होसे 8

यहोवा मुरतीन पुजा-पाट वाटे ईस्‌रायेलीन बुराय कर्‌यु

1यहोवा कवे, तारा मुंहडा सी फेफ्‌या वाजी गुया। तींद्‌रु दुस्‌मन घुड़ान तसो यहोवान घर पर फीरने बाजी जासे, काहाकी मारा घरेन माणसे मारा वायदा काजे तुड़ी देदा, ने मारा नेम-कायदान वीरुद करला। 2चे मेसेक आयड़ीन कवसे, “ए मारा भगवान, हामु ईस्‌रायली माणसे तुसेक जाणजे।”1 3बाकुन ईस्‌रायेली माणसे भलाय काजे मन सी नीकाळ देद्‌ला छे; तेरेमां कुहर्‌या तेरे पछळ पड़से।

4चे राजा काजे नक्‌खी कर्‌या, बाकुन मारी मरजी सी नी। चे राज-करन्‌या काजे बी नक्‌खी कर्‌या, बाकुन मारा अनजाण्‌या मां। चे आपसान सोनो-चांदी लीन मुरती बणाय लेदा जेरेसी चे खत्‌तम हंय जासे।2 5ए सोमरोन, चु तारा केवड़ा काजे मन मां सी नीकाळ देदु; मारी रीस तींद्‌रे पर आय पड़ली छे। चे नी-गुनाळा हवणे करीन कतरीक वार लागाड़से? 6जो ईस्‌रायेल सी हयो। एक मीस्‌तरी हीना काजे बणायु; ची मुरती भगवान नी हय। तेरेमां सोमरोनेन चु केवड़ु टुकड़ा-टुकड़ा हंय जासे।

7चे ते वाहळी काजे वेरे, ने चे भुत्‌या काजे काटसे, तींद्‌रे वाटे काय खेत नी रवे, ने नी तींद्‌री मेर सी ईतरुक पीठु रवसे; ने कदी हय, तेबी दीसरा देसेन माणसे तीनाक खाय जासे। 8ईस्‌रायेली काजे हापकी लेदा; हंय चे दीसरा राज्‌य मां फालतु ठेहर्‌या, जसा फालतु ठाहरा रवे। 9काहाकी चे अस्‌सुर मां असा जाती रया, जसु जंगली गदड़ु टुळाम सी आंग्‌ये रवे; ने एप्‌रेम दुस्‌तीदार्‌या काजे दाहड़की पर राखला छे। 10बाकुन चे दीसरा राज्‌य मां सी दाहड़क्‌या बणायन राखे, तेबी मे तीनुक भेळा करीस। चे राज-करन्‌या ने राजान भारेन वजे सी कम हवसे।

11एप्‌रेम पाप बली करने करीन बेसकी वेदी बणावलु, ची वेदी तेरा पापी हवणेन वजे सी बी ठेहरी। 12मे ते तींद्‌रे वाटे आपणा नेम-कायदाम गीणायेनी अतरी वात लिखतु आय रयु, बाकुन चे बी तीनुक पराया समजे। 13चे मार वाटे बादा ते चड़ावे, ने जनवर्‌यान बादा बी चड़ावे, बाकुन तेरो फळ सीकारुत छे; चे आपसात तीनाक खाय; बाकुन यहोवा तींद्‌रे सी खुस नी हवे। हंय चु तींद्‌रा भुंडात काम काजे हेर करीन तींद्‌रा पापेन डंड आपसे; चे मीस्‌र देस पछा जाती रवसे।

14काहाकी ईस्‌रायेल आपसा बणावणे वाळा काजे ईस्‌रीन बंगला बणाया, ने यहुदा बेसका कीला वाळा सहर काजे वसाड़लु छे; बाकुन मे तींद्‌रा सहर मां आक्‌ठो लागाड़ीस, ने तेरेसी तींद्‌रा कीला नास हंय जासे।3