Bhilali Bible
आमोस 4
“ए बासान सहरेन गावड़्या, सामरीया बयड़ा मां बायरा तुहुं जो बुल सामळु, जो गरीब माणसे पर कुहराय करे, ने पापी माणसे काजे कुचळी नाखे, ने हंय चे आपणा-आपणा घरवाळा सी कह्वु, ‘लावु, आपु, हामु पीजे।’1 भगवान यहोवा आपसु चुखली सगुन खाय्न असु कह्वे, देखु, तुंद्रे पर असा दाहड़ा आवणे वाळा छे, की तुहुं काटा सी, ने तुंद्री अवल्यात माछान गळ्या सी खेचाय जासे। तुहुं अवारकुटेन डुचा मां सी हय्न सुदी सट नीकळी जावु ने हेर्मोन बयड़ा भीणी नाखाय जासु,” यहोवान जीत वात छे।
डंड भुगतीन बी ईस्रायेली माणसे नी सुदर्या
“बेतेल सहर मां आवीन गुनु करु, ने गीलगाल सहर मां आवीन बेसका पाप करु; आपणु चड़ावु संदारे, ने आपसान दसवु वाटु हर तीसरे दाहड़े लीन आया करु। बेसकु वारु कय्न बादा खमीर भेसकीन चड़ावु करु, ने आपणी-आपणी मरजीन बादान वात चालाड़ीन तींद्रो परचार करु; काहाकी ए ईस्रायेली माणसे, असा करनु तुहुं काजे भावे,” भगवान यहोवान जीत वात छे।2
“मे ते तुंद्रा सहरे डीट काळ पाड़्यु, ने तुंद्रा आखा गांव मां बी, मे खाणान काळ पाड़्यु, तेबी तुहुं पाप भीणी कथा मन फेरवीन मारे भीणी नी वळ्या।” यहोवान जेत बुले छे। “जत्यार फसल काटणेन तीन महना रय गुया, तत्यार मे तुंद्रे वाटे पाणी नी पाड़्यु; मे एक सहर मां पाणी पाड़ीन दीसरा मां नी पाड़्यु; एक खेत मां पाणी पड़्यु, ने दीसरा खेत मां नी पड़्यु, चो सुक गुयो। जत्यार माणसेक पाणी पीणे करीन नी जड़्यो ती मार्या-मार्या फीरता जाय्न एकुत सहर मां आया, बाकुन आफर्या नी; तेबी तुहुं मार भीणी नी फीर्या,” यहोवान जीत वात छे।
“मे तुंद्रा खेतेन मेर काजे गरमी ने मट्ली बीमारी सी मार नाख्यु; ने जत्यार तुंद्री वाड़ी ने अंगुरेन वाड़ी, ने अंजीरेन ने जेतुनेन झाड़का बेसका हंय गुया, तत्यार टिड्डा तीनुक खाय गुया; ते बी तुहुं मार पछळ नी आया,” यहोवान जीत वात छे।3
“मे तुंद्रे ईचमां मीस्र देसेन तसी मट्ली बीमारी फेलायु; मे तुंद्रा हापेकला घुल्ला काजे ने तुंद्रा जुवान्या काजे बी तलवार सी माराड़ देदु, ने तुंद्रा पड़ावा धड़े गंद तुंद्रे धड़े आय; तेबी तुहुं मार भीणी वळीन नी आया,” यहोवान जीत वात छे।
“मे तुंद्रे मां सी काहनाक एक काजे असु उल्टो कर देदलु, जसा भगवान सदोम ने अमोरा सहर काजे उल्टो-फुल्टो कर देदु, ने तुहुं आक्ठा सी नीकळ्ला असा लाकड़ान तसा ठेहरे; तेबी तुहुं मार भीणी वळीन नी आया,” यहोवान जीत वात छे।4 “अळतेन, ए ईस्रायेल, मे तार सी असु करीस, ने हेरेसी की मे तारे मां जो काम करने वाळु छे, ए ईस्रायेल, आपसा भगवान अगळ आवणे वाटे तीयार हंय जां!”5
देखु, बयड़ा काजे बणावणे वाळु
ने वाहळा काजे बणावणे वाळु,
ने माणसे काजे तींद्रा मनेम वीच्यार काजे बताड़ने वाळु
ने ईजाळा सी आंदारो करनेवाळु,
ने जे धरतीन उंचा जागा पर चालने वाळु छे,
तेरो नाव सेनान भगवान छे।
Source notes (5)
- Cross-reference यसाया 3:16-24; 5:11-12
- Cross-reference मत्ती 6:2
- Cross-reference वेवस्थावीवरन 28:22
- Cross-reference उबजाणनी किताप 19:24
- Cross-reference मलाकी 3:2
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.