होसे 11

ईस्‌रायेल वाटे भगवानेन परम

1जत्‌यार ईस्‌रायेल पुर्‌युत हतलु,

तत्‌यार मे तेरेसी परम कर्‌यु,

ने मारा पुर्‌याक मीस्‌र देसेम सी बुलायु1।

2बाकुन जतरु मे तीनुक बुलावतेलु,

चे ढासीन जातला;

चे बाल देवता वाटे चड़ावु करे,

ने खुदीन बणावली मुरती वाटे धुप धपाड़ता गुया।

3मेत एप्‌रेम मां पाय-पाय चालतेलु,

ने तीनुक खुळा मां लीन फीरतेलु,

बाकुन चे नी जाणतेला की हीनुक वारु करने वाळु मेत छे।2

4मे तीनुक माणुस समजीन परमेन दुयड़ी सी खाचतेलु,

ने जसु कुय बेलेन गळा माय्‌न जत खुलीन तेरे अगळ खाणो मेक देय,

तसुत मे तींद्‌रे साते कर्‌यु।

5चु मीस्‌र देस मां पछु नी आवे; अस्‌सुर तेरु राजु हवसे, काहाकी चु मार भीणी फीरने सी नीकारु कर देदु। 6तलवार तींद्‌रा सहर मां चालसे, ने तींद्‌रा बायणान कब्‌जा काजे खत्‌तम करसे; ने जी तींद्‌री युजनान खत्‌तमेन वजे सी हवसे। 7मारा माणसे मार सी छेटे जाणे मां लागी रवे; बाकुन चु तीनुक आखाम उचे रवण्‌या भगवान भीणी बुलावलु छे, तेबी तींद्‌रे मां सी काहनु बी मारी बड़ाय नी करे।

8ए एप्‌रेम, मे तुसेक कसु छुड़ दम?

ए ईस्‌रायेल, मे कसु तुसेक वेरीन हक मां कर दम?

मे कसु तुसेक अदमा सहरेन तसु छुड़ दम,

ने सबोयीम सहरेन तसु कर दम?

मारु जीव ते उलट-पुलट हंय गुयु,

मारो मन परम सी घाबराय गुयो।3

9मे मारी रीस काजे भड़कने नी दम,

ने नी मे अळी एप्‌रेम काजे नास करीस;

काहाकी मे माणुस नी हंय मे भगवान छे,

मे तार ईचमां रवणे वाळु चुखलु छे;

मे रीसवाय्‌न नी आवो।4

10चे यहोवा पछळ-पछळ चालसे, चु नाहारेन तसु डकारसे; ने तारा पुर्‌या बुडवणा सी कापता जाय्‌न आवसे। 11चे मीस्‌र देस मां सी चिरलान तसु ने अस्‌सुर देस मां सी पेरवान तसा कापता जाय्‌न आवसे; ने मे तीनुक तीनात घर मां बसाड़ दीस, यहोवान जेत बुल छे।

ईस्‌रायेल ने यहुदान बुराय

12एप्‌रेम काजे झुट सी, ने ईस्‌रायेलेन घरन्‌या धुका सी मेसेक घेरवी रया; ने यहुदा हंय लग चुखला ने भुरसा-लायक भगवान भीणी खरला बणीन रवे।