Bhilali Bible
उबजाणनी किताप 36
एसावेन अवल्यात
(1 ईतीहास 1:34-37)
एसाव जीनाक एदोम बी कवाये, तेरी जी अवल्यात छे। एसाव ते कनानी पुरे सी ईयाव कर्यु; मतलब हीत्ती एलोनेन पुरे आदा काजे, ने आहलीबामा काजे जे अनान पुरे ने हीव्वी सीबोनेन पुरे हतली।1 अळतेन हयु इस्माएलेन पुरे बासमत काजे बी, जो नबायोतेन बहणीस हतली तेरे सी ईयाव करनु कर लेदु।2 आदा सी एसाव सी एलीपज काजे, ने बासमत ने रुएल पयदा हया। ने आहलीबामा ने युस, ने यालाम, ने कोरह पयदा हया। एसावेन जेत पुर्या कनान देस मां हया।
तत्यार एसाव आपसी घरवाळीक ने पुर्या पारी, ने घरेन आखा जानवर्या, ने गाडरा बुकड़ा, ने गावड़ी बेल ने आखा पाळन्या जानवर्या, आखो माल धन काजे, जो कनान देस मां कमाय करलु, आखाक लीन आपसा भाय याकुब सी छेटु दीसरा देस मां जाती र्यु काहाकी तींद्रो माल धन अतरो हय गुयलो की भेळो नी कर सके, ने जानवर्या बी बेसका तीना देस मां हवणे सी, जीना देस मां पारका बणीन रवतेला चां समाय नी सकतेला। एसाव जु एदोम बी कहवाये, सेईर नावेन बयड़ा वाळा देस मां रहणे लाग्यु।
सेईर नावेन बयड़ा वाळा देस मां रहणे वाळा एदोम पेहलु माणुस एसावेन अवल्यात जी छे। एसावेन पुर्यान नावे जे छे; मतलब एसावेन घरवाळी आदान पुर्यु एलीपज, ने तीनात एसावेन घरवाळी बासमत पुर्यु रुएल। एलीपजेन जे पुर्या हया, मतलब तेमान, ओमर, सपो, गाताम, ने कनज। एसावेन पुर्यु एलीपजेन तीम्ना नावेन एक पावरनी हतली, जी एलीपज सी अमालेक पयदा हया; एसावेन घरवाळी आदा अवल्यात मां जेत हया। रुएलेन जे पुर्या हया: मतलब नहत, जेरह, समा ने मीज्जा: एसावेन घरवाळी बासमतेन अवल्यात जेत छे।
एसाव्यान लाडी आहलीबामान जे पुर्या पयदा हवला: युस, यालाम ने कोरह। जी आहलीबामा सीबोनेन पुर्या अनानेन पुरे हतली।
एसाव्यायेन डाहला जे हतला; मतलब एसावेन जेठु एलीपजेन अवल्यात मां सी तेमान, ओमर, सपो, ने कनज मुखी, कोरह, गाताम, अमालेक: एलीपजेन अवल्यात मां सी। एदोम देस मां जेत मुख्या रह्या: ने जेत आदान अवल्यात हया।
एसाव्यान पुर्या रुएल्यान अवल्यात मां पयदा हवणी जातीन मुखी जे हतला: नहत मुखी, जेरह मुखी, समा मुखी, ने मीज्जा मुखी। जे आखा एदोम देस मां एसाव्यान लाडी बासमती सी पयदा हया।
अनानेन पुरे एसाव्यान लाडी आहलीबामान अवल्यात मां पयदा हवणी जातीन मुखी जे हतला: युस मुखी, यालाम मुखी, कोरह मुखी। जे आखा आपसी-आपसी जातीन मुखी हतला। एसाव जु एदोम बी कहवाये, तेरा अवल्यात जेत छे, ने तींद्रा मुख्या बी जेत हया।
सेईरेन खानदानी
(1 ईतीहास 1:38-42)
सेईर जो होरी नावेन जातीन हतला, तेरा जे पुर्या तीना देस मां पेहलुत सी रवतेला: लोतान, सोबाल, सीबोन, अना, दीसोन, एसेर, ने दीसान: एदोम देस मां, सेईर घरन्या होरी जातीन मुख्या हया।
