आमोस 5

पसतावु करनेन बुलावु

1ए ईस्‌रायेलेन घरन्‌या, ईना दुखेन गीतेन बुल सामळ! जो मे तुंद्‌रे बारामां कह्‌वो;

2“ईस्‌रायेल जुवान कुवारली पुरे हीट पड़ी,

ने अळतेन ची उठी नी सकी;

चु आपसान भुयमां आस्‌टी देदु,

ने तीनीक हाकलने वाळु कुय नी हतलु।”

3काहाकी भगवान यहोवा असु कवे: “तीना सहरेम सी हजार नीकळतेला, तेरेमां सी ईस्‌रायेलेन घरन्‌यान सोवुत बचला रवसे, ने तेरेमां सी सोव नीकळतेला, तींद्‌रे माय्‌न दस बचला रवसे।”

4यहोवा, ईस्‌रायेलेन घराणा सी असु कह्‌वे: मेसे हेरने लागु, तत्‌यार जीवतेला रवसे।1 5बेतेल सहर काजे हेरने मां घुण रह्‌वु, नी गीलगाल सहर मां भरायु, ने नी बेर्‌सेबा सहर मां जावु; काहाकी गीलगाल सहर पाक्‌कु गुलामी मां जासे, ने बेतेल सहर सुन्‌लो पड़लो रवसे। 2

6यहोवा काजे हेरु, ती तुहुं जीवतेला रवसु, नीते चे युसुफेन घराणा पर आक्‌ठान तसा पड़ने बाजी जासु, ने चु तीनुक धपाड़से, ने बेतेल मां तीनाक कुय उलवणे वाळु नी रवे। 7ए नीयाव काजे बीगाड़नेन वाळा ने वारलु काम काजे धुळा मां भेसकणे वाळा!

8जे तारा ने तारान बन्‌ली हयणी काजे बणावणे वाळु छे,

जे आंधरो खुय

काजे संदारेन ईजाळो बणावे,

तीनु दाहड़ा काजे आंदारो करीन रात बणाय देय,

ने दर्‌यान पाणी धरती

उपर उहवाड़ देय,

तेरो नाव यहोवा छे।3

9चु तत्‌यारुत ताकत वाळा काजे खत्‌तम कर देसे, ने कीला काजे बी उजाड़ नाखे।

10जे माणसे कुरट-कचवरी मां छाचाय सी नीयाव करे, तींद्‌रे पर तुहुं रीस करु; ने जे छाचली वात कवे, तींद्‌रे पर कुहराय करु।4 11तुहुं जे गरीब काजे रंदळु, ने भेट करीन तींद्‌रे धड़े अनेन फाळु जबराण ली लेवु, काहाकी जे घर तुहुं फाळु लेणेन कमाय सी घड़ला दगड़ान बणावला छे, तींद्‌रे मां रय नी सकु; ने जे मन काजे भावण्‌या अंगुरेन वाड़्‌या तुहुं लागाड़ला छे, तींद्‌रु अंगुरेन रस नी पी सकु। 12काहाकी मे जाणो की तुहुं कतरो मटो पाप करला छे, तुहुं खरला माणुस काजे वेला पाड़ु ने पयस्‌या मांगु, ने कमजुर माणसेक कुरट-कचवरीन बायणा धड़े सी ढासाड़ देवु। 13तेरेमां जे अक्‌कल वाळा हय, चे असी टेमे हुगा रवे, काहाकी जे भुंडला दाहड़ा छे।5

14ए माणसे, बुराय काजे नी, बाकुन भलाय काजे हेरु, काहाकी तुहुं जीवतेला रह्‌वु; ने तुंद्‌रो असो कवणु छाचलो ठेहरे की आखा सी ताकतवाळु भगवान तुंद्‌रे साते छे।6 15कुहराय सी रीस करु ने भलाय सी परम राखु, ने कुरट-कचवरीन बायणा पर नीयाव काजे बणाय्‌न राखु; काय मालुम आखा सी ताकतवाळु भगवान यहोवा युसुफेन बचला माणसे पर दया करे।

16हेरे वजे सी आखा सी ताकतवाळु, मालीक यहोवा भगवान असु कह्‌वे, “आखा चवराया पर रड़से ने-कलप्‌या करसे; ने आखी सयड़क मां माणसे हाय, हाय, करसे! चे किरसाण काजे दुख वाटे, ने जे माणसे दुख झेलने मां पाक्‌का छे, तीनुक रड़ने-कलपणे बुलावसे। 17ने आखी अंगुरेन वाड़ी मां रड़नु-कलपणु हवसे,” काहाकी यहोवा असु कवे, “मे तुंद्‌रे ईचमां डंड काजे लीन आवीस।”

18गरा आय पड़े तुंद्‌रे पर, तुहुं यहोवान दाहड़ाक हेर करु! यहोवान दाहड़ा सी तुंद्‌रो काय नफु हवसे? हयु ते ईजाळान दाहड़ु नी, बाकुन आंदारान दाहड़ु रवसे। 19जसु काहनुक नाहार काजे देखीन ढासे ने तीनाक रीछड़ो भेळो हवे! नीते घर मां आवीन भीतड़ा पर हात मेके ने घड़सु तीनाक झुल देय! 20काय जो छाचलीन छे, की यहोवान दाहड़ु ईजाळान दाहड़ु नी, बाकुन आंदारान ने दाहड़ु रवसे? हव, असो बेसको आंदारलो तेरेमां कांय बी ईजाळो नी हय।

21“मे तुंद्‌रा तीहवार सी कुहराय करो, ने तीनुक फालतु जाणो, ने तुंद्‌री मट्‌ली पंचु सी मे खुस नी हवो।7 22भले तुहुं मार वाटे आक्‌ठान बादा ने दाणान चड़ावु, चड़ावो, तेबी मे तुंद्‌रे सी खुस नी हवो, ने नी तुंद्‌रा पाळ्‌ळा जानवरेन मेलबादा भीणी नींगा नाखो। 23तुंद्‌रा गीतेन कचाटु मार सी छेटे करु; तुंद्‌रा रमथान बुल मे नी सामळो। 24बाकुन नीयाव काजे नदीन तसा, ने छाचाय काजे जलमकी उहणे वाळी नदीन तसो उहणे देवु।

25“ए ईस्‌रायेलेन घराणा, तुहुं सुनसान बयड़ा मां चाळीस साल तक जनवार्‌या चड़ावु ने दाणान चड़ावु काय मेसेक चड़ावता रया?8 26तुहुं हंय सीक्‌कुत्‌यान तीनु मुरतीक हामरु देवतु राजु करीन मान रया, ने तारा-मंडळीन देवता केवान मुरतीक आपसा वाटे घड़ रया, ने खांदा पर हाकलीन हींडी रया। तीनु देवताक तुंद्‌रा डाहा-डाहा तीनु दाहड़ाम खांदा पर हाकलीन हींड्‌ला काय? नी हींड्‌या, कदी नी। 27अळतेन मे तुहुंक धराड़ीन दमीस्‌क सहरेन पली पार दीसरा देसेम पुगाड़ दीस।” आखा सी ताकतवाळा यहोवान जीत वात छे।9