Bhilali Bible
उबजाणनी किताप 12
भगवान अब्राम काजे बुलावे
अळतेन यहोवा भगवान अब्राम सी कह्यु, आपसा देसेक ने बासेन घर ने आखा तारा रीस्ता वाळा काजे छुड़ीन पला देस मां जाती रव, जो मे तुसेक देखाड़ीस। मे तार सी एक मट्ली जाती बणावीस, मे तुहुंंक संयबरकत आपीस; मे तुंद्रो नाव मटो करीस, ने तुहुंं संयबरकतेन जड़ बण जासु।
जे तुहुंंक संयबरकत देसे,
मे तीनुक संयबरकत दीस ने जे तुहुंंक सराप देसे,
मे तीनुक सराप दीस तुंद्रे सी धरतीन आखा माणसे संयबरकत काजे हात करसे।
तेरेमां यहोवा भगवानेन हुकुम सी अब्राम चाल पड़्यु, लुत बी तेरे भेळे गुयु, जत्यार अब्राम हारान देस सी नीकळ्यु तत्यार हयु सतत्र ने पांच सालेन हतलु। अब्राम भेळे तेरी घरवाळी सारे ने तेरु भतरजुस लुत, आखो माल धन ने आखा जानवर्या बी हारान देस मां हेरा हतला,
आखो काय लीन कनान देस मां जाणे करीन नीकळ्यु ने चे कनान देस मां आय ज्या।1 चां सी अब्राम चुखलु सकेम मां मोरेन चुखलो बांज नावेन झाड़कान चां पुग ज्या, तीने टेमे तीना कनान देस मां कनानी माणसे रवतेला। यहोवा भगवान अब्राम काजे देखाव पड़्यु ने कह्यु, “तुंद्री अवल्यात काजे जो देस आपीस।” तत्यार अब्राम तीना जागा पर अब्राम वाटे जु हीनाक देखाव पड़्लु, तेरे वाटे एक चड़ावान जागु बणायु।2 पछेन अब्राम चां सी बेतेल उगण मां बयड़ा भीणी गुया ने चांत हयु तम्बु उबु कर्यु, चां सी बुडण मां बेते-एल ने उंगण मां आय नावेन सहर हतलो, अब्राम चां यहोवा भगवान वाटे चड़ावान जागु बणायु ने भगवान काजे आंध्यु। अळतेन चां कथु अब्राम दखणाव नेगेव जीला भीणी चाल पड़्यु।
अब्राम मीसरे देस मां जाय
तीना देस मां काळ पड़्यु, तत्यार अब्राम थुड़ाक दाहड़ा वाटे दखणाव भीणी मीसर देस मां रहणे करीन जाती र्यु, काहाकी तींद्रा देस मां बेसकु काळ पड़ रहलु। जत्यार चे मीसर देस धड़े पुग्या, तत्यार अब्राम आपसी घरवाळी सारे काजे कह्यु, सामळ, मेसे मालम छे की तु बेसकी वारु बायर छे। जत्यार मीसर देसेन माणसेक मालम हय जासे की तु मारी घरवाळी छे, ती चे मेसेक मार नाखसे, ने तुसेक जीवतेली राख लेसे। तेरेमां असी कवजी, मे हेरी बहणीस छे काहाकी तार वजे सी मारो भलो हवे ने मारु जीव तार वजे सी बची जासे। पछेन असो हयो की जत्यार अब्राम मीसर देस मां आयु, तत्यार मीसर मां रहण्या माणसे तेरी घरवाळीक देख्या की जी ते बेसकी वारु देखाये। ने मीसर देसेन फीरोन राजा सीपायड़ा तीनी सारा काजे देखीन फीरोन राजा अगळ तीनीक बड़ाय कर देदा ने तीनीक फीरोन राजान हवेली मां पुगाड़ देदा। ने फीरोन तेर वजे सी अब्रामेन भलाय कर्यु ने तीनाक गाडरा-बुकड़ा, गावड़ी-बेल, गदड़ा-गदड़ी, उटड़ा ने पावर-पावरनी बी देदु।
तेरेमां यहोवा भगवान फीरोन ने तेरा घरन्या पर अब्रामेन घरवाळी सारेन वजे सी मटी-मटी हीड़ा-पीड़ा नाख्यु। तेरेमां फीरोन राजा अब्राम काजे बुलायन कह्यु, “तु मारे साते असो काय कर्यु? तु मारे सी जी वात साताड़ीन काहा राख्यु की जी मारी घरवाळी छे? तु असो काहा कह्यु की जी मारी बहणीस छे? तेरेमां मे ईनीक मारी घरवाळी बणावणे करीन मारा हवेली मां राख्यु। तेरेमां हंय तुहुंं ईनीक जां सी लीन जाती रव।” तत्यार फीरोन आपसा सीपायड़ाक अब्राम बारामां हुकुम देदु ने चे अब्राम काजे हेरी घरवाळीक ने तेरो आखो धन ने आखो काय लीन मकली देदा।
Source notes (2)
- Cross-reference नेवताळान काम 7:4; ईब्रानीयो 11:8
- Cross-reference गलातीयो 3:16; नेवताळान काम 7:5
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.