Bhilali Bible
होसे 4
भगवानेन ईस्रायेली पर गुनु
ए ईस्रायेली माणसे, यहोवान बुल सामळु; ईना देस मां रवणे वाळा साते यहोवा भगवानेन लड़ाय छे। ईना देस मां नीते काय छाचाय छे, ने नी काय दया ने नी काय भगवानेन अक्कल छे।1 जां माणसे झुटी सगुन खाय, लुच्चाय करे, हत्या करने, चुटाय करने, ने छीनाळो करने छुड़ीन काय बी नी करे; ने चे काकड़ काजे एणकीन गलत काम करे ने खुनुत खुन हवतो रवे। हेरे वजे सी जो देस रड़से कलपसे, ने खयड़ान जीव-जनवार्या, ने चिरला भेळ तेरा आखा रह्णे वाळा चीमाय जासे, ने दर्या समुदरेन माछा बी मरीन खत्तम हंय जासे।
भगवानेन पुजारा पर गुनु लागाड़े
देखु, कुय बी लड़ाय झगड़ु नी करनु चाहजे, ने नी कुय गुनु लागाड़े, काहाकी तारा माणसे ते पुजारा सी लड़ाय झगड़ु करने वाळान तसा छे। तु दीन-दाहड़े ठुकर खासी, ने राते भगवानेन अघी सी आवणे वाळी वात बताड़न्या बी तार साते ठुकर खासे; ने मे तारी माय ईस्रायेली काजे नास करीस। मारी अक्कल नी हवणे सी मारा माणसे खत्तम हंय गुया; तु मार अक्कल काजे फालतु जाण्या, हेरसी मे तुसेक मारु पुजारु रवणे लायक नी ठेहरावो। हेरसी की तु आपसा भगवान मुसान साहरे लिखला नेम-कायदा काजे छुड़ देदलु छे, मे बी तारा पुर्या-पारी काजे छुड़ दीस।
जसा चे बड़ता गुया, तसात चे मार वीरुद मां पाप करता गुया; मे आव-भावेन बदले तींद्री नावबद्दी करीस। चे मारा माणसे पाप मां करली बादा काजे खाय, ने माणसेन पापी हवणेन लालुच करे। हेरसी जी माणसेन हालत रवसे, चीत हालत पुजारान बी रवसे; मे तींद्रा बुलने चालनेन साहरे डंड आपीस, ने तीनुक तींद्रा कामेन अनसारे तींद्रे सी बदलु लीस। चे बादान हीस्सा खासे ते खरा, बाकुन आफरसे नी, ने दीसरा देवतान पुजा-पाट करसे, बाकुन तींद्री काय अवल्यात नी हवे; काहाकी चे यहोवा भीणी मन लागाड़नु छुड़ देदा।2
भगवानेन साहरे मुरती पुजान गुनु
भगवान कवे, छीनाळो ने अंगुरेन रस ने ताबला अंगुरेन रस, जे तीनी अक्कल काजे खत्तम करे। मारा माणसे लाकड़ान पुतळा सी सवाल पुछणे बाजी रया, ने तींद्री लाकड़ी तीनुक आवणे वाळी वात बताड़े। काहाकी छीनाळो कराड़नेवाळी आत्मा तीनुक बेहकाड़ी, ने चे हक मां रहणु छुड़ीन छीनाळो करे।3 बांज, चीनार ने नानला बांज नावेन झाड़कान साहळु वारु छे, हेरसी चे तळे ने बयड़ान चटी पर चड़ावु करे, ने ढेकळा पर धुप धपाड़े।
हेरे वजे सी तुंद्री पुरे छीनाळ ने तुंद्री उहड़ीस छीनाळी बण गुय।
जत्यार तुंद्री पुरे छीनाळो, ने तुंद्री उहड़ीस छीनाळो करे, तत्यार मे तीनुक डंड नी आपो; काहाकी अदमी आपसुत रंड्या साते एखलुत जाय, ने देव-दासीन दुस्तीदार्या बणीन चड़ावु करे, ने जे माणसे समज नी राखे, चे आखा खत्तम हंय जासे।
ए ईस्रायेली, कदी तु छीनाळो करे, अळी बी यहुदा गुनाळु नी बणे। गीलगाल मां घुण आवु; ने नी बेतावेन भीणी जावु; ने यहोवान जीवनेन सगुन ने कुय्न सगुन घुण खावु।4 काहाकी ईस्रायली नी मान्ने वाळा केवड़्यान तसा मटाय कर्या, काय हंय यहोवा तीनुक गाडरान पीलान तसा लाम्बा-चवड़ा खयड़ा मां चारसे? ईस्रायली माणसे मुरतीन बेहकावा मां आय गुया; हेरसी तीनाक रहणी देवु। चे जत्यार अंगुरेन रस पीन छाके, तत्यार छीनाळो करने बाजी जाय; तींद्रा मुख्या माणसे तींद्रा आव-भाव करने सी अदुस नावबद्दी हवणे सी परम राखे। आंधी तीनुक आपसा पाखड़ा मां बांदीन उडाड़ीन ली जासे, ने तींद्री बादा चड़ावणेन वजे सी तींद्री नावबद्दी हवसे।
Source notes (4)
- Cross-reference मीका 6:2
- Cross-reference मीका 6:14
- Cross-reference यीरम्या 2:27
- Cross-reference आमोस 4:4
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.