आमोस 8

फळ सी भरली चारलीन सपनो

1यहोवा भगवान मेसेक सपनो देखाड़्‌यु, की गरमीन सीजन मां पाकला फळेन एक भरली चारली छे। 2चु मेसेक कह्‌यु, “ए आमोस, तुसेक काय देखाव पड़े?”

मे कह्‌यु, “गरमीन सीजन मां पाकला फळ सी भरली एक चारली छे।”

तत्‌यार यहोवा भगवान मेसेक कह्‌यु, “मारा माणसे ईस्‌रायेलेन नास हवणु आय गुयो; हंय मे तीनाक डंड आपीन नी छुड़ो।”1 3यहोवा भगवानेन जीत वात छे, “तीने दाहड़े मंदीरेन गीत दुख मां बदली जासे, ने मरला माणसेन धड़ेन मट्‌लो ढेर लागसे; ने आखी जागाम मुतेन वात पुग जासे।”

ईस्‌रायेलेन नास हवणु

4जी वात सामळु, तुहुं गरीब माणसे काजे मार नाखु ने देसेन नीचळा माणसे काजे नास करने हींड रया। 5चे कह्‌वे, “नवलु चांद कत्‌यार हवसे की हामु दाणा वेच सकजे? आरामेन दाहड़ु कत्‌यार हवसे, की हामु दाणा काजे कणगी खुलीन एपा नाप काजे नानु ने सेकेल नाप काजे भारो कर देजे, ने धुका सी माणसे काजे ठगु।2 6बाकुन हामु गरीब माणसे काजे पयस्‌या आपीन, ने कसरायला काजे एक जुड़ी खासड़ा आपीन मुल ली लेजे, ने सुळायला दाणा काजे वेच देवु?”

7यहोवा, तेरे पर याकुब काजे मटाय करनु वारु छे, चु आपसी सगुन खाय्‌न कह्‌यु, “मे तुंद्‌रा काहना बी काम काजे कदी नी ईसरो। 8काय हेरे वजे सी धरती नी धुदड़े? काय तींद्‌रे पर आखा रवणे वाळा दुखी नी करे? ज्‌य देस आखा की आखा मीस्‌र देसेन नीळ नदीन तसो हवसे, जे अदुस बड़े, ने झलक बेसकी उछळे ने कम हंय जाय।”3 9यहोवा भगवानेन जीत वात छे, “तीनी टेमे दाहड़ा काजे खयारले दाहड़े डुबाड़ीस, ने ईना देस मां खयारले दाहड़े आंदारो कर दीस।4 10मे तुंद्‌रा तीह्‌वारेन खुसी काजे छेटे करीन दुखी कराड़ीस, ने तुंद्‌रा आखा गीते काजे छेटे करीन ठुसकणेन गीत गावाड़ीस; मे तुहुं आखान कमर मां गंटाट्‌यो बांदाड़ीस, ने तुहुं आखान मुणकान कान्‌या काजे काटाड़ीस, ने असो दुख झेलाड़ीस जसों एकुत पुर्‌या वाटे करे, ने तेरो आकरी काठो दुख दाहड़ान तसो हवसे।”5

11यहोवा भगवानेन जीत वात छे, “देखु, असा दाहड़ा आवणे बाजी र्‌या, जत्‌यार मे ईना देस मां महंगो करीस; तीना देस मां नीते दाणा, ने भुक लागे ने नी पीस लागसे, बाकुन यहोवा भगवानेन बुल सामळने वाटे जलमेन भुक ने पीस लागसे।”6 12यहोवा भगवानेन बुल सामळने माणसे ईना दर्‌या सी पला दर्‌या लक ने ईनी जागे सी पली जागे लग अथान-अथा डंडवायता फीरसे, बाकुन तीनाक चे नी सामळी सके। 13“तीनी टेमे वारु कुवारली पुरे ने जुवान अदमी दुयु पीसला मर जासे। 14जे माणसे सामरी राजेन माणसेन आसीमा देवतान सगुन खावु, ने चे कवे, ‘दानेन देवतान जीवनेन सगुन, ने बेर्‌सेबा देवतान सगुन,’ चे आखा खत्‌तम हंय जासे, ने अळी कदी हुबा नी हंय सके।”