आमोस 6

ईस्‌रायेलेन नास हवणु

1गरा तीनु माणसे पर जे सीयोन बयड़ा पर सुख सी रवे, ने हींद्‌रे पर चे सामर्‌यान बयड़ा पर बे-फीकुर रवे, चे जे वारलु राज्‌य मां गीणाये, तींद्‌रे धड़े ईस्‌रायेलेन घराणा आवे। 2कलने सहर मां जाय्‌न देखु, ने चां सी हमात नावेन मट्‌ला सहर मां जावु; अळतेन पलीस्‌ती माणसेन गत सहर मां जावु। काय चे ईनु राज्‌य सी बड़ीन छे? काय तींद्‌रो राज्‌य तुंद्‌रा देस सी थुड़ोक मटो छे? 3तुहुं काठला दाहड़ा काजे छेटे कर देवु, ने लड़ाय झगड़ान राज्‌य काजे धड़े ली आवु। 4“तुहुं ते हाती दातेन बन्‌ला खाट्‌ला पर सुवु, ने आपणा-आपणा आथेरला पर पांय लांबा करीन सुवु, ने गाडरा ने बुकड़ा मां सी बळदा मां सी केवड़ा खावु। 5तुहुं रमथा साते गीत गावु, ने दावुदेन तसा भाती-भातीन वाजां अक्‌ल सी नीकाळु। 6ने कटेवरा मां सी अंगुरेन रस पीण्‌या नानला, ने वारु-वारु गंधायण्‌यो तेल लागाड़ु, बाकुन युसुफ पर आवणे वाळी गरान बारामां सामळीन दुख नी हवे। 7हेरे वजे सी चे हंय गुलामी मां सी पेहेल जासु, ने जे पाय फेलावीन सुवतेला, तींद्‌री मुजां-मस्‌ती जाती रवसे।”

8आखा सी ताकत वाळा यहोवा भगवानेन जेत बुल छे, यहोवा भगवान आपसुत सगुन खाय्‌न कह्‌यु : “तेरे पर याकुब मटाय करे, तीनाक मे रीस, ने तेरा राज घर सी कुहराय राखो; ने मे हीना सहर काजे तीना आखा भेळु तीना घर मां छे, तीनुक वेरीन हक मां कर दीस।”

9कदी काहनाक घर मां दस अदमी बचीन रवसे, तेबी चे मर जासे। 10जत्‌यार काहनाकेन काकु, जे तेरु धपाड़ने वाळा रवे, तीना हाटका काजे घर सी बाहार नीकाळने वाटे हाकलने, ने जे घरेन खुणा मां हंय तीनाक कवसे, “काय तारे धड़े कुय छे?”

तत्‌यार चु कवसे, “कुय बी नी हय।”

तत्‌यार चु कवसे, “हुगु रव! आपणु यहोवान नाव नी लेणु चाहजे।”

11काहाकी यहोवान हुकुम सी मटला घर मां डुचु, ने नानला घर मां दराड़ा रवसे। 12काय घुल्‌ला चापर्‌या पर दवड़से? काय समुदर मां बेल सी जुपे जां तुहुं माणसे नीयाव काजे जहर मां, ने धरमेन फळ काजे कड़वा फळ मां बदली देदु?

13तुहुं असली चीजेन वजे सी खुस हवु, जे फालतु छे; ने कहुं, “काय हामु आपणीत ताकत सी करनई सहर काजे नी जीत्‌या?”

14हेरे वजे सी आखा सी ताकत वाळा यहोवा भगवानेन जे बुल छे, “ए ईस्‌रायेलेन घरन्‌या, देख, मे तुंद्‌रे मां सी एक असो राज्‌य उभो करीस, जु हमातेन घाटी सी लागाड़ीन अराबान नदी लग तुहुं काजे गरा मां नाखसे।”