Bhilali Bible
उबजाणनी किताप 3
माणसे हुकुम तुड़े
यहोवा भगवान जत्रा जंगली जानवर्या बणावलु, तीनु आखाम सी घड़सु कदर्यु हतलु, ने चु तीनी बायर काजे कह्यु, “तुहुंं वाड़ीम काहना बी झाड़कान फळ घुण खाजु।” करीन भगवान तुहुंंक छाचलीन कह्लु काय?1
ची बायर घड़साक कय, “वाड़ीन झाड़कान फळ ते हामु खाय सकजे। बाकुन वाड़ीन ईचमां वाळा झाड़कान फळेन बारामां भगवान असु कह्लु की, तुहुंं तीना झाड़कान फळ ईतरोक बी घुण खाजु। ने तीनाक छीमु बी घुण करु, नीते तुहुंं मर जासु।”
तत्यार घड़सु तीनी बायर काजे कह्यु, “तुहुंं छाचलीन नी मरु! भगवान काजे मालुम छे की, तीने दाहड़े तुहुंं ईना फळ काजे खासु, तीनेत दाहड़े तुंद्रा डुळा उघड़ी जासे, ने तुहुंंक भलायन ने कुहराय्न अक्कल जड़ जासे, ने भगवानेन तसा बण जासु।”
कुहर्या घड़सान वात सामळीन बायर तीना झाड़का भीणी देखी: ती तीनीक चो झाड़को बेसको वारु देखाये। तीनीक असो लाग्यो ईना झाड़कान फळ ते खाणे वाटे वारु सवादो लाग्से, ने अक्कल जड़से करीन वारु रवसे। अळी ची तीना झाड़कान फळ तुड़ीन खादी, ने तेरा घरवाळाक बी देदी ने चु बी खादु। तत्यार तीनु दुयु जणान डुळा उघड़ी गुया, ने तीनुक मालुम पड़्यो की, आपणु पुथल्या पेहरला नी हय, ने चे अंजीर नावेन झाड़कान पान्टा तुड़ी तुड़ीन आपसा वाटे कुस्टी बणाय लेदा।
सांती वेळाय चे सामळ्या की यहोवा भगवान बगीचा मां फीरतेलु, ती चे तीनाक देखीन झाड़का मां डुकाय ज्या। तत्यार यहोवा भगवान आयड़ीन आदम काजे पुछ्यु, “तु कां छे?”
चु कह्यु, “वाड़ी मां तुसेक आवतेलु सामळीन मे बीहीन डुकाय गुयलु, काहाकी मेसेक मालुम पड़ गुयलो की, मे पुथल्या नी पेहरी र्यु।”
तत्यार भगवान असु पुछ्यु, “तुसेक कुण कह्यो की, तु पुथल्या पेहरलु नी हय? मे तुसेक तीना झाड़कान फळ घुण खाजी कह्लु, तीना झाड़कान फळ तु खादलु काय?”
आदम असु कह्यु, तु हीनी बायर काजे बणायन। मार वाटे लावलु चीत बायर तीनु झाड़कान फळ खाणे करीन मेसेक आपी ने मे खाय लेदु।
तत्यार यहोवा भगवान मेसेक असु कह्यु तु ज काय कर्यु?
ची बायर असी कय घड़सु मेसेक ठगीन खावाड़्यु ने मे खाय लेदी।2
भगवानेन नीयाव
तत्यार यहोवा भगवान घड़साक असु कह्यु, “तु असु कर्यु करीन तु आखा पाळन्या ने जंगली जानवर्या सी अदु गरा वाळु छे; तु पेटेन भुरसे चालसी, ने मरता लग धुळु चाट्या करसी। ने तु ने बायर आंबा-सांबा लड़ाय करसु ने अळी तारी अवल्यात ने हीनी बायरीन अवल्यात बी आंबा-सांबा लड़ाय करसे बायरीन अवल्यात जे पयदा हवसे चे तारा मुणका काजे छुन्दसे ने तु तींद्री अड़ी काजे चावसी।”
बाकुन बायरी काजे भगवान असु कह्यु, “मे तारो दुख ने तारा पुर्या पयदा हवसे तत्यार तारा दुख काजे बेसकु बड़ावीस; तु दुख झेलीन पुर्या पयदा करसी; ने तारी हर घरवाळा भीणी रवसे, ने चु तार पर हक जमाड़से।”
अळतेन भगवान आदम काजे कह्यु, “मे पेहलुत हुकुम आपीन कहलु की, तु तीना झाड़कान फळ घुण खाय, तेबी तु तारी बायरीन वात मानीन तीना झाड़कान फळ खाय लेदु,ने धरती तार वाटे गरा वाळी छे। ने तु मरता लग हेरेम काठी कमाय करीन खाणो खाया करसी। जी धरती तार वाटे काटाळस्या ने घाड़स्या उगाड़से। तेबी, तु खेतेन कमाय मां सी खाया करसी। तु खाणा वाटे काठी कमाय करीन उबाय जासी। ने असु काम करतु-करतु तु मर जासी। मे तुसेक धुळाम सी घड़लु, ने धुळात मां तु भेसकाय जासी।”
ने आदम असु वीच्यार्यु, ने अळी चु आपसी बायरीन नाव हवा पाड़्यु; काहाकी जी ते धरती पर रहण्या आखा जीवतेला माणसेन माय बणसे। ने यहोवा भगवान आदम ने तेरी बायर काजे चामड़ान पुथल्या पेहराय देदु।
आदम ने हवा काजे वाड़ी मां सी नीकाळनु
तत्यार यहोवा भगवान कह्यु, “देख, जु माणुस भलाय ने कुहरायन अक्कल आपण्या झाड़कान फळ खायन हामरे माय्न एक जणान तसु हय गुयलु छे, कांखुर माय्न असो नी हय जाय की, जु आपसे हाते करीन जीवाय्न झाड़कान फळ तुड़ीन खाय लेय ने असु करीन चु जलम करता गुनाळुत जीवतेलु रय जाय।” हेरेसी यहोवा भगवान तीनाक धुळाम सी बणावलु, तीना धुळा मां खेती मां कमाय करने करीन तीनाक अदन मुलुकेन वाड़ीम सी बायर भेळु बाहर मकली देदु। यहोवा भगवान तीनाक बाहर मकली देदु, ने जीवाय्न झाड़कान राखवाळी करने करीन अदन मुलुकेन वाड़ी मां करुब टुळान आपसा बेसका राखवाळ्या काजे ने झाड़कान च्यारे-मेर फीरनी हळो-हळो धपतेली तलवार काजे मेल देदु।
Source notes (2)
- Cross-reference उजेंता बुले 12:9
- Cross-reference रोमीयो 7:11
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.