Bhilali Bible
होसे 3
होसे ने धुकु देणे वाळी बायरी
अळतेन यहोवा मेसेक कह्यु, “हय जाय्न एक बायर सी परम कर, जी छीनाळो करने पर बी आपसा परम करने वाळान लाटकली छे; काहाकी हीनीत रीते कदी ईस्रायेली माणसे दीसरा देवतान पुजा पाट करे, ने सुकला अंगुरेन फळ सी परम राखे, तेबी यहोवा भगवान तीनुक परम करे।”
तत्यार मे एक बायर काजे चांदीन पंद्रे सीक्का ने डेड़ सोव कीलु जळ गहुं आपीन मुल लेदु। मे तीनी काजे कह्यु, “तु बेसका दाहड़ा लग मार वाटे बठी रवजी; ने नीते छीनाळो करजी, ने नी काहनाक अदमीन बायर बणजी, ने मे बी तार वाटे असुत रय्स।” काहाकी ईस्रायली माणसे बेसका दाहड़ा लग राजा पाखुर, राज-करन्या पाखुर, बीना बादा चड़ावे पाखुर, पाखुर चुखलु दगड़ु, ने एपोदेन नीते घरेन देवतान बठी रवसे। अळतेन चे आपसा भगवान यहोवा ने आपसा राजा दावुद काजे अळी हेरने बाजी जासे, ने आकरी दाहड़ा मां यहोवा धड़े, ने तेरी वारलु चीज वाटे कापता जाय्न आवसे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.