसलेम, जय जयकार कर!

काहाकी तारु राजु तार धड़े आवसे;

चु नीयाव ने छुटकारु हात करलु छे,

चु भुळु छे,

ने गदड़ा ने गदड़ीन पीला पर बठीन आवसे।2

10मे एप्‌रेम घुड़ागाड्‌या,

ने यरुसलेमेन घुल्‌ला खत्‌तम करीस;

ने लड़ाय ने धंदली भांज देसे,

ने चु राज्‌य-राज्‌य मां सांतीन वात कवसे;

चु दर्‌या सी दर्‌या लक,

ने फरात नदी सी धरतीन लाम्‌बे-लाम्‌बे,

ईलाका लग राज करसे।3

भगवानेन माणसेन, फीर सी वसणु

11मालीक कवे,

काहाकी तारु वायदु करला

लुहीन वजे सी,

मे तारा बुजायला काजे पाणी पाखुर,

गड्‌डा मां सी बचाड़ लेदलु छे।4

12ए आस मेकला बुजायला!

कीला भीणी फीरु;

मे आजुत देखाड़ो की,

मे तुहुं काजे बदला मां दुय गुणा सुक आपीस।

13जत्‌यार मे यहुदा काजे मारे वाटे वाळीस,

ने एप्‌रेम काजे बीलखा सी भर दीस।

ने सीयोन तारा पुर्‌या काजे ए युनान,

तारा पुर्‌यान वीरुद उबा करीस,

ने तुसेक ताकत वाळी तलवारेन तसु बणाय दीस।

14तत्‌यार यहोवा तींद्‌रे पर देखाय देसे,

ने तेरा बीलखा ईजळीन तसा छुटसे;

ने भगवान यहोवा फेफ्‌या वाजाड़ीन,

दखणाव देसेन जसी आंधीन तसु चालसे।

15आखा सी ताकत वाळु यहोवा,

ढाळ सी तीनुक बचाड़से,

ने चे आपसान वेरी काजे नास करसे,

ने तींद्‌रा गुफणेन दगड़ा पर पाय मेकसे;

ने चे पीन असा आयड़से, जसा माणसे अंगुरेन रस पीन आयड़े;

ने चे कटवरा तसा नीते वेदीन खुणान तसा भराय जासे।

16तीनी टेमे तींद्‌रु भगवान यहोवा,

तीनुक आपसा माणसेन गाडरा-बुकड़ा जाणीन तींद्‌रु छुटकारु करसे;

ने चे मंहगला मुड़ेन तसी ठेरसे,

तेरी जागा सी बेसका उचे चमकते रवसे।5

17तेरो काय वारु ने काय सींगार तारी रवसे।

तेरा जुवान माणसे खाणो खाय्‌न, ने कुवारली नवला अंगुरेन रस पीन मातीलीस हंय जासे।