Bhilali Bible
आमोस 7
नास हवणेन टिड्डान सपनो
यहोवा मे भगवान सेक जो देखाड़्यु। ने मे काय देखो की, तीना पेहला चारान उंगणेन सुरु मां टिड्डा पयदा कर्यु; ने चु राजु काटणेन पछेन पछलु चारु हतलु। जत्यार टिड्डा चारु खाय लेदलां, तत्यार मे कह्यु, “ए यहोवा भगवान, माफ कर! नीते याकुब कसु टेकलु रय सके? चु कतरु लुलु छे!”1
हेरे बारामां यहोवा भगवान आपसान मन बदल्यु ने चु कह्यु, “असी वात हंय नी हवे।”2
आक्ठान सपनो
भगवान यहोवा मेसेक असो सपनो देखाड़्यु, ने काय देखो की यहोवा भगवान आक्ठा सी नीयाव लड़ने करीन आयड़्यु, ने तीना आख्ठा सी एक मटली समुदर सुक गुई, ने देस बी खत्तम हवणे बाजी रवलु। तत्यार मे कह्यु, “ए यहोवा भगवान, हुबु रय जां! नीते याकुब कसु काठु रय सकसे? चु बेसकु लुलु छे।”
हेरे बारामां बी यहोवा भगवान मन बदल्यु; ने यहोवा भगवान कह्यु, “असली वात अळी नी हवे।”
सावळेन सपनो
चु मेसेक ज बी देखाड़्यु। मे देख्यु की मालीक सावळ लागाड़ीन बणावली काहनाक भीतड़ा पर उबु हंय रयु, ने तारा हात मां सावळ छे।3 यहोवा मेसेक कह्यु, “ए आमोस, तुसे काय देखाव पड़े?”
मे कह्यु, “एक सावळ।” तत्यार भगवान कह्यु,
“देख, मे मारा ईस्रायली माणसेन ईचमां हंय्न मे तीनुक सावळ लागाड़ीन डंड आपे पाखुर नी छुड़ो। इसाक उचली वेदीक उजाड़ दीस, ने ईस्रायेलेन चुखली जागा सुन्ली हंय जासे, ने मे यारोबामेन घरन्या पर तलवार लीन जाय्न लड़ाय करीस।”4
आमोसेन ने अमस्या
तत्यार बेतेलेन पुजारा अमस्या ईस्रायेलेन माणसेन राजा यारोबाम धड़े कय मकल्यु, “आमोस ईस्रायेली माणसेन घराणा मां तार सी राजेन वीरुद मां मुजगी करला छे, तेरा आखा बुले काजे देस सेण नी कर सके।5 काहाकी आमोस असु कवे, ‘यारोबाम तलवार सी माराय जासे, ने ईस्रायेल आपसा जागा पर सी जरुड़ गुलामी मां जासे।’”
तत्यार अमस्या आमोस काजे कह्यु, “ए भगवानेन अघली वात बताड़न्या, जां सी नीकळीन यहुदा देस मां जाती रव, ने चांहात रुटा खाया करजी, ने चांहात भगवानेन अघी सी आवणे वाळी वात कया करजी करे; बाकुन बेतेल सहर मां अळी कदी भगवानेन अघी सी आवणे वाळी वात घुण करे, काहाकी जां राजान चुखली जागा ने राज-सहर6 छे।”7
आमोस जपाप आपीन अमस्या काजे कह्यु, “मे नीते भगवानेन अघी सी आवणे वाळी वात बताड़न्यु हतलु, ने नी भगवानेन अघी सी आवणे वाळी वात बताड़न्यान पुर्यु, मे ते गुवाळ्यु हतलु, ने गुलरेन झाड़का काजे नेवाड़ने वाळु हतलु।8 ने यहोवा भगवान मेसेक गाडरा-बुकड़ान पछळ-पछळ जाणे सी बुलाय्न कह्यु, ‘जां, मारा माणसे ईस्रायेली सी भगवानेन अघी सी आवणे वाळी वात कव।’ हेरसी हंय तु यहोवा बुल सामळ, तु कवे, ‘ईस्रायेलेन वीरुद मां भगवानेन अघी सी आवणे वाळी वात मां करे; ने इसाकेन घरन्यान वीरुद मां अळी-अळीन बुल मां सामळावे।’ हेरे वजेसी यहोवा असु कवे: ‘तारी बायरी सहर मां रंडी बण जासे, ने तारा पुर्या पारी तलवार सी माराय जासे, ने तारी जागा दुयड़ा सी मापीन वाट लेसे; ने तु आपसुत दीसरान देस मां मरसी, ने ईस्रायेल आपसा जागा पर सी जरुड़ गुलामी मां जासे।’”
Source notes (8)
- Cross-reference यीरम्या 18:20
- Cross-reference योएल 1:4
- Cross-reference यसाया 30:13; दुखेन गीत 2:8
- Cross-reference 2 राजा 15:10
- Cross-reference 2 राजा 14:23
- Footnote राज-सहर मतलब भगवानेन मंदीर
- Cross-reference आमोस 2:12
- Cross-reference आमोस 1:1; 3:8; 2 राजा 2:5; जकर्याह 13:5
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.