Bhilali Bible
होसे 9
होसे ईस्रायेल वाटे डंडेन घुसणा
ए ईस्रायेल, तु राज्य-राज्येन माणसेन तसु खुसी मां खुस घुण हवे! काहाकी तु आपसा भगवान काजे छुड़ीन रंडी बणी। तु ते दाणा ने आखा एक खळा माय्न छीनाळान कमाय खुसी सी लेदली। चे नीते खळा माय्न दाणा सी आफरसे, ने नी कुंडेन अंगुरेन रस सी, ने नवला अंगुरेन रस कम हंय जाणे सी चे धुकु खासे। चे यहोवान देस मां नी रय सके, बाकुन एप्रेम मीस्र मां पछु जाती रवसे, ने चे अस्सुर मां भुंडीत चीज खासे। चे यहोवा वाटे अंगुरेन रसेन चड़ावु नी चड़ावे, ने नी तींद्री बादा तीनाक भावे। तींद्रा रुटा दुख करने वाळान तसो खाणो ठेहरसे; जतरा बी तीनाक खासे आखा ईटळी जासे; काहाकी तींद्री खाणेन चीज हींद्री भुक भांजणे करीन रवसे; चु यहोवान घर मां नी आय सकसे।1 ठहरावला टेमे तीहवार ने यहोवान खुसीन दाहड़े तुहुं काय करसु? देखु, चे नास हवणेन वजे सी बीहीन जाती र्या; बाकुन चां मर जासे ने मीस्री तींद्रा धड़ काजे भेळा करसे; ने मोप मां रवणे वाळा तीनुक गाड़ देसे। तींद्रा मन काजे भावणे वाळी चांदीन चीज काटाळस्या झाड़कान हक मां पड़से, ने तींद्रा तम्बु मां काटा उंगसे।
डंडेन दाहड़ु आवलु छे; बदलु लेणेन दाहड़ु आय रयु; ने ईस्रायेली जाण लेसे की, तींद्रे मां सी बेसका पाप ने मटला अदुस रीस सी अघी सी आवणे वाळी वात बताड़न्यु ते डेड़-अकल्यु, ने तीना माणुस पर चुखली आत्मा उतरे, चु गांडु हंय जासे।2 एप्रेम मारा भगवान भीणी सी राखवाळ्यु छे; भगवानेन अघी सी आवणे वाळी वात बताड़न्यु आखा वाटे जाळेम सी फांदायण्यु छे, ने चु आपसा भगवानेन घर मां वेरी हतलु। चे गीबा सहरेन दाहड़ान तसा बेसका बीगड़ला छे; हेरेसी चु तींद्रा भुंडात कामेक हेर मां लीन तींद्रा पापेन डंड आपसे।3
ईस्रायलेन पाप ने तेरो फळ
मे ईस्रायेल काजे असु देख्यु जसो कुय बयड़ा मां अंगुर हात कर्या; ने तुंद्रा डाहा-डाहा पर असी नींगा कर्यु जसु अंजीरेन पेहेल काम पर नींगा नाखला। बाकुन चे पर बयड़ान बाल देवता धड़े जाय्न, आपसा काजे लाजवायणेन वजे सी हवणे वाटे आप देदु, ने तेरे पर मनवाय गुयला, चे हेरेन तसा पापी हंय गुया।4 एप्रेमेन सींगार चिरलान तसा उडी जासे; नीते काहनाक पयदा हवसे, ने नी काहनाकेन मोहना रवसे, ने नी काहनीक बायरी भारीस हवसे। भले चे आपसा पुर्या-पारी काजे पाळी-पुसीन मटा बी करे, तेबी मे तीनुक जां लग नी-पुर्या वाळा करीस की कुय बी नी बचे। जत्यार मे तींद्रे सी छेटे हंय जाय्स, तत्यार तींद्रे पर हाय!
जसु मे तीना सोर काजे देख्यु, तसुत एप्रेम काजे बी मन-मानी जागा मां वसलु देख्यु; तेबी तीनाक आपसा पुर्या काजे मारन्या अगळ ली जाणु पड़से। ए यहोवा, तीनुक डंड आप! तु काय आपसी? जो की तींद्रा बायरान मोहना नी रवे, ने तींद्री छाती सुकली रवे।5
ईस्रायेली पर मालीकेन नीयाव
तींद्री आखी कुहराय गीलगाल मां छे, चाहात मे तीनुक वारु नी समज्यु। तींद्रा भुंडात कामेन वजे सी मे हीनुक आपणा घर मां सी नीकाळ दीस। तीनुक अळी परम नी करो, काहाकी तींद्रा आखा राज करन्या लड़ाय करने वाळा छे। एप्रेम सहरेन माणसे तीना झाड़कान तसा सुकी गुया, ने तींद्रेम फळ नी लाग्से। भले तींद्रा बायरा पुर्या बी पयदा करे, तेबी मे तींद्रा पयदा हवला लाटेकला काजे मार नाखीस।
भगवानेन अघी सी आवणे वाळी वात बताड़न्यान ईस्रायेलेन बारामां बुले
मारु भगवान, चु आपसा माणसे काजे छुड़ देसे। काहाकी चे तींद्री वात नी सामळ्या। चे राज्य-राज्येन ईचमां अथान-अथा मर्यात-मर्या फीरता रवसे।
Source notes (5)
- Cross-reference वेवस्थावीवरन 26:14
- Cross-reference लुका 21:22; युहन्ना 10:20
- Cross-reference न्यायीयो 19:22
- Cross-reference वेवस्थावीवरन 32:30; गिन्ती 25:3
- Cross-reference लुका 23:29
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.