Bhilali Bible
उबजाणनी किताप 11
बुली मां गड़बड़ी
पेहले आखी धरती पर एकुत बुल ने बुली हतली। तीने टेमे माणसे उगेवणा चालता-चालता सीनार नावेन देस मां एक जागु देखीन चां वस ज्या। चे भेळा हय्न कहणे लाग्या, “आपणु आखा हय्न वार ईटड़ा बणाय्न आकठा मां पाकाड़जे।” च दगड़ान जागा पर धुळान गारा काजे काम मां लेदा। ने चे कह्या, “आवु आपणु आपणे वाटे एक सहर ने मुंडेवरी बणावजे ने मुंडवरी अतरु उचु बणावजे, की सरगे लग जाती रवजे, काहाकी आपणु आपणो नाव कमायजे ने असो नी हवे की आपणु काजे आखी धरती पर खवळाय्णु पड़े।”
जत्यार माणसे सहर ने मुंडेवरी बणावणे लाग्या, तत्यार ईनाक देखणे करीन यहोवा भगवान उतरी आयु। ती यहोवा भगवान वीच्यार्यु, ईनु माणसेन एक्कु छे, ने हींद्री एकुत बुली छे, ने हंय अगा बी असात काम करसे, ती हींद्रे वाटे काहनो बी काम काठो नी रवसे। तेरेमां हामु हींद्री बुली मां गरबड़ी नाख देजे, काहाकी जे एक दीसरान बुली काजे समज नी सके। ने यहोवा भगवान तसु करीन, चां सी आखी धरती पर खळवी देदु, ने चे तीना सहरेक बणावणु छुड़ देदा। तेरेमां ईना जागान नाव बेबीलोन पड़्यो, काहाकी ईनात जागा पर यहोवा भगवान बुली मां गरबड़ी नाखलु, ने ईनात जागा सी तीनुक आखी धरती पर खळवी देदु।
सेमेन खानदानी
सेम्यान अवल्यात जी छे। मुसळ धार्या पाणीन दुय साल पछेन ओरपोकसोद्यान पयदावारी हय तत्यार सेम्यु सोव सालेन हतलु। ओरपोकसोद्यान पयदावारीन पछेन सेम्यु पांच सोव साल अळी जीयु, ने तेरा अळी बी पुर्या-पारी हया।
जत्यार ओरपोकसोद्यु तीस ने पांच सालेन हयु, तत्यार सेलहन पयदावारी हय। सेलहन पयदावारीन पछेन मां ओरपोकसोद्यु च्यार सोव तीन साल अळी जीयु, ने अळी बी तेरा पुर्या-पारी हया।
जत्यार सेलहन तीस साल हया, तत्यार एबरनेन पयदावारी हय। एबरनेन पयदावारीन पछेन सेलह च्यार सोव तीन साल अळी जीयु, ने तेरा अळी बी पुर्या-पारी पयदा हया।
जत्यार एबर तीस ने च्यार सालेन हयु, तत्यार पेलेग्यान पयदावारी हय। पेलेग्यान पयदावारीन पछेन एबर च्यार सोव तीस साल अळी जीयु, ने तेरा अळी बी पुर्या-पारी हया।
जत्यार पेलेग्यु तीस सालेन हयु, तत्यार रेवान पयदावारी हय। रेवान पयदावारीन पछेन पेलेग्यु दुय सोव ने नव साल अळी जीयु, ने तेरा अळी बी पुर्या-पारी हया।
जत्यार रेवान तीस ने दुय सालेन हयु, तत्यार सेरुग्यान पयदावारी हय। सेरुग्यान पयदावारी पछेन रेवान दुय सोव ने सात साल अळी जीयु, ने तेरा अळी बी पुर्या-पारी हया।
जत्यार सेरुग तीस सालेन हयु, तत्यार नाहोरेन पयदावारी हय। नाहोरेन पयदावारीन पछेन सेरुग्यु दुय साल अळी जीयु, ने तेरा अळी बी पुर्या-पारी पयदा हया।
जत्यार नाहोर वीस ने नव सालेन हयु, तेरायान पयदावारी हय। तेरायान पयदावारीन पछेन नाहोर एक सोव ने गुन्नीस साल अळी जीयु ने तेरा अळी बी पुर्या-पारी हया।
ने तेरायान सतत्र साल हवणेन पेहलुत तेरा पुर्या अब्राम, नाहोर ने हारानेन पयदावारी हय।
तेरेन खानदानी
तेरायान अवल्यात जी छे: तेरायु अब्राम, नाहोर ने हारान काजे पयदा कर्यु; ने हारान लुत काजे पयदा कर्यु। ने हारानेन बास तेराया तीहीन कसदीया माणसे उर नावेन सहर मां मर गुयला, जां चु पयदा हवलु। अब्राम ने हारानेन ईयाव हयु, अब्रामेन घरवाळीन नाव सारे ने नाहोरेन घरवाळीन नाव मील्का हतली। ची हारानेन पुरे हतली ने मीलकान बहणीसेन नाव यीसका हतलो। सारे आंझी हतली तेरेमां तेरी अवल्यात नी हया।
तेरायु आपसा पुर्याक अब्राम, ने आपसा पुर्यान- पुर्यु लुत काजे, जु हारानेन पुर्यु हतलु, ने अब्रामेन घरवाळी सारे काजे भेळे ली ज्यु,ने चे कसदीया देसेन उर सहर सी नीकळीन कनान देस भीणी चाल पड़्या, बाकुन चे हारान नावेन सहर मां पुगीन चांत रहणे बाजी ज्या। जत्यार तेरायान दुय सोव पांच सालेन हयु; तत्यार हयु हारान देस मां मर ज्यु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.