Bhilali Bible
होसे 5
ए पुजारा, जी वात सामळु! ए ईस्रायेलेन घरन्या, धीयान सी सामळु! ए राजान घरन्या, तुहुं बी कान्टा लागाड़ीन सामळु! काहाकी तुंद्रु नीयाव करसे, काहाकी तुहुं मीसपा मां फन्दु, ने ताबोर बयड़ा पर लागाड़ली जाळ बण गुयला। चे बीगड़ला काजे मार देदला, हेरसी मे तीनु आखा काजे डंड आपीस। मे एप्रेमन वात काजे जाणो, ने ईस्रायेलीन हालत मार सी सातायली नी हय; ए एप्रेम, तुते छीनाळो कर्यु, ने ईस्रायेली ईटळी गुया।
मुरती पुजान वीरुद मां होसेन चेतावणी
तींद्रा काम काजे आपसा भगवान भीणी फीरने नी देय, काहाकी छीनाळो करने वाळी आत्मा तींद्रे मां रवे; ने चे यहोवा काजे नी जाणे। ईस्रायेलेन मटाय हेरेत वीरुद मां गवाय देय, ने ईस्रायेल ने एप्रेम आपसा पापेन वजे सी ठुकर खासे, ने यहुदा बी तींद्रे साते ठुकर खासे। चे आपणा गाडरा-बुकड़ा ने दीसरा जनवार्या लीन यहोवा काजे हेरने जासे, बाकुन चु हीनुक नी जड़े; काहाकी चु हींद्रे सी छेटु हंय गुयु।1 चे छीनाळा सी पुर्या पयदा करला छे, तेरेसी चे यहोवा सी धुकु कर्या। हेरे वजे सी हंय नवलु चांद तींद्रु ने तींद्रा हीस्सा काजे नास कर देसे।
ईस्रायेल ने यहुदान ईचमां लड़ाय
गीबा मां फेफ्या, ने रामा मां फेप्यो वाजाड़ु। बेतावेन मां आयड़ीन कहु; ए बीन्यामीन, आपसा पछळ देख! नीयावेन दाहड़ा मां ईस्रायेली माणसे उजड़ी जासे, हीनी वातेन हवणु चेत छे, मे तीनीत काजे खबर ईस्रायेलीन आखा घराणा काजे आपलु छे।
यहुदा सहरेन अगुवा तीनुन तसा हवला छे, जे काकड़ लांबु कर लेय; मे तींद्रे पर आपसी रीस पाणीन तसु रेचवीस।2 एप्रेम काजे वेला पाड़ला छे, चु केस हार गुयलु छे; काहाकी चु मुरती पुजान वाट पर मन लागाड़ीन तीना हुकुम पर चाल्यु। हेरेसी मे एप्रेम वाटे कीड़ान तसु, ने यहुदान घराणा वाटे सड़लान तसु रय्स।
जत्यार एप्रेम आपसान दुख, ने यहुदा आपसान घाव देख्यु, तत्यार एप्रेम अस्सुर धड़े गुयु, ने यारेब राजा काजे कय मकल्यु। बाकुन चु तुहुं काजे वारु नी कर सके ने नी तुंद्रु घाव वारु कर सके। काहाकी मे एप्रेम वाटे नाहार, ने यहुदान घरन्या वाटे जुवान्यु नाहार बणीस। मे आपसुत तीनुक फाड़ीन ली जाय्स; जत्यार मे हाकली ली जाती रयस, तत्यार मारा पाय सी कुय नी बचाड़ सके।
जत्यार लग चे आपसा काजे गुनाळा मानीन मारा मुंहडाक मार नाखणे करीन हेर नी करसे, तत्यार लग मे आपणा जागा मां पछु नी जाम, ने जत्यार चे गरा मां पड़से, तत्यार जीव लागाड़ीन मेसेक हेरने बाजी जासे।3
Source notes (3)
- Cross-reference युहन्ना 7:34
- Cross-reference वेवस्थावीवरन 19:14
- Cross-reference यीरम्या 29:13
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.