आमोस 9

ईस्‌रायेलेन नीयाव

1मे मालीक काजे वेदी उपर उबु हंय रवलु देख्‌यु, ने चु कह्‌यु, “खाम्‌बान चोटी पर दे तेरेसी डेहळी हालसे, ने तीनुक आखा माणसेन मुणका पर नाखीन टुकड़ा-टुकड़ा कर; ने ज्‌य नास हवणे सी बचे, तीनुक मे तलवार सी मारीस; तींद्‌रे मां सी एक बी नी ढासी सके, ने जु आपसा काजे बचाड़से, चु बी नी बची सके।” 2“काहाकी भले चे खुदीन मरलान कळ मां उतरी जाय1, ती चां सी मे हात अगु करीन तीनुक लावीस, भले चे सरग पर चहड़ी जाय, ती चां सी मे तीनुक नीकाळ लावीस।2 3भले चे कर्‌मेल बयड़ाम डुकाय जाम, बाकुन चां बी मे तीनुक हेरी-हेरीन धर लीस, ने भले चे उंडला दर्‌यान बुंदा मां मारा डुळा अगळ सी डुकाय्‌न जाती रवसे, चां मे बी घड़सा काजे झुलनेन हुकुम आपीस।3 4भले वेरी तीनुक हाकलीन गुलामी मां ली जाय, चां बी मे हुकुम आपीन तलवार सी तीनुक माराड़ दीस; ने मे तींद्‌रे पर भलाय करने वाटे नी हय, कुहराय करने करीन नींगा करीस।”

5आखा सी ताकत वाळा यहोवा भगवानेन छीमणे सी धरती पीगळी जासे,

ने तेरा आखा रवणे वाळा दुखी हवसे;

ने चे आखा की आखा मीस्‌र देसेन नदीन तसा हंय जाय,

जे मटा ने झलक बेसकी अथीन-अथी आफटाये, ने कम हंय जाय।

6जु सरग मां आपसा उपर घर बणावे,

ने आपसा सरग मंडळी नेवु धरती पर नाखे,

ने दर्‌यान पाणी धरती पर उहाड़ देय,

तेरो नाव यहोवा छे।

7“ए ईस्‌रायेल,” यहोवा भगवानेन जेत बुल छे, “काय तुहुं मार वाटे कुस्‌या देसेन तसु नी हवे? काय मे ईस्‌रायेली माणसे काजे मीस्‌र देस मां सी ने पलीस्‌ती माणसे काजे कप्‌तोर देस मां सी नी नीकाळ लायु। ने अरामी माणसे काजे कीर देसे मां सी नी नीकाळीन लायु। 8देखु, यहोवा भगवानेन नींगा ईना पापेन राज पर लागी गुई, ने मे हीना काजे धरती पर सी नास करीस; मे पुरी रीत सी याकुबेन घरन्‌या काजे खत्‌तम नी करो,” यहोवा जत बुल छे।

9“मारा हुकुम सी ईस्‌रायेलेन घरन्‌या आखा राज्‌य मां असा जाती रवसे, जसा तुहुं चाळनी सी गहुं काजे ने काकरा काजे छांणु, ‘बाकुन हेरु एक बी पेढलु दाणु धरती पर नी पड़े।’ 10मारा माणसे मां सी आखा पापी माणसे जो कवे, ‘ची गरा हामरे पर नी आवे, ने नी हामुक घेरवसे,’ चे आखा तलवार सी माराय जासे।4

ईस्‌रायेल काजे फीर सी वसाड़णु

11“तीनी टेमे मे दावुदेन उदरली खपड़ी काजे उबु करीस, ने तीनी वाड़ीन नाका काजे सुदारीस, ने तीना उदरला भीतड़ा काजे अळी पछु बणावीस, ने जसु चु पेहला जमाना मां हतलु, तीनाक तसुत बणाय दीस।5 12तेरेसी चे बचला एदोम काजे ने आखा माणसे काजे जे मारा कह्‌वाये, तेरा हक मां ली लेसे,” यहोवा भगवान ज्‌य काम पुरो करे, तेरी जीत वात छे।6

13यहोवा भगवानेन जीत वात छे, देखु,

“असा दाहड़ा आवणे बाजी र्‌या,

की हळ गेरने वाळु काटणे वाळा काजे,

ने अंगुर रंधळने वाळा बीज एरने वाळान आवणी पुरी बी नी हवसे,

ने बयड़ाम सी नवला अंगुरेन रस टपकसे, ने आखा बयड़ाम सी उहीन जासे।7

14मे मारा माणसे ईस्‌रायेली काजे पछु ली आवीस,

ने चे उजड़ला सहर काजे सुदारीन तींद्‌रा सहर मां वसी जासे;

चे अंगुरेन वाड़ी लागाड़ीन अंगुरेन रस पीसे,

ने वाड़ी लागाड़ीन तींद्‌रा फळ खासे।8

15मे तीनुक, तींद्‌रीत जागा मां वेरीस,

ने चे आपणी जागा मां सी जो मे तीनुक आपलु छे,

अळी कदी उखाळी नी सके,” तुंद्‌रा यहोवा भगवानेन जीत वात छे।