भजन सहीता 90:12

चोंवथु भाग

(भजन सहीता 90—106)

भगवान ने माणसे

मुसान दुवान भजन, जु भगवानेन खास माणुस हतलु

1ए भगवान-मालीक, तु पीड़ी-डीट हामरु आसरु छे।

2तु बयड़ा नी घड़्‌यु ने पेहले सी,

धरती ने आखी कळ नी घड़्‌यु,

ने पेहले सी, छेव नी लेवाये तीनी टेमे सी चु,

छेव नी लेवाये तीनी टेम लक तुत हामरु भगवान छे।

3तु माणसे काजे असु कवतु जाय्‌न पछु धुळाम भेसकी देय,

“ए माणसेन अवल्‌यात, पछा धुळाम जाती रवसु।”

4बाकुन तारी नींगा मां,

हजार वरीस कालुन दाहड़ा मुजुक छे,

नीते रातीन एक पहर वीत्‌या मुजुक छे।1

5तु माणसे काजे आवला खुदरान तसु उहाड़ीन ली जाती रवे;

चे सपनान तसा सर जाय,

चे छाटो सरन्‌या तीना चारान तसो छे;

6जो संदारे एघुत वदे ने फुलाये,

बाकुन सांती वेळाय चीमाय्‌न सुक जाय।

7ए भगवान, तु कीचवाय गुयु, तेरेसी हामु घाबराय गुया।

तारी रीस मां हामु खत्‌तम हवता जाय रया।

8हामरा पाप-गुना तारा मुंहडान वीजाळा मां उजेंता छे;

हामु मनेन जे पाप कर्‌या, तीनु पापेन लेखु बी तारे अगळ छे।

9तारी रीस ते हामरी जीवाय काजे छाटीत सार देय;

ने आपणा जीवनेन साले काजे आस भरता जाय्‌न जीवन जीवजे।

10हामु सत्‌तर साल जीवजे ते खरा,

वदु ताकुत हय, ती अस्‌सी साल जीवजे, बाकुन तेबी,

चे मटाय्‌न दाहड़ा, गरा ने दुखेत मां वीत जाय। असी करीन ची उमर बी छाटीत सर जाय;

ने हामरु जीव नीकळी जाय।

11बाकुन काहनी बी तारी रीसेन खरली ताकुत नी जाण्‌या।

कदी माणसे तारी रीसेन खरली ताकुत जाणता, ती चे तुसेक बीह जाय।

12हामु काजे, हामरी जीवाय्‌न दाहड़ाम फुकी-फुकीन पाय मेलने सीकाड़;

हेरेसी की, हामु अकलवाळा बणीन जीवजे।

13ए यहोवा भगवान, पछु आवती रव! कत्‌यार लक तारी वाट देखजे?

ने तारा चाकर्‌या पर दया कर!

14संदारे वेगुत तारी दयान साहरे हामरी भुक उलवी दे;

हामु जीवजे तीं लक, तारा जीतेन-गीत गावता रवजे।

15जतरा दाहड़ा तु हामुक वेला पाड़्‌यु, ने जतरा साल हामु दुख झेल्‌या,

हेरेत अनसारे हामुक खुसी ने मजा आप।

16हेरेसी, तारा बेसका-काम, हामु चाकर्‌या पर उजेंता हवे,

ने तारु सेक हामरी अवल्‌यात पर उजेंतु हवे।

17ए हामरा यहोवा भगवान, तारी गीण-दया हामरे पर देखाड़तु रव; हामरा काम करन्‌या हात काजे काठा कर,

हामु जो काम हाते धरला छे, चो पुरो कराड़।