होसे 2

1“अळतेन तुहुं आपसा ईस्‌रायेली भाईस काजे ‘मारा माणसे’1 कहु ने आपसा ईस्‌रायेली बहणस्‌या काजे कहुं ‘जीनीक दया जड़ी’।”2

ईस्‌रायेली माणसेक डंड आपणु

2ए मारा पुर्‌या! तुहुं आपसी माय काजे समजाड़ु, काहाकी हयी मारी बायर नी हय, ने मे हेरु घरवाळु नी हय। हीनीक असा कहु, तुहुं दीसरा अदमी साते छीनाळो मां करे, ने आपसी छाती पर सी छीनाळा काजे छेटे कर; 3हयी नी सुदरे ती मे तेरा पुथल्‌या नीकाळीन हीनीक पयदा हवणेन दाहड़ान तसु उगाड़ली3 कर दीस, ने हीनीक उजड़ली जागान तसु ने उजड़ली धरतीन तसु कर दीस, ने हीनीक पीसलु मार नाखीस। 4मे तेरा पुर्‌या-पारी पर बी दया नी करो, काहाकी चे छींनाळान पुर्‌या-पारी छे। 5तींद्‌री माय छीनाळो करीन आपसा लाडाक धुकु देदी; तेरा पेट मां पड़े, ची सरम आवे असला गलत कामेन साहरे पयदा हवली छे। ची ते असी कह्‌वी, मे ते मारा परम करने वाळा पछळ जाय्‌स, जे मेसेक खाणो-पाणी, गाडरान कान्‌यान ने, सणेन पुथल्‌या, तेल ने पीणे अंगुरेन रस बी आपे।

6हेरेसी देखु, मे तेरे वाटे काटात काटा वावरी दीस, ने असी वाड़ी बांदी दीस की तीनीक वाटुत नी जड़े। 7ची आपसा परम करने वाळा पछळ पड़से, बाकुन चे तीनीक हात नी लागे, अळतेन ची तीनुक हेरसे, तत्‌यार ची असी कवसे मे मारा पेहला लाडा धड़े जाती रय्‌स, काहाकी हंय सी ते पेहल मारो वारु हतलो।

8बाकुन ची जो नी जाणतेली की, मे तीनीक अन, ने नवलु अंगुरेन रस ने तेल आप्‌या करतेलु, ने तेरे वाटे सोना, चांदी, बी मेत आपलु, तेरेसी ची बाल देवतान मुरती बणावतेली। 9हेरे वजे सी मे काटणीन टेमे दाणा दुणी हापकी लीस, ने नवला अंगुरेन रस नीकाळसे ती चु बी हापकी लीस, ने आपसा गाडरान कान्‌या ने सणेन पुथल्‌या बी तींद्‌रे, सी मे हापकी लीस, जे पुथल्‌या मे तीनीक आपसो डील ढाकणे करीन आपलु। 10हंय मे हेरा परम करने वाळा माणसे अगळुत तीनीक बीना पुथल्‌यान करीन तेरा छींनाळा काजे उजेंतु कर दीस, ने तीनीक मार हातेम सी कुय छुड़ाय नी सके। 11मे तेरा आखा तीहवार काजे बंद कर दीस, नवलु चांद ने आरामेन दाहड़ा काजे ने आखा नवला महनान खुसीन दाहड़ा काजे खत्‌तम कर दीस। 12मे तेरी अंगुरेन वाड़ी काजे ने अंजीरेन झाड़का काजे, तींद्‌रा बारामां ची कवे की जु मारा छीनाळान कामे सी जड़े, जीनाक मारा परम करने वाळा मेसेक आपला छे, तीनुक असु उजाड़ीस की चे बयड़ान तसा हंय जासे, ने तीनुक चाहांन जीव-जनवर्‌या खाय जासे। 13चे दाहड़ा तींद्‌रे मां ची बाल देवता वाटे धुप धपाड़तेली, ने नाकेन काटु ने हार पेहरली आपणा परम वाळा पछळ जासे, ने मेसे काजे भुली रवतेली, तीनु दाहड़ान डंड मे तीनुक आपीस, यहोवा भगवानेन जत बुल छे।

मारा माणसे वाटे भगवानेन परम

14“हेरेसी देखु, मे यहोवा भगवान तीनीक मुहवीन उजाड़्‌या बयड़ाम ली जायस, ने चां तेरेसी मे सांतीन वात करीस।” 15चाहा सी तीनीक अंगुरेन वाड़ी आपीस, ने आकोर नावेन घाटी काजे आसन बारनो बणाय दीस, ने चां ची मारसी असी वात कवसे जसी आपसी जुवानीन दाहड़ाम मतलब मीस्‌र देस सी चालीन आवणेन टेमे कवतेली। 16यहोवा भगवानेन जी वात छे।

की तीनी टेमे तु मेसेक ईसी4 कय्‌न आयड़सी ने अळतेन बाली5 नी कवसी। 17काहाकी मे हुटड़ा पर सी आवणे वाळा दाहड़ाम तीनीक बाल देवतान नाव नी लेणे दम, ने तींद्‌रो नाव कदी बी हेर मां नी रवसे।

18तीनी टेमे मे ईस्‌रायेली राज्‌येन माणसे वाटे जंगली जनवार्‌या ने चिरला ने धरती पर घीसड़ाय्‌न चालन्‌या-फीरन्‌या जनवार्‌या साते बुली करीस, ने धंदल्‌या ने तलवार तुड़ीन लड़ाय काजे तींद्‌रा देसेम सी छेटे कर दीस; ने असु करीस की चे माणसे बीहे पाखुर सुया करसे

19मे जलम तुसेक मारी बायर;

बणावणेन वायदु करीस,

ने जु वायदु धरम ने नीयाव ने परम,

ने दया साते वायदु करीस।

20मे तुसेक छाचाय साते ईयावेन वायदु करो,

ने तु यहोवा भगवान काजे जाण लेसी।

21“यहोवा असु कवे की, मे यहोवा तारी दुवा सामळीन,

वादळा काजे हुकुम आपीस, ने चो धरती पर पाणीन सेरा पाड़से;

22ने धरती दाणा, नवलु अंगुरेन रस, ने ताबला तेलेन सामळीन तीनुक जपाप आपसे, ने चे यीज्‌रेल काजे जपाप आपसे।”

23मे मार वाटे तीनाक देस मां एरीस,

ने मे तेर पर मारु परम देखाड़ीस जीनाक मे “लोरुहामा”6 कह्‌यु।

मे तींद्‌रे सी बी जे “लो-अम्‌मी”7 कह्‌वाये तीनुक कय्‌स,

तुहुं मारा माणसे छे,

ने चु कवसे, “ए मारा भगवान।”8