Bhilali Bible
होसे 10
ईस्रायेल एक नीळीकच अंगुरेन वाड़ीन तसो छे, तेरेमां बेसका फळ बी लागी र्या, बाकुन जसा-जसा तेरा फळ मटा हया, तसा-तसा, चे वदुस वेदी बणाया; जसा-जसा तेरी जागा सुदरी गुय, तसात चे दगड़ान चुखली मुरती बणवता गुया। हींद्रो मन वाटायलो छे; हंय चे गुणाळा ठेहरसे। चु तींद्री वेदी काजे तुड़ देसे, ने तींद्रा दगड़ान चुखली मुरती काजे टुकड़ा-टुकड़ा करसे।
हंय चे कवसे, “हामरु काहनु बी राजु नी हय, काहाकी हामु यहोवान बीहाणो नी मान्या; तेरसी राजु हामरो काय कर सकसे?” चे वात बणावे ने झुटी सगुन खाय्न वायदु करे; तेरेमां खेड़ला खेतेन धतुरान तसा नीयाव अधसे।
सामर्या1 मां रवणे वाळा बेतावेन केवड़ा वाटे बीहता रवसे, ने तेरा माणसे तेरे वाटे दुखी हवसे; ने तेरा पुजारी तेरे वजे सी खुस हतला, हेरे सेक वाटे हेरे वजे सी दुख करसे, काहाकी चु तींद्रेम सी नीकाळ देदला छे। चु यारेब राजान भेट रवणे वाटे अस्सुर देस मां पुगाड़से। एप्रेम लाजवायसे, ने ईस्रायेल बी आपसी मुजगी करने सी लाजवाय जासे। सामरी आपसा राजा भेळतात पाणीन कुरगळान तसा सर जासे। आवेन2 उंचा जागा पर जु ईस्रायेलेन पाप छे, चे खत्तम हंय जासे। तींद्री वेदी पर काटा वाळा झाड़का ने गखर्या उंगसे; ने तीनी टेमे माणसे बयड़ा काजे कवणे बाजी जासे, हामु काजे टुप लेवु, ने बयड़्याक कवसे हामरे पर हीट पड़ु3।
भगवानेन साहरे ईस्रायेली पर डंडेन बारामां
ए ईस्रायेल, तु गीबा दाहड़ाम सी पाप करतु आय रयु, चे तेरेत मां बणीन रवे; काय चे गीबा सहर मां भुंडात माणसे साते लड़ाय मां नी फांदाय जाय? जत्यार मारी मरजी रवसे, तत्यार मे तीनुक डंड आपीस, ने राज्य-राज्येन माणसे तींद्रे वीरुद मां भेळा हंय जासे; काहाकी चे आपसा दुयु भुंडात काम मां पड़ला छे।
एप्रेम सीकली केवड़ी छे, जी दाणा मां दावण फीरने सी खुस हवे, बाकुन मे तेरा मुणका पर वारको जुड़ो मेकलु छे; मे एप्रेमेन खांदा पर जुड़ो मेकीस; ने यहुदा हळ जुपसे, ने याकुब उख्खर जुपसे।4 आपणे वाटे नीयावेन बीज एरु, तत्यार दयान अनसारे खेत काट सकसु; आपणी पड़ीत धरती काजे जुपु; देखु, हाल लगुन यहोवान पछळ चालनेन टेम छे, की चु आवे ने तुहुंक नीयाव आपे5। तुहुं कुहर्या वाटे हळ जुप्या ने धुका सी खेतेन फसल काटु; ने तुहुं धुकान फळ खादला छे। जो हेरसी हयो, काहाकी तुहुं खुदेन वाटे पर, ने आपसा बेसका सीपायड़ा पर भुरसु करला। हेरे वजे सी तुंद्रा माणसे मां हंय लड़ाय हवसे, ने तुहुं आखा वाटे आसरान कीलु असु नास हंय जासे, जसा बेतर्बेल सहर लड़ायणेन टेमे सल्मन्यान साहरे खत्तम करला छे, तीनी टेमे माय काजे आपसा पुर्या साते मार देद्लु। ओ बेतेल बुराय्न वजे सी बेतेल सहर मां बी असुत वेहवार हवसे। संदारे ईजाळो हवतेत ईस्रायेलेन राजु पुरी रीत सी सर जासे।
Source notes (5)
- Footnote सामर्या आपसा राज भेळे पाणीन कुरगळान तसा मीट जासे। कुरगळान तसा पाणी पर गीणाये नी अतरा जे पाणी पर तीरने बाजी रया।
- Footnote आवेन ईना नावेन मतलब “वेरीन घर” “ने मुरती पुजान घर” जो पेरेगराफ बताड़े की, जो बेतेल सहर ईना नावेन मतलब “भगवानेन घर” ईना बुल मां बेतावेन काजे आवेन नाव सी उळखे।
- Cross-reference लुका 23:30; उजेंता बुले 6:16
- Cross-reference यीरम्या 2:20
- Cross-reference यीरम्या 4:3; 2 कुरींथी 9:10
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.