Bhilali Bible
उबजाणनी किताप 37
युसुफ सपना देखे
याकुब ते कनान देस मां रवतेलु, जां तेरु बास पारकु बणीन रवतेलु। याकुबेन अवल्यातेन वाराम: जत्यार युसुफ सतरे सालेन हतलु, ती चु आपसा बासेन दीसरा बायरा बील्हा ने जील्पान पुर्या पुठ्ये रय्न गाडरा ने बुकड़ा चार्या करतेलु; ने तींद्री कुहराय्न खबर आपसा बास याकुबेन चां पुगाड़्या करतेलु।
इस्राएल आपसा आखा पुर्या अदुस युसुफ सी परम राखतेलु, काहाकी चु तेरा डाहवारान पुर्यु हतलु: ने चु तेर वाटे वारु रंग वाळो झगल्यो बणाव्लु। युसुफेन भायस देख्या की, हामरु बास हामरे सी कम परम करे, बाकुन युसुफ काजे वदु परम करे, ती चे युसुफ पर कुहरायणे बाजी गुया, ने तेरे साते वारुस वात बी नी करतेला।
युसुफ एक सपनो देख्यु, ने आपसा भाय काजे तेर बारामां बताड़्यु; तत्यार चे तेर सी अळी बी अदुस रीस करने बाजी ज्यु। चु तीनाक कह्यु, “जो सपनो देख्यु चो सामळ: आपणु आखा खेतेम पुळा बांदणे बाजी रहला, ने मारु पुळु सुदु-सट उबु हय ज्यु, तत्यार तुंद्रा ग्यारे पुळा आवीन मारा पुळाक च्यारे-मेर घेरवीन उबा हय ज्या, ने नेचा वळीन पाये पड़ने बाजी ज्या।”
तत्यार युसुफेन भायस, युसुफ काजे कह्या, “तु छाचली, हामरे पर राज करीन हक जमाड़सी काय?” ने चे सपनान ने तेरी वाते सी, वदुस तेरे पर कुहराय करने बाजी ज्या।
अळतेन हयु एक अळी सपनो देख्यु, ने आपसा भाय काजे चो सामळायु, “सामळ, मे एक अळी सपनो देख्यु, की दाहड़ु ने चांद ने ग्यारे तारा मारे पाये पड़े।” युसुफ आपसा बासेक बी ईना सपनान वाराम कह्यु, बाकुन तेरु बास तीनाक लड़ीन कह्यु, “जो असलो-कसो सपनो छे? छाचलीन मे, ने तारी आय्स ने तारा भायस, हामु आखा तुंद्रे पाये पड़सुन काय?” तेरा भाय तेर सी रीस करतेला, बाकुन तेरु बास तेरा बुले काजे हेर राख्यु।1
युसुफ काजे एचणे
तेरा भायस आपसा बासेन गाडरा-बुकड़ा चारने करीन सकेम सहर मां गुया। तत्यार इस्राएल युसुफ सी कह्यु, “तारा भायस सकेम सहर मात गाडरा-बुकड़ा चारता हसे। तेरेमां जा, मे तुसे तींद्रे धड़े मकलो।”
चु तीनुक कह्यु, “हव मे तीयार छे।”
चु तीनाक कह्यु, “जा तु आपणा भायस ने गाडरा बुकड़ा काजे देखीन आव की चे कसा छे, ने खबर लीन आव।”
तेरेमां तीनाक चु हेबरोन घाटी लग मेकीन आयु, ने चु सकेम सहर मां आयु। ने एक माणुस तीनाक खयड़ा मां अथुन-अथु फीरतु देखाव पड़्यु तीनाक पुछ्यु, “तु काय हेरे?”
चु कह्यु, “मे मारा भायस काजे हेरो। मेसे काजे बताड़ की चे गाडरा-बुकड़ा कां चारने बाजी र्या?”
चु माणुस कह्यु, “चे बेसकी वारुन जां सी जाती र्या। ने मे तीनुक असा कवतेला सामेळ्ळु की, चालु आपणु दोतान सहर भीणी खयड़ा मां जाजे।” अळतेन युसुफ सकेम सहर खयड़ाम सी, दोतान सहरेन खयड़ा मां गुयु, ने आपसा भायसेक हेर लेदु। युसुफेन भायस, युसुफ काजे गुलामी कराड़ने करीन वेच देदा।
जसु नी चे हीनाक देख्या, ती तेर धड़े आवणे सी पेहेल तीनाक मार नाखणेन मुजगी कर्या। ने चे भेळा हयन कहणे लाग्या, “देखु, हयु सपनो देखणे वाळु आवणे बाजी र्यु। ने चालु, आपणु हीनाक मारीन काहानास खाडा मां नाख देता। ने आपणा बास काजे कय देसु की, काहनोस जंगली जानवर्यो तीनाक खाय गुयो हसे। अळतेन आपणु देखसु की, हेरा सपना कसा पुरा हवतेला?”
