Bhilali Bible
होसे 13
ईस्रायेलेन आकरी नीयाव
जत्यार एप्रेम बुलतेलु, तत्यार माणसे कापतेला; ने चु ईस्रायेली मां मटु हतलु, बाकुन जत्यार चु बाल देवतान वजे सी गुनाळु हंय गुयु, ने तत्यार चु मर गुयु।1 हंय चे माणसे पाप पर पाप अदाड़ता जाय, ने आपसान अक्कल सी चांदी काजे गाळीन असी मुरती बणावे, जे मीस्तर्यान हाते बन्ली हतली। तींद्रा बारामां माणसे वात कवे, जु बादा चड़ावे चे केवड़्यान गुळा देय! हेरे वजे सी संदारेन वादळान उस्टान तसा, ने संदारे एगात पड़ला उस्टान टीपकान तसा अंछाप हंय जासे, चे खळा माय्न उडण्या चारान तसा, ने चिमनी सी नीकळने वाळा कुळ्ळान तसा उडी जासे।
मीस्र देस मां सी मे यहोवा, तारु भगवान छे; तु मेसेक छुड़ीन काहना काजे भगवान करीन घुण समजे, काहाकी मेसेक छुड़ीन काहनु बी तारु छुटकारु करन्यु नी हय। मे तीनी टेमे सी तुसेक जाणतेलु, जत्यार तु बयड़ा मां ने बेसका सुकला देस मां हतलु।2 बाकुन जत्यार ईस्रायेली माणसे काजे खाणो खावाड़्या, ने चे आफरी गुया, तत्यार आफरने पर हींद्रो मन मटाय सी भराय गुयो, हेरे वजे सी चे मेसेक ईसरी गुया। अळतेन मे हींद्रे वाटे नाहारेन तसु बण्यु; मे नाहारेन तसु तींद्री वाट मां डुकाय्न रय्स। मे पीला हापकली रीछड़ीन तसु बणीन तीनुक भेळु हयस, ने तींद्रा मनेन काळजा काजे फाड़ीस, ने चीतान तसु तीनुक चांत खाय जायस, जसा जंगल मां रवण्या जानवार्या तीनुक फाड़ीन खाय जाय।
ए ईस्रायेल, तारो नास हवणेन वजे जीत छे, की तु मारो मतलब आपसा मदत करन्यान वीरुद करन्यु छे। हंय तारु राजु कां छे? की तारा आखा सहर मां चु तुसेक बचाड़से? तारु नीयाव करन्यु कां छे, तेरे बारामां तु कह्यु, मार वाटे राजु ने राज-करन्यु ठेहराय दे?3 मे ते रीसवाय्न तार वाटे राजु बणायु, ने अळी रीसवाय गुयु, ने हीनुक छेटे बी कर देदु।4
एप्रेमेन भुंडात कामे गाठड़ा मां बांदायलु छे, तेरु पाप भेळु करलु छे। तीनाक पुर्या पयदा हवणेन तसो दुखसे, बाकुन चु डेड़-अकल्यु पुर्यु छे, चु पयदा हवणे मां टेम लागाड़े। मे तीनाक मोतेन कळी मां सी छुड़ाय लीस, ने मुत सी छुटकारु आपीस। ए मुत, तारी मारनेन ताकत कां रय? ए मुत, तारी नास करनेन ताकत छे?5 मे अळी कदी नी पसतायो। भले चु आपणा भाय सी अदुस फुले-फळे, तेबी वाहळी तेरे पर चालसे, ने यहोवा भीणी सी सुकली जागा सी आवसे, ने तेरो कुंड सुकसे; ने तेरो झीर ठारलो हंय जासे। तेरी मेकली आखी चीज चु लुट लेसे। सामरी राज गुनाळु छे, काहाकी चु आपसा भगवान सी लड़ाय कर्या; चे तलवार सी माराय जासे, तींद्रा पुर्याक भुयमां आस्टी देसे, ने चे भारीस बायरीन पेट चीर नाखसे।
Source notes (5)
- Cross-reference 2 राजा 17:16
- Cross-reference वेवस्थावीवरन 8:11-17
- Cross-reference 1 समुवेल 8:5,6
- Cross-reference 1 समुवेल 8:7; 10:17-24; 15:26
- Cross-reference यसाया 25:8; 1 कुरींथी 15:54
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.