होसे 14

होसेन ईस्‌रायेल सी लीलघाय

1ए ईस्‌रायेल, आपसा भगवान यहोवा धड़े पछु आवती रव, काहाकी तु आपसा भुंडला कामेन वजे सी ठुकर खादलु छे। 2वात सीकीन यहोवा भीणी आवीन, हीनाक कह्‌यु, “आखा भुंडला काम छेटे कर; गीण-दया सी हामु काजे ली ले; तत्‌यार हामु, तु बेसकु वारु छे करीन भेट चहड़ावसुन।1 3अस्‌सुर हामरु छुटकारु नी करे, ने हामु घुल्‌ला पर नी बठजे; ने नी आपणु अळी पछा आपणी बणावली चीज सी कवसुन, ‘तु हामरा भगवान छे;’ काहाकी पुरायला पर तुत दया करे।”

ईस्‌रायेली वाटे नवला जीवनेन भगवानेन वायदु

4यहोवा कवे, मे तीनुक भटक जाणेन,

आदत काजे छेटे करीस;

मे कायबी नी लम असुत तींद्‌रे सी परम करीस,

काहाकी मारी रीस तींद्‌रे पर सी उतरी गुय।

5मे ईस्‌रायेली माणसे वाटे उस्‌टान तसु रय्‌स;

चु सोसन झाड़कान तसु फुलसे-फलसे,

ने लबानोन झाड़कान तसु जड़ फेलावसे।

6तेरा जड़ मां सी झाड़कान डीरा फुटसे,

चो देखायणे मां जेतुन झाड़कान तसो रवसे,

ने चो लबानोन झाड़कान

तसो गंधाये।

7जे तेरा साहळा मां बठसे,

चे दाणान तसा अदसे;

चे अंगुरेन वाड़ीन तसा अदसे

ने तींद्‌रो काम लबानोन जागान अंगुरेन रसेन तसो रवसे।

8एप्‌रेम कवसे, “हीनु मुरती सी मारो काय काम छे?”

मे तेरी वात सामळीन तेरे पर नींगा नाखीन तेरी राखवाळी करीस।

मे नीळ्‌ळा सनोवर झाड़कान तसो छे;

मार सी तु फळ हात करसी।

नीचुड़

9जु अक्‌कल वाळु छे, चु ईनी वात काजे समजी जासे; जे समजदार हय, चु हीनुक समजी सकसे; काहाकी यहोवान वाट सुदली छे, ने धरमी तींद्‌रे मां चालता रवसे, बाकुन गुनाळा तींद्‌रे मां झटवायन हीट पड़से।2