Bhilali Bible
होसे 1
मे बेर्यान पुर्यु होस्यु छे, यहोवा भगवानेन वात मारेन्चां तीनु दाहड़ा मां पुगी, तीनु दाहड़ा मां यहुदीया घराणा मां उज्जी राजु योताम राजु, आहाज राजु, ने हीजक्यु राजु राज करतेलु, ने ईस्रायेलेन घराणा मां योवासेन पुर्यु यारोबाम राजु राज करने बाजी रवलु1
होसेन लाडी ने पुर्या पारी
जत्यार यहोवा भगवान मार पुठे पेहेल-मेहेल वात कर्यु, तत्यार चु मेसेक असु कह्यु, “जां ने एक रंडी काजे आपसी घरवाळी बणाय ले, ने तेरे पुठे सवसार करीन पुर्या पयदा कर ले, काहाकी ईना देसेन माणसे मेसेक छुड़ीन रंडीन तसा मेसेक कसा धुकु देणे बाजी रया।”
अळतेन चु दीबलेम्यान पुरे गोमेर काजे मारी घरवाळी बणाय लेदु, ने ची भारीस हंय ने तेरु एक पुर्यु पयदा हयु। तत्यार यहोवा मेसेक असु कह्यु, “तु ईना पुर्यान नाव यीज्रेल पाड़, काहाकी मे छाटुस येहु धड़े मे यीज्रेल मुलुक मां खुन खराबु हवलु छे, तेरु बदलु लीस। ने मे ईस्रायेलेन घराणाक डंड आपीस, ने तेरो नावुत खत्तम कर दीस। तीनी टेमे मे यीज्रेल खळदाण मां ईस्रायेलेन राजवाड़ान सीपायड़ान जुर भांज दीस।”
अळतेन गोमेर अळी भारीस हय, ने तेरी एक पुरे पयदा हय। तत्यार यहोवा भगवान मेसेक असु कह्यु, “हीनी पुरेन नाव लोरुहामा2 पाड़; काहाकी मे ईस्रायेलेन घराणान माणसे पर अळी बी दया नी करो ने माफ बी नी करो। बाकुन मे यहुदा घराणान माणसे पर दया करीस, ने तीनुक बचाड़ीस; मे तीनुक नीते धंदलीन साहरे, ने नीते तलवार सी, ने नीते लड़ाय सी, ने नीते घुल्ला पर बसण्यान साहरे बचाड़ो, बाकुन मे यहोवा भगवान खुद तीनुक बचाड़ीस।”
जत्यार ची लोरुहामान दुत पीणु छुड़ाय देदी, ती गोमेर अळी भारीस हवी, ने तेरु एक अळी पुर्यु हयु। तत्यार यहोवा भगवान मेसेक असु कह्यु, “तु हेरो नाव लो-अम्मी3 पाड़; काहाकी नीते ईस्रायेली माणसे मारा असामी रया, ने नीते मे तींद्रु भगवान रयु।”
ईस्रायेल देसेक पछो वसणु
तेबी ईस्रायेली माणसे गीणाये अतरा दर्या-समुदरेन बालु रेतळान तसा हंय जासे, तीनुक माप नी सके, ने नी गीण सके; ने तीनी जागाक तीनुक लो-अम्मी, “तुहुं मारा माणसे नी हंय कवसे,” तीनीत जागा मां तीनुक जीवतेला भगवानेन अवल्यात छे करीन कहवायसे।4 तत्यार यहुदी माणसे ने ईस्रायेली घराणन माणसे दुयु भेळा हय्न एक नेता काजे नेवाड़ीन ने देसेम सी पछा आवती रवसे; काहाकी जु दाहड़ु यीज्रेल सहर वाटे बेसकु मटु दाहड़ु रवसे।
Source notes (4)
- Cross-reference 2 राजा 14:23—15:7; 15:32—16:20; 18:1—20:21; 2 ईतीहास 26:1—27:8; 28:1—32:33
- Footnote लोरुहामां तेरो मतलब छे : बीन लाटेकली
- Footnote लो-अम्मी मारा माणसे नी
- Cross-reference रोमीयो 9:26
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.