Bhilali Bible
होसे 7
जत्यार मे ईस्रायेली काजे वारु करतु रयु, तत्यार एप्रेमेन भुंडात काम ने सोमरोनेन बुराय उजेंती हंय जाय; ने चे धुका सी काम करे, चुट्टु चुरी करने घर मां भराये, ने डाकुन टुळु बाहर हापकी लेय। तेबी चे नी सुचे की यहोवा आपणी आखी कुहराय काजे हेर राखे। हेरसी हंय चे आपसा कामेन जाळ मां पड़ी जाय, काहाकी तींद्रा काम मारी नींगा मां बन्ला छे।1
राजमहल मां वीरुद करनेन मुजगी
चे राजान बुराय करने सी, ने राज-करन्या काजे लुच्चाय मेकणे सी खुसी मनावे। चे आखा की आखा छीनाळ्या छे, तींद्री नावबद्दी चुल्हा मां धपतेला आकठान तसी धपतेली छे, तीनाक जां तक चुड़ावणे वाळा हालाड़े नी चां तक पीठु चुड़ने वाटे तीयार नी हंय जाय। हामरा राजान पयदा वारीन दाहड़ा मां राज-करन्या अंगुरेन रस पीन नस्याम धुन हंय गुया; चु हासी ठट्टा करनेवाळा सी आपसु हात मीलायु। जत्यार लग चे डुकाय्न मारने बस रवे, तत्यार लग चे आपसान मन चुल्हा माय्न धपतेला आक्ठान तसा तीयार रवे; तींद्रा रांदणे वाळा रात भर सुवता रवे; ने चु संदारे चुल्हान धपतेला ईंगाळान तसा रात्ला हंय जाय।
चे आखा की आखा चुल्हान तसा धपतेला, ने आपसा नीयाव करन्या काजे खत्तम करे। ने तींद्रा आखा राजा काजे मारी नाखला छे; ने तींद्रे मां सी काहनुक बी मारी बड़ाय नी करे।
ईस्रायल ने दुसरो देस
एप्रेम देस-देसेन माणसे सी हेळी-मेळीन रवे; एप्रेम असु रुटु छे, जीनाक पलट्या नी। दीसरा देसेन माणसे तेरी ताकत काजे तुड़ देदा, बाकुन चु ईनुक नी जाणे, ने तेरा मुणका मां कांखुर-कांखुर फुलायला कान्या छे, बाकुन चु ईनुक बी नी जाणे। ईस्रायेलेन मटाय हेरेत वीरुद मां गवाय देदा, ईनी आखी वातेन रवते बी चे आपसा भगवान यहोवा भीणी नी फीर्या, ने नी तीनाक हेर्या। एप्रेम एक भुळी पानकुकड़ीन तसु हंय गुयु, तीना काजे काय बी अक्कल नी हय; चे मीस्री माणसेन बड़ाय करे, ने अस्सुर भीणी जाती रवे। जत्यार चे जाय तत्यार तींद्रे पर मे मारी जाळ फेलावीस; मे तीनुक असु खाची लीस जसा वादळा माय्न चिरला काजे खाचे; मे तीनुक असु डंड आपीस, जसी तींद्री मंडळी सामळी लेदी।
तींद्रे पर हाय, काहाकी चे मार धड़े सी भटकी गुया। चे खत्तम हवणु चाहजे, काहाकी चे मार ती लड़ाय करला छे। मे ते तीनुक बचाड़तु आय रह्यु, बाकुन चे मार सी झुट मेकता आय रया। चे छाचला मन सी मारी बड़ाय नी करे, बाकुन आपसा खाट्ला मां पड़्या-पड़्या हाय, हाय, करे; ने चे दाणा ने नवला अंगुरेन रस काजे लेणे करीन भीड़ की भीड़ आवे, ने मार सी लड़ाय करे। मे तीनुक सीकाड़तु रयु, ने तींद्रा खुबा काजे ताकतवाळा करतु आय रयु, तेबी चे मार वीरुद मां कुहराय्न वीच्यार करे। चे फीरे ते खरा, बाकुन आखान उचे रहण्या भगवान भीणी नी फीरे; चे धुकु देणेवाळी धंदलीन तसा छे; तेरेमां तींद्रा आफसर्या आपसान रीस-भरी वातेन वजे सी तलवार सी माराय जासे। मीस्र देस मां तींद्री हासी ठट्ठा मां उडाड़नेन जीत वजे रवसे।
Source notes (1)
- Cross-reference भजन सहीता 90:8
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.