होसे 6

पस्‌तावु करनेन दीखावु

1“चालु, आपणु यहोवा भीणी अळजे; काहाकी हयुत घाव लागाड़लु, ने हयुत वारु बी करसे; हयुत ठुक्‌यु, ने हयुत आपणा घाव पर पट्‌टी बांदीन वारु करसे।1 2दुय दाहड़ा पछेन चु आपणु काजे जीवाड़से, ने तीसरे दाहड़े चु आपणुक हाकलीन उबु करसे, तत्‌यार हामु हेरे अगळ जीवतेला रवसुन।2 3आवु, आपणु अक्‌कल हेरजे, ने यहोवान अक्‌कल काजे हात करने वाटे कुसीस बी करजे; काहाकी यहोवान उजेंतो हवणु संदारेन तसो छे; चु पाणीन तसु आपणे उपर आवसे, मतलब जेठवड़ीन पाणीन तसु तेरेसी जागा भीगे।”3

4बाकुन यहोवा कवे, ए ईस्‌रायेल ने यहुदा, मे तार साते काय करो? तुंद्‌रु परम मार वाटे संदारला उसटान तसो छे, मामार खत्‌तम हंय जाय: जो उस्‌टान तसो छे, जो दाहड़ु उंगतेत खत्‌तम हंय जाय। 5हेरे वजे सी मे भगवानेन अघी सी हवणे वाळी वात देखाड़न्‌यान साहरे मानु हीनुक मे कुराड़ वाटे काट नाखीस, ने मारा बुल सी हीनुक मार नाखीस, ने मारु नीयाव ईजाळान तसु चमके।4 6काहाकी मे होमबादा सी नी, बाकुन मटी परम सी खुस हवो, ने चड़ावा सी अदुस जो चाहो की माणसे भगवानेन अक्‌कल राखे।5

7बाकुन चे माणसे आदमेन तसा वादा काजे तुड़ देदा; ने चे चां मेसेक धुकु देद्‌ला। 8गीलाद नावेन सहर ते पापी माणसे सी भरलु छे, चो खुन-खराबा सी भरलो छे। 9जसा चुट्‌टान टुळा काहनाक काजे मारने करीन बठे, तसात पुजारान टुळा सेकेम सहरेन वाट मां खुन करे, बाकुन चे बेसका मटा पाप बी करला छे। 10ईस्‌रायेलेन घराणा मां मे रड़तेला उबा हवलान वजे देख्‌यु; तेरेमां एप्‌रेमेन भुंडात कामे ने ईस्‌रायेली ईटेळा जड़े।

11ए यहुदा, जत्‌यार मे मारा माणसे काजे गुलामी मां सी पछु छुड़ाय्‌न ली आय्‌स, तीनी टेमे तार वाटे बी डंड ठेहरावलु छे।