Bhilali Bible
भजन सहीता 5
राखवाळी वाटे दुवा
दावुदेन लिखलो एक भजन, भजन-गावण्यान डाहला वाटे पावळीन वाजा पुठे गावजु
ए यहोवा भगवान, मारा आयड़ना पर धीयान सी सामळ;
मे कासणे बाजी रयु तेरे पर धीयान लगाड़।
ए मारा भगवान, ए मारा राजा, मे तारेत सी दुवा करो;
तेरेसी मारी दुवा सामळीन मदत कर।
ए यहोवा भगवान, मे संदारे ऐघुत तार सी दुवा करो,
मे संदारे ऐघुत तार सी दुवा करीन तारी वाट देखीस।
तु ते असु भगवान नी हय, जु भुंडात काम सी खुस हवे,
कुहर्या माणसेक ते तार पुठे नी रवाये।
मटाय करन्या माणसेक तार अगळ उबा नी रवाये;
तु कुहर्या माणसे पर रीस करे।
ए यहोवा भगवान! तु झुट बुलन्या माणसेक सार देसी; तु लुच्चा माणसे,
ने खुनी माणसे सी रीस करे।
बाकुन मे तारी दया ने परम साते
तारा घरेम आवो;
तारा चुखला मंदीर मां,
तारो बीहाणो मानीन तुसेक वांद्या करीस।
ए यहोवा भगवान, मेसेक तार वारलु वाट्ये चालाड़;
मारा वेरी मेसेक मारने करीन मुखु हेर रया,
तेरेमां मार अगळ-अगळ सुदी वाट बणाव।
मारा वेरीन मुंहडाम ते,
छाचाय हंय नी; तींद्रा मन मां बुराय भरायली छे।
तींद्रु गळु मसाण्या वाळा उघल्ला बीड़ान तसो छे।
चे वारु-वारु वात करे।1
ए भगवान, तीनुक डंड आप;
चे तींद्रीत युजना मां गुचवाय्न हीट पड़नु चाहजे।
चे ते, तारीत वीरुद कर्या;
तेरेमां तींद्रा बेसका पापेन वजे सी, तीनुक बाहर नीकाळ दे,
काहाकी चे तार सी लड़ाय कर्या।
बाकुन जतरा बी तार पर भुरसु करे,
चे खुस रवणु चाहजे;
ने चे जलम खुसीन गीत गावता रवणु चाहजे। तु ते, तींद्री राखवाळी करे।
तेरेमां जे तुसेक परम करे, चे तारेम खुस रवसे।
काहाकी तुत धरमी माणसेक संयबरकत आप्या करे,
ए यहोवा भगवान, तींद्री ते तु तारा परमेन ढाळ सी घेरवीन गुवाळी करे।
Source notes (1)
- Cross-reference रोमीयो 3:13
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.