Bhilali Bible
उबजाणनी किताप 2
सातवे दाहड़े आराम कर्यु
असु करीन भगवान सरग, ने धरतीम जो काय तेरेमां छे, चो आखो बणायु। 1 भगवान, आपसो जो काम करने बाजी रहलु, तीना काम काजे पुरो करीन सातवे दाहड़े रीकामु हयु, ने सातवे दाहड़े आराम कर्यु।2 तत्यार भगवान सातवे दाहड़ाक संयबरकतेन चुखलु दाहड़ु कहीन तीनाक नक्खी कर्यु, काहाकी तीने दाहड़े, चु कळीक घड़नेन आखा कामे करीन नवराय्न आराम करलु। 3
सरगे ने धरती बणावणेन हवली वात जी छे,
अदनेन वाड़ी
जत्यार कळ घड़ाय मतलब जीने दाहड़े यहोवा भगवान कळी काजे बणावणे बाजी गुयलु। तत्यार धरती पर काहनो बी बीज, झाड़को नी उंगयो, ने खेत मां बी कायनी उंगयो काहाकी यहोवा भगवान धरती पर पाणी नी पाड़्यु ने धरती पर खेती करने वाटे काहनो माणुस बी नी हतलो। तेबी धरतीम सी कुहरो नीकळीन आवतेलु ती चु आखी धरती काजे भींजवी देतलु।4
ती यहोवा भगवान माणुस काजे धरतीन धुळा सी बणायु, ने तेरा नाक मां जीवनेन दम फुक देदु। ने माणुस एक जीवतेला डीलेन जीव बण गुयु।5
अळी यहोवा भगवान उगेवणु अदन मुलुक मां एक वाड़ी लागाड़्यु, ने यहोवा भगवान तीना माणुस काजे बणायु तीना काजे तीनी वाड़ी मां मेल देदु। ने यहोवा भगवान आखी भातीन झाड़का ने देखणे मां वारु तींद्रा फळ खाणे मां वारु हतला, धरतीम सी तीनी वाड़ी मां बणायु ने वाड़ीन ईचमां दुय खास झाड़का बी बणायु, एक झाड़कान फळ जलमेन जीवाय आपण्यो हतलो ने दीसरा झाड़कान फळ भलायन ने कुहरायन अक्कल आपण्यो हतलो।6
तीनी वाड़ी काजे रेलवणे करीन एक अदन सी नीकळीन एक नदी हतली ची नदी तीनी वाड़ीम वाटायन चार नानला नद्या बण गुया।7 पेहली नदीन नाव पीसोन छे; जी हयीत छे जी हवीला नावेन आखा देस काजे जाहा सी सोनो जड़े, तीना काजे घेरला छे। तीना देसेन सनो चुखलो रहे; चां मोती ने सुलेमानेन दगड़ा बी जड़े। दीसरी नदीन नाव गीहोन छे, जे आखा कुस देस काजे घेरवी रय। ने तीसरी नदीन नाव हीदकेल छे; जी असीरीया सहरेन उगवणी रवे। चोवथी नदीन नाव फरात छे।
ने यहोवा भगवान आदम काजे तेरो नाव बी आदम हतलो तीनाक वाड़ीन राखवाळी करने करीन ने चां काम करने करीन अदन वाड़ी मां मेल्लु। ने यहोवा भगवान तीना आदम काजे असु कय्न हुकुम आपलु: “तु वाड़ी माय्न काहना बी झाड़कान फळ बेफीकर्यु खाय सके। बाकुन तीना झाड़कान फळ घुण खावु, जेरो फळ भलाय ने कुहराय्न अक्कल आपण्यो छे; काहाकी जीने दाहड़े तु तीना फळ काजे खासी, तीनेत दाहड़े, तु छाचलीन मर जासी।”
अळतेन यहोवा भगवान कह्यु, “आदम काजे एखलु रहणु वारु नी हय। मे एरे वाटे, एरे साते मेळ खाय ने एरी सात देय, तसों जुड़ो घड़ीस।” 8 ने यहोवा भगवान धरतीम सी उबजाड़ला आखा जानवर्या काजे ने सरगेन आखा चिरला काजे नाव पाड़ावणे करीन आदम धड़े लायु। ने आदम बाबु तींद्रा जे-जे नावे पाड़्यु, तींद्रा चेत नावे पड़ ज्या। तसों करीन चु आखा जीव-जानवर्यान नावे पाड़्यु; ने आदम आखा घर पाळन्या जानवर्यान, ने आखा जानवर्यान, ने सरगेम उडण्या चिरलान, नावे पाड़्यु, बाकुन तीनु आखा जानवर्या मां आदम काजे, तेरे साते मेळ खाय ने तेरी सात देय असो, काहनो बी जुड़ो नी जड़्यो।
ने यहोवा भगवान आदम काजे मटी नीदे सुवाड़ देदु, ने चु तेरी एक पासळी नीकाळ लेदु, ने जां सी पासळी नीकाळ्ळु, चां वाळु घाव पछु भर देदु।9 तत्यार यहोवा भगवान आदम मां सी जी पासळी नीकाळ्ळु तीनी पासळी सी एक बायर काजे घड़्यु, ने तीनीक आदम धड़े लायु।10 आदम तेर भीणी एक-हेट्यु भाळीन कह्यु,
जी ते मारेन तसीत देखाये,
मारा हाटका मां सी नीकाळ्ळो हाटकत छे, ने मास मां सी नीकाळ्ळो मासुत छे।
ने छाचलीन जी धेणीम सी नीकाळ्ळी छे, तेरेमां जी बायर कवायसे।
तेरेमां अदमी आपसा आस्या-बास्या सी आंग्ये हय्न, आपसी बायरी पुठ्ये भगवान सी जुड़ाय्न रवसे; ने चे दुयु एक डील बण जासे।11
आदम ने तेरी बायर वाड़ी मां हतला ने तींद्रा डील पर पुथल्या बी नी हतला, तेबी चे सरमायतेला नी।
Source notes (11)
- Cross-reference नीरगमन 20:11; ईब्रानीयो 4:4,10
- Cross-reference ईब्रानीयो 4:4,10
- Cross-reference नीरगमन 20:11
- Footnote यहोवा बुल, ज्य बुल हीब्रु रीती भाती सी लेदलो छे
- Cross-reference 1 कुरींथी 15:45
- Cross-reference उजेंता बुले 2:7; 22:14
- Cross-reference उजेंता बुले 22:2
- Cross-reference 1 कुरींथी 11:9
- Cross-reference 1 कुरींथी 11:8
- Cross-reference 1 तीमुथीयुस 2:13
- Cross-reference मरकुस 10:7,8; ईफीसीयो 5:31
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.