आमोस 3

1ए ईस्‌रायेली माणसे, जो बुल सामळु, जु यहोवा तुंद्‌रे बारामां मतलब तीनु आखा घराणान बारामां कवलु छे, तीनुक मे मीस्‌र देस मां सी लावलु छे। 2“धरतीन आखा घराणा मां सी मे तुहुंक अतरुत नेवाड़ लेदु, हेरे वजे सी मे तुंद्‌रा आखा भुंडला काम सी डंड आपीस।”1

भगवानेन अघी सी आवणे वाळी वात बताड़न्‌यान काम

3“कदी दुय माणसे एक दीसरा पर राजी नी हवे, ती काय चे भेळा चाल सक्‌से?”

4काय नाहार सीकार हात करे पाखुर बयड़ा मां डकारसे काय?

काय जुवान नाहार काय धरे पाखुर आपसा दर मां सी डकारसे काय?

5काय चिरला जाळ लागाड़े पाखुर कसी फांदायसे?

काय जाळेम फांदाये पाखुर जाळ जागा पर कसी उछलसे?

6काय काहनाक बी सहर मां झुण्‌गा वाजाड़से ती माणसे थर-थर कापसे काय?

काय यहोवा मकले पाखुर काहना बी सहर मां काहनी बी गरा आवसे काय?2

7हीनी रीती सी मालीक यहोवा आपसा चाकर्‌या काजे अघी सी आवणे वाळी वात बताड़न्‌या पर आपसी उंडली वात उजेंतु करे पाखुर काय बी नी करसे काय?3

8जत्‌यार नाहार डकारसे ती; कुण नी बीहे?

तत्‌यार भगवान यहोवा कह्‌यु; कुण भगवानेन अघी सी आवणे वाळी वात नी करे?

सामरीया ईलाकान खत्‌तम हवणु

9असदोदेन कीला ने मीस्‌र देसेन राजान कीला मां परचार करु: “सामर्‌या बयड़ा पर भेळा हय्‌न सामळु की हेरे मां घणो मटो कुराटु ने तेरे ईचमां बेसको कुहराय्‌न काम हंय र्‌यो।”

10यहोवान जीत वात छे, “जे माणसे आपसा महल मां लड़ाय ने खुन-खराबु ने माणसे धन काजे भेळा कर रया, चे छाचाय सी काम करनु जाणेत नी।” 11अळतेन भगवान यहोवा असु कह्‌वे: “देस काजे घेरवणे वाळु एक वेरी रवसे, ने चु तारी ताकत तुड़ देसे, ने तारा कीला काजे लुट लेसे।”4

12यहोवा असु कह्‌वे: “हीनी रीते गुवाळ्‌यु नाहारेन मुंहडाम सी दुय पाय नीते कान्‌टान एक टुकड़ु छुड़ावसे, तसात ईस्‌रायेली माणसे, जे सामर्‌या मां आथेरनेन एक खुणे नीते रेसम्‌या गादी पर बठ्‌या करे, तीनुक बी छुड़ावसे देसे।”5 13सेनान भगवान, मालीक यहोवान जीत वात छे, “देखु, ने याकुबेन घरन्‌या काजे असा चेताड़ीन गवा देवु। 14तीनी टेमे मे ईस्‌रायेली माणसे काजे तेरा पापेन डंड आपीस, तीनी टेमे मे बेतेल सहर मां वेदी काजे खत्‌तम करीस, ने वेदीन सींगड़ा टुटीन धरती पर हीट पड़से।6 15मे सींगेन दाहड़ान घर काजे ने तपेन घर, दुयु काजे पाड़ीन; ने हातीन दात सजावलो घर ने मट्‌ला महल काजे बी नास कर दीस, यहोवान जीत वात छे।