Bhilali Bible
आमोस 2
मोआब
यहोवा असु कह्वे: “मे मोआब घराणान माणसे, ने एदोम घराणान राजान हाटका धपाड़ीन रखड़ु बणाय देदा; अळतेन मे, मोवाब घराणान माणसेक, ने तींद्रा बेसका पापेन साहरे तीनुक डंड आपीस।1 तेरेमां मे मोआब देस मां आक्ठो लागाड़ीस, ने चो आक्ठो करीय्योत सहरेन हवेल्या काजे खत्तम कर देसे; ने चां खुन खराबा मां मोवाब देस सर जासे ने तीनी टेमे फेपार्या वाजाड़से, ने माणसे कुर्राटता रवसे। मे तींद्रा ईचमां सी नीयाव करन्या काजे नास कर दीस, ने हंय तेरा आखा राज-करन्या काजे बी मार दीस,” यहोवान जत बुल छे।
यहुदा
यहोवा असु कह्वे: “यहुदान तीन काय, बाकुन च्यार गुनान वजे सी, मे तेरु नीयाव करीन डंड आपीस, काहाकी चे यहोवान कायदा काजे फालतु समज्या, ने मारा नेम कायदा काजे नी मान्या; बाकुन तीना-तीना देव-धाणीन पुजा-पाट तींद्रा आड़ा-बुड़ा करतेला; तीना-तीना झुटा देव-धाणीन पुजा-पाट करीन चे बी भुले पड़ गुया!2 तेरेमां मे यहुदा जीलाम आकठो लागाड़ दीस, ने यरुसलेम सहरेन अवारकुट वाळा कीला बी भसम हंय जासे।”3
ईस्रायेल पर भगवानेन नीयाव
यहोवा असु कवे: “ईस्रायेली घराणान माणसे काजे, चांदी वाटे बीन-गुनाळा माणसेक वेच देय; ने एक जुड़ी चाट्या भाव मां गरीब माणसेक वेच देय। अळतेन मे, ईस्रायलेन घराणान माणसेक, तींद्रा बेसका पापेन साहरे तीनुक डंड आपीस। चे ते जसा धरती पर धुळु रंदळे, तसात गरीबेन मुणको रंदळे। ने वेला पाड़ायलान एक बी नी सामळे बास ने बेटुस दुयु एकुत जुवान पुरे साते सवसार करे। असा करीन चे मारा चुखला नावेक ईटाळीन मारी नावबद्दी कर रया।4 चे ते आपसी देव-धाणीन मंदीर मां लुच्चाये डंड्ला रुप्यान, अंगुरेन रस पीये; ने गरीब धड़े गीरवे मेकला पुथल्या, वेदी धड़्ये आथरीन सुय जाय।5
“मे तींद्रे अगळ सी एमोरी राज्येन माणसे काजे नास करलु, ने तींद्री उचाई देवदार झाड़कान तसो, ने तींद्री ताकत बांज नावेन झाड़कान तसो हतलो, तेबी मे उपर सी तेरा फळ काजे, ने नेचु सी तेरा जड़ काजे नास कर्यु।6 मे तुहुं काजे मीस्र देस मां सी नीकाळ लायु, ने जंगल मां चाळीस साल लग लीन फीरतु रयु, की तुहुं एमोरी देस मां जागान हकदार्या हंय जावु। मे तुंद्रा पुर्या मां सी भगवानेन अघी सी आवणे वाळी वात बताड़न्या वाटे ने तुंद्रा थुड़ाक जुवान्या मां सी नाजीर7 हवणे वाटे ठेरावलु। ए ईस्रायेली माणसे, काय ज्य आखो छाचलो नी हय?” यहोवान जीत वात छे।8 बाकुन तुहुं नाजीर काजे अंगुरेन रस पाया, ने भगवानेन अघी सी आवणे वाळी वात बताड़न्या काजे हुकुम आप्या की भगवानेन अघी सी आवणे वाळी वात नी करे9। “देखु, मे तुहुं काजे असु दड़पीस, जसा पुळा सी भरली गाडी नेची दड़पाय जाय। तीनी टेमे छाटास दवड़ने वाळा काजे ढासणेन वाट नी जड़े, ने ताकत वाळा काजे आपसी ताकत काम नी देय; ने नी ताकत वाळु आपसा जीव काजे बचाड़ सके। तीनी टेमे धंद्ली चालाड़न्याक बी उभा नी रवाये, ने जुर्येत दवड़न्याक बी नी ढासाये; ने घुल्लान सवारी करन्यु बी आपसु जीव नी बचाड़ सके। ने वारु धंद्ली चालाड़ने वाळु बी आपसु सर छुड़ीन तीने दाहड़े नांगेरलु हय्न ढासी पड़से,” यहोवान जीत वात छे।
Source notes (9)
- Cross-reference यसाया 15—16
- Cross-reference लेवयवेवस्था 26:14
- Cross-reference होसे 8:14
- Cross-reference याकुब 1:6
- Cross-reference वेवस्थावीवरन 24:12-13
- Cross-reference वेवस्थावीवरन 3:8-11
- Footnote नाजीर मालीक यहोवा भगवान वाटे रात-दाहड़ु सेवा चाकरी करने वाळा माणसे, चे दाहड़ीन उपास पाळे, ने मुणकान कान्या नी काटाड़े, ने दारु नी पीये, ने मरला माणसेन धड़ काजे हात नी लागाड़े, ने अक्कल वाळु ने समजदार बणे।
- Cross-reference गिन्ती 6:1-8; वेवस्थावीवरन 18:18
- Cross-reference यसाया 30:10; नेवताळान काम 4:18
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.