Bhilali Bible
आमोस 1
आमोस एक तकोवा गांवेन रह्णे वाळु गाडरा-बुकड़ा चारने वाळा मां सी हतलु, तेरा जे बुल छे, जे तीना यहुदान उजीय्याह राजान, ने योवासेन पुर्यु ईस्रायेलेन राजु यारोबामेन दाहड़ा मां, धरती धुदड़ी तेरेसी दुय साल पेहेल, ईस्रायेली माणसेन बारामां सपनो देखीन कह्वे।1
यहोवा सीय्योन देस सी कुर्राटसे,
ने यरुसलेम सहर सी आपसी अवाज सामळावसे,
तत्यार गुवाळ्या चारनेन जागाम दुखी हवसे,
ने कर्मेल बयड़ु सुकी जासे।2
ईस्रायेली माणसे धड़े वाळा देसेन नीयाव
अराम
यहोवा असु कह्वे: “दमीस्क सहरेन तीन गुनावाळा, बाकुन च्यार गुनान वजे सी मे तेरु नीयाव करीन डंड आपीस, काहाकी चे गीलाद सहरेन परगाणान माणसे काजे दाणा मसण्या लुहड़ा सी रंदळी देदु।3 हेरेसी मे हजायेल राजान महल मां आक्ठो लागाड़ीन धपाड़दीस, ने चो आक्ठो धपाड़ीस बेन-हदादेन राजान किला काजे बी खत्तम कर देसे। मे दमीस्क सहरेन बायणा काजे तुड़ दीस, ने आवेन नावेन खुबारा मां रवणे वाळा काजे ने बेत-एदेन घर मां रवणे वाळा राज करन्याक नास कर दीस; ने अरामेन घराणान माणसे गुलामी मां हय्न कीर जागाम जात रवसे, यहोवान जी वात छे।”
पलीस्ती
यहोवा असु कह्वे: “गाजा सहर तीन काय, बाकुन च्यार गुनान वजे सी मे तेरु नीयाव करीन डंड नी छुड़ो; काहाकी चे आखा माणसे काजे गुलाम बणाय्न ली गुया, की तीनुक एदोम्या माणसेन हक मां कर देदा।4 हेरेसी मे गाजा सहरेन अवारकुट मां आक्ठो लागाड़ दीस, ने चो आक्ठो तेरा अवारकुट वाळा हवेल्याक भसम कर देसे। मे असदोद सहर मां रवणे वाळा माणसे काजे बी सार दीस ने असकलोन सहर मां राज-करन्या काजे बी नास कर दीस; मे एक्रोन सहर मां रवणे वाळाक बी डंड आपीस, ने बचला पलीस्ती माणसे बी सर जासे,” यहोवा भगवानेन जीत वात छे।
सुर
यहोवा कवे: “सुर सहरेन तीन काय मतलब चार गुनान वजे सी मे तेरु नीयाव करीन डंड नी छुड़ो; काहाकी चे आखा माणसे काजे बांदीन एदोमेन हक मां कर देदु, ने भायसेन तसी बुली काजे हेर नी कर्यु।5 मे सुर सहरेन अवारकुट मां आक्ठो लागाड़ दीस, ने चो आक्ठो तेरा हवेल्या काजे बी खत्तम कर देसे।”6
एदोम
यहोवा असु कवे: “एदोमेन तीन काय, बाकुन च्यार गुनान वजे सी मे तेरु नीयाव करीन डंड आपीस; काहाकी चु आपसा भायस काजे तलवार लीन पछळ पड़्यु, ने काय बी दया नी कर्यु, बाकुन रीस सी तीनुक दाहड़ीत फाड़तुत रह्यु, ने मारी रीस काजे जलमका दाहड़ा वाटे बणाय रयु। तेरेमां मे तेमान सहर मां आक्ठो लागाड़ दीस, ने चो आक्ठो बोस्रा सहरेन अवारकुट काजे धपाड़ देसे।”
अम्मोन
यहोवा असु कवे: “अम्मोन मां तीन काय, बाकुन च्यार गुनान वजे सी मे तेरु नीयाव करीन डंड नी छुड़ो, काहाकी चे तारी काकड़ काजे मटो कर लेणे सी गीलाद ईलाका माय्न भारीस बायरीन पेट काजे चीर देदु। तत्यार मे रब्बा सहरेन अवारकुट मां आक्ठो लागाड़ दीस, ने चो आक्ठो आखा अवारकुट काजे बी भसम कर देसे। तीना लड़ायन दाहड़ा मां बेसका माणसे आयड़से, ने चु आंधी ने भुत्यान दाहड़ु रवसे; ने तींद्रु राजु आपसा हकदार्या भेळु गुलाम बणी जासे,” यहोवान जीत वात छे।7
Source notes (7)
- Cross-reference 2 राजा 3:4; जकर्याह 14:5; 2 राजा 14:23
- Cross-reference योएल 3:16
- Cross-reference यसाया 17:1-3
- Cross-reference यसाया 14:29-31
- Cross-reference यसाया 23
- Cross-reference मत्ती 11:21-22; लुका 10:13,14
- Cross-reference यीरम्या 49:1,6
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.