लोतानेन पुर्या, होरी ने हेमाम हया; ने लोतानेन बहणीस तीम्ना हतली।
सोबालेन जे पुर्या हया: आल्वान, मानहात, एबाल, सपो, ने ओनाम।
ने सीबोनेन पुर्या जेत हतला: अय्यु, ने ओन्यु; ईना ओन्या काजे आपसा बास जीबोन्यान गदड़ा चारने बाजी रहलु, तीने टेमे तात्ला पाणीन झीरे जड़ला। अनान दीसोन नावेन पुर्या हया, ने तीनात अनानेन आहलीबामा नावेन पुरे हय। दीसोनने जे पुर्या हया: हेमदान, एसबान, यीत्रान, ने करान।
एसेरेन जे पुर्या हया: बील्हान, जाबान, ने अकान। 3
दीसानेन जे पुर्या हया: उस, ने अरान।
होरीयान जे मुख्या हया: लोतान, सोबाल, सीबोन, अना, दीसोन, एसेर, दीसान; सेईर देस मां होरी जातीन माणसे जेत मुख्या छे।
एदोमेन राजु
(1 ईतीहास 1:43-54)
अळतेन जत्यार इस्राएली माणसे पर काहनु बी राजु राज नी कर्यु, तत्यार बी एदोमेन देस मां जेत राजा हतला; बोरेन पुर्यु बेला एदोम मां राज कर्यु, ने तेरी राजधानीन नाव दीन्हाबा छे। बेलान मरनेन पछेन, बोस्रा मां रहण्या जेरह पुर्यु योबाब तेर जागा पर राजु बण्यु। योबाब मर ज्यु ती तेमानी जातीन माणसेन देसेन रहण्या हुसाम तेर जागा पर राजु बण्यु। हुसाम मर ज्यु, ने अळतेन तेरा जागा पर बदद पुर्यु हादाद्यु राजा बण्यु। जु हदद, मीद्यानी जातीन माणसे काजे मोआब देस मां मार नाखलु, ने तीनुक जीत लेदलु। ईना होदाद्यान राजधानी अबीत सहर मां हतली। हदद मर ज्यु ती मस्रेन रहण्या सम्ला तेर जागा पर राजु बण्यु। अळतेन सम्ला मर ज्यु ती सावुल जु मट्ली नदीन धड़े वाळा रहोबोत सहरेन हतलु चु तेर जागा पर राजु बण्यु। सावुल मर ज्यु ती अकबोरेन पुर्यु बालहान तेर जागा पर राजु बण्यु। जत्यार अकबोरेन पुर्यु, बालहान मर ज्यु, ती तेरे जागे हदाद्यु राजा बण्यु। तेरा राजवाड़ान नाव पावु हतलो। हादार्म अनसारे तींद्रा नावे जेत छे; ने तेरी लाडीन नाव महेतबेल छे, ची मेजाहाबेन पुर्यान पुरेन मत्रेदेन पुरे हतली। अळतेन एसावेन घरनान मुख्यान घराणा, ने जागान अनसारे तींद्रा नाव जे छे, तीम्ना मुख्यु, अल्बा मुख्यु, यतेत मुख्यु, आहलीबामा मुख्यु, एला मुख्यु, पीनोन मुख्यु, कनज मुख्यु, तेमान मुख्यु, मीब्सार मुख्यु, मग्दीएल मुख्यु, ईराम मुख्यु ने एदोम अवल्यात जे आपसान देस बणाय लेदला, तीना रहणेन जागा मां तींद्रात मुख्या बण्या, एदोमी जातीन पेहलु माणुस एसाव छे।
Source notes (3)
- Cross-reference उबजाणनी किताप 26:34
- Cross-reference उबजाणनी किताप 28:9
- Cross-reference ईब्रानीयो 11:9; उबजाणनी किताप 13:18
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.