असु सामळीन रुबेन तीनाक तींद्रे हात सी बचाड़नेन वीच्यार सी कह्यु, “हामु तेरु जीवेक नी मारजे।” रुबेन अळी आपसा भायसेक कह्यु, “हीनाक घुण मारता, बाकुन बयड़ान मटला खाडा मां जीवत्लु नाख देजु।” रुबेन ते असु वीच्यार कर रहलु की, “मे हीनाक छुड़वीन बासेन चां पुगाड़ दीस।” तेरेमां असो हयो की जत्यार युसुफ आपसा भायस धड़े गुयु तत्यार चे तीनाक वारु रंगेन झगल्यो पेहरावलो हतलो तीनाक नीकाळ देदा। ने युसुफ काजे ली जाय्न खाडा मां नाख देदा, चु खाडु सुकलु हतलु ने तेरेम काय बी पाणी नी हतलो।
युसुफ उंड्ला खाडात मां हतलु, तत्यार तेरा भायस खाणे बस्या। ने चे खाता-खाता छेटेत नींगा कर्या, ती तीनु काजे एक वेपारीन टुळु आवतेलु देखाव पड़्यु। जे वेपार्या माणसे इस्माएली जातीन हतला। जे ईसमा-एल्यान अवल्यात कह्वाये। जे वेपारी बेसका भातीन गंदायण्यो तेल, बाम-मलम, ने गंदरस उटड़ा पर झेलाड़ीन गीलाद मुलुक मां सी मीसर देसेम ली जाणे बाजी रहला।
तत्यार यहुदा आपसा भायस सी कह्यु, “आपणा भायस काजे मारीन ने तींद्रो खुन ढाकणे सी काय फायदु हवसे?2 आवु, आपणु हीनाक इस्माएलीन हाते वेच देजे, ने आपणु तीना पर हात नी लागाड़जे; काहाकी हयु आपणु भाय ने आपणात खुनेन छे।” ने चे तेरी वात सामळी लेदा। तत्यार मीद्यानी लेण-देण करने वाळु तींखुर आवीन तींद्रे धड़े आयु। तेरेमां युसुफेन भायस तीना गड्डा मां सी नीकाळ्या, ने इस्माएलीन माणसे काजे चांदीन वीस टका मां वेच देदा; ने चे युसुफ काजे मीसर देस मां ली ज्या।3
रुबेन गड्डा पर आवीन देख्यु ती युसुफ गड्डा मां नी हतलु; तेरेमां हयु आपसान पुथल्या फाड़्यु, ने आपसा भाय धड़े आवीन कहणे लाग्यु, “पुर्यु ते नी हय; हंय मे कां जाम?”
तत्यार चे युसुफेन झगल्या काजे लेदा ने एक बुकड़ा काजे मारीन तेरा खुन मां बुळवी देदा। अळतेन चे, चो झगल्यो ली जाय्न आपसा बासेक देखाड़ीन कह्या, “हामु काजे जो झगल्यो जड़लो छे, चो युसुफेन झगल्यो छे काय?”
हयु तीनाक उळखी लेदु ने कह्यु, “हव, जो मारात पुर्यान झगल्यो छे; काहनोक जंगली जानवर्यो हीनाक खाय ज्यो; ने छाचलीन युसुफ खावाय ज्यु हसे।” तत्यार याकुब आपसान पुथल्या फाड़्यु ने कमर मां टाटड़ो एळट्यु, ने आपसा पुर्या वाटे बेसका दाहड़ा लग रड़तु रह्यु। ने याकुबेन पुर्या बेसका दाहड़ा लग तीनाक हुगु राखणे कर्या; बाकुन चु हुगु नी रह्यु; ने चु असुत कवतु रह्यु, “मे ते मारा पुर्यान फीकुर मां मरता लग रड़तु कलेपतु रय्स।” करीन युसुफेन बास रड़तुत रह्यु।
ने मीद्या माणसे युसुफ काजे मीसर देस ली जाय्न पोतीपर नावेन फीरोनेन एक आफसर ने कीलान राखवाळी करन्यान हाते वेच देदा।
Source notes (3)
- Cross-reference नेवताळान काम 7:9
- Cross-reference उबजाणनी किताप 4:10; अय्युब 16:18
- Cross-reference नेवताळान काम 7:9
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.