Bhilali Bible
जकर्याह 14
यरुसलेम ने राज्य
सामळु, यहोवान एक असु दाहड़ु आवणे वाळु छे, चां तुंद्रो धन लुटीन तारे ईचमां वाट लेसे। काहाकी मे आखा राज्येन माणसे काजे यरुसलेम सी लड़ाय करने करीन भेळा करीस, ने चो सहर ली लेसे, ने घरे लुटाय जासे, ने बायरा काजे बीगाड़ देसे; सहरेन आदा माणसे गुलामी मां जासे, बाकुन बचला माणसे सहरेत मां रवसे।1 तत्यार यहोवा नीकळीन तीनु राज्येन माणसे सी असु लड़ाय करसे जसु चु लड़ायन दाहड़ा मां लड़ायु करतेलु। तीने दाहड़े चु जेतुनेन बयड़ा पर पाय मेके, जु उगवणी भीणी यरुसलेम अगळ छे; तत्यार जेतुनेन बयड़ा उगण सी लीन बुडण लग ईचमां सी फाटीन बेसकु मटु खाड्डु हंय जासे; तत्यार आधा बयड़ा धुराव भीणी ने आधु दखणाव भीणी हंय जासे।2 तत्यार तुहुं मारा बणावला तीना खड्डा मां हय्न ढासी जासु, काहाकी चु खड्डा आसेल लग जाती रवसे, बाकुन तुहुं असा ढास्सु जसा धरती हालनेन धाके ढासला जु यहुदान राजु उजीय्याहन दाहड़ा मां हवलो। तत्यार मारु भगवान यहोवा आवसे, ने आखा चुखला माणसे तेरे साते रवसे।3
तीने दाहड़े नीते सेळ्ळो लागे, ने नी गरमी पड़े, ने नी उस्टो पड़े। ने लगातार एकुत दाहड़ु हवसे, जु यहोवा अतरुत जाणे, नीते वीजाळो हवसे, ने नी रात हवसे, बाकुन सांती वेळाय वीजाळो रवसे।4
तीने दाहड़े यरुसलेम सी उहतेला पाणी फुटीन नीकळसे, तेरी एक डाळ उगण दर्या ने दीसरी बुडण दर्या भीणी उहवसे, ने तपेन दाहड़ा मां ने सेळ्ळान दाहड़ा मां बी बराबर उह्तो रवसे।5 तत्यार यहोवा आखी धरतीन राजु हवसे; ने तीने दाहड़े एकुत यहोवा भगवान ने तेरो नाव बी एकुत मानायसे।
गेबा सहर सी लीन, यरुसलेमेन दखणाव भीणी रीम्मोन लग, आखी जागा बराबर हंय जासे, बाकुन चु उंचा हय्न बीन्यामीन फाटक सी लागाड़ीन पेहल फाटक जागा लग, खुणा वाळा काकड़ लग, ने हननेल मांडवा सी लीन राजान दाखरस कुंड लग आपसा जागा मां बठसे। माणसे तीना मां बठसे, काहाकी अळी खत्तम करने गरा नी रवे; ने यरुसलेम सहर बीना बीहे वसी रवसे।6
जतरा राज्येन माणसे यरुसलेम सी लड़ाय करलु छे, हीनु आखा काजे यहोवा असी मार सी मारसे, की उबा-उबा तींद्रो सीकार सड़ जासे, ने तींद्रा डुळा पापण्या मां सड़ जासे, ने तींद्री जीप, तींद्रा मुंहडा मां सड़ जासे।
तीनी टेमे यहोवा भीणी सी हींद्रे मां बेसका घाबराय माय्न जासे, ने चे एक दीसरान हात काजे धरसे, ने एक दीसरा आपणा-आपणा हात काजे धरसे। यहुदान यरुसलेम काजे बचाड़ने वाटे लड़ाय करसे, ने सोनो, चांदी, ने पुथल्या ने आड़े-धड़े आखा राज्य-राज्येन धन तीना मां भेळो करसे।
ने घुल्ला, गदड़ा, उटड़ा, गदड़ा ने जतरा बी जीव-जानवर्या तींद्री पड़ावा मां हवसे चे बी असीत मट्ली मांदवाड़ सी माराय जासे।
तत्यार जतरा माणसे यरुसलेम पर लड़ाय करने वाळा आखा राज्येन माणसे मां सी बचला रवसे, चे एक साल राजा काजे मतलब आखा सी ताकत वाळा यहोवा भगवानेन बड़ाय करने, ने खपड़ीन तीहवार पाळने करीन यरुसलेम जाया करसे।7 ने असो हवसे धरतीन घराणा मां सी जे माणसे यरुसलेम मां राजा, मतलब आखा सी ताकत वाळा यहोवान बड़ाय करने वाटे नी जाय, तींद्रेचां पाणी नी पड़से। कदी मीस्र देसेन घराणा चां नी आया, ती काय तीनु पर मट्ली बीमारी नी पड़से, तेरेसी यहोवा तीनु माणसे काजे मारसे, चे खपड़ीन तीहवार मानने वाटे नी जासे?8 ज्य मीस्र देसेन ने राज्येन माणसेन डंड रवसे, जे खपड़ीन तीहवार मान्ने वाटे नी जाय।
तीने दाहड़े घुल्लान घंट्या पर बी ज लिखलो रवसे, “यहोवा वाटे चुखलो छे।” ने यहोवान घरेन ठाहरा तीनु कटवरान तसी चुखली रवसे, ज वेदी अगळ रवे। बाकुन यरुसलेम मां, ने यहुदान देस, मां आखा ठाहरा आखा सी ताकत वाळा यहोवा वाटे चुखलु रवसे, ने आखा चड़ावु चड़ावणे वाळा आवीन तीनु ठाहरा मां सीकार रांध्या करसे। तत्यार आखा सी ताकत वाळा यहोवान घर मां अळी कुय वेपारी नी जड़े।9
Source notes (9)
- Cross-reference योएल 3:2
- Cross-reference यहेजकेल 11:23; नेवताळान काम 1:11-12
- Cross-reference आमोस 1:1
- Cross-reference उजेंता बुले 21:23
- Cross-reference यहेजकेल 47:1; युहन्ना 7:38; नेवताळान काम 22:3
- Cross-reference यीरम्या 31:40
- Cross-reference यसाया 66:23; लेवयवेवस्था 23:39-43
- Cross-reference यसाया 19
- Cross-reference युहन्ना 2:16
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.