Bhilali Bible
उबजाणनी किताप 48
याकुबेन साहरे एप्रेम ने मनस्से काजे संयबरकत आपणु
थुड़ाक दाहड़ा मां काहनुस युसुफेन चां खबर लायु की, तारु बास मांदलु छे। ती युसुफ आपसा दुय पुर्या मनेस्या ने एप्रेम काजे पुठी लीन आपसा बासेन चां गुयु। ती काहनुस याकुब काजे कह्यु, “तारु बेटु युसुफ तारेन चां आवणे बाजी र्यु।” ती इस्राएल्यु खाटलात मां वार जुर लागाड़ीन बठु हय्न बठ ज्यु। याकुब, युसुफ काजे कह्यु, “कनान देस मां लुज नावेन सहर मां, आखाम जुर भर्यु भगवान मेसेक उजेंतु देखाव पड़लु, ने मेसेक संयबरकत आपलु। ने कहलु, मे तारा घराणान वेल वदाड़ीस, ने तुसेक आखा देसेन जातीन जड़-मुळ बणावीस, ने तारा माणसे ईना देस पर जलम हक जमाड़्ला रवसे।”
ने हंय तारा जे दुय पुर्या, जे मीसर देस मां मेसेक आवणेन पेहले पयदा हवला; चे मारात पुर्या कहवायसे, मतलब जसा रुबेन ने सीमोन मारा पुर्या छे, तसात एप्रेम ने मनेस्यु बी, मारात पुर्या कवायसे। ने ईनु दुयु काजे छुड़ीन दीसरी जी तारी अवल्यात हवसे, ची तारी अवल्यात ते कह्वायसे; बाकुन वाटा पाड़नेन टेमे तींद्रु आंग्ये वाटु नी पड़े; बाकुन ईनु दुय भायसेन वाटात मां तींद्रु बी वाटु रवसे। जत्यार मे पद्दनराम मां सी एपराता सहर मां आवणे बाजी रहलु, ती तार आय्स राहेली वाट्येत कनान देस मां एपराता पुगणेन ईतरीक वार पेहलुत मारे अगळ मर गुय; ने मे तीनीत वाट्ये धड़े तीनी काजे गाड़ीन वगे कर देदु।
जो कहणे बाजी रहलु ती इस्राएल्या काजे युसुफेन पुर्या देखाव पड़्या, ती इस्राएल्यु पुछ्यु, “जे कुण छे?”
युसुफ आपसा बास इस्राएल्या काजे कह्यु, “जे मारा पुर्या छे। ने भगवान मेसेक आपलु छे।”
इस्राएल्यु, युसुफ काजे कह्यु, “तारा पुर्या काजे मारेन्चां लाव। ने मे हीनुक संयबरकत आपीस।” इस्राएल्या काजे डाहवारा मां धुंधळो देखायतेलो, ने अतरो बी की तीनाक कांही बी वारुस उळखायतेलो नी। तत्यार युसुफ आपसा पुर्या काजे इस्राएल्यान चां ली ज्यु; ने इस्राएल्यु तीनु काजे गुळु दीन बाथलायु। तत्यार इस्राएल्यु युसुफ काजे कह्यु, “मे तुसेक देखणेन आस छुड़ देदलु, बाकुन भगवान मारे पर गीण कर्यु, ने मे तुसेक बी ने तारा पुर्याक बी देख र्यु।” अळतेन युसुफ तेरा पुर्याक याकुबेन खुळा मां सी छेटा कर लेदु, ने अळतेन चु युसुफ आपसा बासेक ढंगु वळीन वांद्यु कर्यु।
युसुफ आपसा नानला पुर्या एप्रेम काजे इस्राएल्यान डाखर्या हातेन चां ली ज्यु ने आपसा मटला पुर्या मनेस्या काजे इस्राएल्यान जेवड़्या हातेन चां ली ज्यु। बाकुन इस्राएल्यु हात आटवीन जेवड़्यु हात नानला पुर्या एप्रेम पर मेक्यु, ने डाखर्यु हात मटला पुर्या मनेस्या पर मेक्यु। अळतेन इस्राएल्यु युसुफ काजे संयबरकत आपीन कह्यु,
जीना भगवानेन आपणा आड़ा-बुड़ा अब्राहम, ने इसाक भक्ती करला,
हयुत भगवान, मारे पयदा हवणे ती सी हंय लग गुवाळ्यु बण्यु।
जु भगवान आपसु सरगेवाळु चाकर्यु मकलीन मेसेक आखी कुहराय सी बचाड़्यु,
हंय हीयुत भगवान ईनु पुर्या काजे संयबरकत आपे करीन: हंय जे पुर्या मारा ने मारा आड़ा-बुड़ा अब्राहम ने इसाकेन अवल्यात कहवायसे।
आखी धरती पर हींद्री अवल्यातेन वेल वद्या करे करीन।
याकुब आपसु जेवड़्यु हात युसुफेन नानला पुर्या एप्रेमेन मुणका पर मेकी रहलु, जो देखीन युसुफ काजे वारु नी लाग्यो; तेरेमां युसुफ आपसा बासेन जेवड़्यु हात एप्रेमेन मुणका पर सी हेड़ाय्न, मनेस्यान मुणका पर मेकाड़नेन वीच्यार सी धर लेदु। ने युसुफ आपसा बास काजे कह्यु, “ए बाबा, आपसु जेवड़्यु हात मनेस्यान मुणका पर मेक; काहाकी पेहेल-खुळ्यु जुत छे।”
बाकुन युसुफेन बास युसुफ काजे कह्यु, “बेटा, मेसेक मालम छे की, मट्लु मनेस्यु छे, ने चु मट्लु बणसे। चु बेसका माणसेन डाहलु-बाबु बणसे। बाकुन नानलु भायस एप्रेम मटला सी मटु बणसे, ने ईना नानलान घराणो मटलान घराणा सी बेसका हय जासे। ने जु बेसका जातीन बास बण जासे।”
असु करीन तीने दाहड़े इस्राएल्यु युसुफेन पुर्या काजे असी संयबरकत आप्यु, “इस्राएली जातीन माणसे तुहुंं दुयु काजे नावलीन संयबरकत आपसे, ने तुंद्रे वाटे संयबरकत हात करसे। माणसे असी संयबरकत आप्या करसे: भगवान तुहुंंक एप्रेमेन ने मनेस्यान तसा बणावसे।” ने इस्राएल्यु एप्रेम काजे मनेस्या सी मटु गीण्यु।
अळतेन इस्राएल्यु युसुफ काजे कह्यु, “सामळ, मे मरनेवाळु छे, बाकुन भगवान तुंद्रे पुठ्ये रवसे, ने तुहुंंक कनान देस मां पछु ली जासे, जो आपणा आड़ा-बुड़ान देस छे। मे तारा आखा भायसे काजे ततरी जागा आपलु, तीनी जागा सी एक हीस्सु वदु मतलब पली बयड़ा वाळी जागा1 बी तुसेक आपो। जी जागा मे तलवार ने धंदलीन भुरसे एमोरीया जातीन माणसे साते लड़ाय करीन तींद्रे धड़े सी हापकी लेदलु।”
Source notes (1)
- Footnote सकेम जागान नाव
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.