Bhilali Bible
होसे 12
एप्रेम वाहळी काजे आपसो खाणो बणावे; ने चु आखु दाहड़ु उगेणली वाहळी पछळ पड़तु रवे; ने चु दाहड़ीन झुट ने लड़ाय करतु रवे, ने चे अस्सुर साते वायदु करे, ने मीस्र देस मां तेलेन भेट चड़ावे।
यहुदा साते बी यहोवा लड़ाय छे, ने चु याकुब काजे तेरी चाल-चालणेन अनसारे डंड आपसे, तींद्रा कामेन अनसारे बदलु आपसे। आपसी मायन कुख मां चु आपसा भायस ऐसाव काजे धुकु देदु, ने मटु हय्न चु भगवान साते लड़ाय कर्यु।1 चु सरगेवाळा चाकर्या सी लड़ाय कर्यु, ने जीत बी गुयु, ने चु उसकी-उसकीन रड़्यु, ने चु कलपतु जाय्न वीन्ती कर्यु। बेतेल मां चु तीना काजे भेळु हयु, ने चां भगवान हामरे साते वात कर्यु।2 यहोवा, आखा सी ताकतवाळु भगवान, तेरु हेर यहोवान नाव सी हवे। हेरसी तु आपसा भगवान भीणी फीर; दया ने नीयावेन काम करतु रव, ने आपसा भगवानेन वाट जलम देखतु रव।
नीयाव करने अगळना बुल
एक वेपारी छे, ने तेरा हात मां धुकान ताकड़ी छे; कुहराय करनु तीनाक गमे। एप्रेम कवे, “मे मातलु हंय गुयु, मे धन हात करलु छे; मारा काहना बी काम मां गलत नी देखायो तेरेसी पाप हवे।”3 मे यहोवा, मीस्र देसेम सी लायु ती सी तारु भगवान छे; मे तुसेक तम्बु मां असु वसाड़ीस, जसु ठेहरावला तीहवारेन दाहड़ा मां हया करे।4
मे भगवानेन अघी सी आवणे वाळी वात देखाड़न्यान साहरे सीकाड़पण आप्यु, ने अळी-अळीन सपनो देखाड़तु रयु; ने भगवानेन अघी सी आवणे वाळी वात देखाड़न्यान साहरे दाखलु कवतु आयु। काय गीलाद माणसे गुनाळा नी हय? चे पुरा पापी हंय गुयला छे। गीलगाल जागा मां बेलेन बादा चड़ावे, बाकुन तींद्री वेदी तीनु ढेरेन तसी छे, जे खेड़ला खेतम रवे तीना पाहळ्या धड़े छे।
याकुब अरामेन जागा मां ढासी गुयलु; चां ईस्रायेल्यु एक बायरी वाटे सेवा चाकरी कर्यु, ने बायर काजे आपसी घरवाळी बणावणे वाटे चु गुवाळी करतेलु।5 एक भगवानेन अघी सी आवणे वाळी वात देखाड़न्यान साहरे यहोवा ईस्रायेल काजे मीस्र देस मां सी नीकाळीन ली आयु, ने मुसान6 साहरे तेरी राखवाळी हंय।7 एप्रेम काजे बेसकी रीस देवाड़्या; तेरेमां तेरो करलो खुन तेरेत पर बणीन रवसे, ने चु आपसा भगवानेन नावे जे गुनु लागाड़ रया, चु तीनात काजे पछु आप देसे।
Source notes (7)
- Cross-reference उबजाणनी किताप 25:26; 32:24-26
- Cross-reference उबजाणनी किताप 28:12
- Cross-reference उजेंता बुले 3:17; लुका 12:16-21
- Cross-reference लेवयवेवस्था 23:42-43
- Cross-reference उबजाणनी किताप 29:1-20
- Footnote मुसान भगवानेन अघी सी आवणे वाळी वात देखाड़न्यु
- Cross-reference नीरगमन 3:7-10; वेवस्थावीवरन 18:15
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.