Bhilali Bible
दानीयल 4
नबुकदनेस्सर दीसरो सपनो देख्यु
नबुकदनेस्सर राजा भीणी सी ने राज-राजेन माणसे, ने भाती-भातीन बुली बुलने वाळा जतरा बी ईनी धरती पर रह्वे, तीनु आखा काजे जो खबर जड़ी: “तुहुंंक बेसकी सांती जड़े!” मेसेक ज वारु लाग्यो की आखाम सी जुर भर्यु भगवान मेसेक जी मटला सहलाण्या ने छेलभात्या काम देखाड़ला छे, तीनुक उजेंता करो।
तेरा देखाड़ला सहलाण्या असा मटा छे,
ने तेरा चमत्कार मां काय मटी ताकत उजेंती छे, तेरो राज ते जलम छे,
ने तेरी बड़ाय पीड़ीडीट बणीन रवे।
मे नबुकदनेस्सर मारा बंगला मां मे वारु ने खुसी ती रह्तेलु। मे असो सपनो देख्यु, की तीना सपना सी मे बीही गुयु, ने खाटली पर सुवतु-सुवतु मारा मन मां जो वीच्यार आयो ने जी वात मे देख्यु, तीनी वात सी मे घाबराय गुयु। तत्यार मे हुकुम आप्यु की बेबीलोनेन आखा जानकार्या मारा सपनान फळ बताड़ने वाटे मारे अगळ लावु। तत्यार जानकार्या, बड़वाय-भुपाय वाळा, कसदी ने सक्ती बताड़ने वाळा माहें आया, ने मे तीनुक मारा सपनो बताड़्यु बाकुन चे तेरो मतलब नी बताड़ सक्या। आकरी मां दानीयल मार अगळ आयु, ने तेरो नाव मारा देवतान नावेन वजे सी बेलतसस्सर पाड़लो हतलो, ने तींद्रेम चुखला भगवानेन जीव आत्मा रवतेली, ने मे तीनाक मारो सपनो जो बताड़ देदु: ए बेलतसस्सर, तु ते आखा हात देखण्यान मटु छे, मे जाणो की तारेमां चुखला देवतान आत्मा रहे, ने तु काहनी बी सातायली वात सी नी घाबराये; तेरेमां ज सपनो मे देख्यु तीनाक मतलब समेत मेसे बताड़ीन समजाड़ दे।
जो सपनो मे खाटली पर देख्यु चो जो छे, मे देख्यु, की धरतीन ईचमां एक झाड़को उंगलो छे, ने चो झाड़को बेसको उचो छे। चो झाड़को मटो हयन बेसको काठो हय गुयो, ने तीना झाड़कान उचाय सरगे तक पुगी गुय, ने चो झाड़को धरतीन आखा खुणाम देखाय देय। तींद्रा पांटा वारका, ने तींद्रेम फळ लाग रह्ला, ने तीना झाड़कान फळ तीनु आखा वाटे खाणो हतलो। तीना झाड़का तळे खळदाण माय्न आखा जानवर्या काजे साहळु जड़तेलु, ने तेरा डाळ्या पर सरगेन आखा चिरला बठतेला, ने आखा चिरला ने जानवर्या काजे खाणे वाटे फळ जड़तेलो।
“मे खाटली पर सुवते-सुवते सपना मां असु देख्यु, की एक चुखलु सरगे दुत सरगे सी उतरी आयु।” चु जुरेत आयड़ीन कह्यु, हीना झाड़काक काट नाखु, तेरा डाळ्या काजे बी काट नाखु, तेरा पान्टा बी पाड़ी देवु, ने तेरा फळ काजे बी खळवी देवु, ने जानवर तीना झाड़का तळे ती ढासी जाय, ने चिरला तीना झाड़कान पर सी उडी जाय। तेबी तीना झाड़कान खुटड़ा काजे मुळ समेत जागा मां छुड़ देवु, ने तीनाक लुहड़ा ने पीतळेन बांधण सी बांधीन खयड़ान नीळ्ळा चारा मां रहणी दे। च सरगेन उस्टा सी भीग्या करे, ने भुयमान चारु खाणे करीन खयड़ान ढुरे भेळे रहे। तेरो मन बदली जाय ने चु माणसेन तसु नी रह्वे, बाकुन जानवरेन तसु बण जाय, ने तेरे पर सात साल लग हीनीत हालात मां रह्वे। जी हुकुम तीना सरगे वाळा काहवाळ्या भीणी सी ने जी वात तीनु चुखला माणसेन बुल सी नीकळी, की जे जीवतेला छे, जाणी लेय की, डाहला मुखी पुजारा भगवान माणसेन राज मां राज करसे, ने तीना राज काजे तीनुक चाहजे तीनुक आपी बी सके, ने चु तीना नानला सी नानला माणसे काजे बी तीना राज पर नक्खी करी सके।
मे नबुकदनेस्सर राजु जत सपनो देख्यु, हेरेसी ए बेलतसस्सर, तु हेरो मतलब बताड़, काहाकी मारा राज मां अळी कुय जानकार्या हेरो मतलब मेसेक नी समजाड़ सक्या, बाकुन तारेम ते चुखला भगवानेन जीव आत्मा रह्वे, जी वजे तु तीनाक समजाड़ देसी।
दानीयलेन साहरे सपनान मतलब बताड़नु
तत्यार दानीयल तेरो नाव बेलतसस्सर बी हतलो, हर घड़ी घाबरायतु रयु, ने सुच्तु-सुच्तु दुखी हय ज्यु। तत्यार राजु कवणे बाजी गुयु, “ए बेलतसस्सर, हीना सपना सी, नीते हीना मतलब सी दुखी मां हवे।”
बेलतसस्सर कह्यु, “ए मारा मालीक, जो सपनो तारा दुसमन पर, ने हेरो मतलब तारा लड़ाय करन्या पर हवे!” तीना झाड़का काजे तु देख्यु, जो मटो ने काठो हय गुयो, ने तीना झाड़कान उचाय सरगे तक पुगी गुई, ने जो धरतीन आखा खुणाम देखाय देय। तीना झाड़कान पांटा वारका हतला, ने फळ बेसका हतला, ने तींद्रेम आखान फळ हतलो, तेर तळे धरतीन आखा जानवर रवतेला, ने तींद्रा डाळ्या पर सरगेन चिरला बठ्या करतेला।
ए राजा, चु तुत छे। तु मटु ने ताकुतवाळु हय ज्यु, तारी बड़ाय अधे ने सरग लग जाती रय, ने तारु राज धरतीन खुणे लग फेलायली छे। ए राजा, तु एक चुखला राखवाळ्या काजे सरग सी उतेरता ने असो कवता देख्यु की झाड़का काजे काट देवु ने तीनाक नास कर देवु, बाकुन तेरा खुटड़ा काजे जड़ समेत रहणी देवु, ने हीनाक लुहड़ा ने पीतळेन बांधण सी बांधीन खयड़ान नीळ्ळा चारान ईचमां रहणी दे; चु सरगेन उस्टा सी भीग्या करे, ने तेरो खयड़ान ढुरे भेळोत रहणेन छे; ने जत्यार लग सात साल तेर पर नी वीते, तत्यार लग तेरी असीत हालत रवसे।
ए राजा तेरो मतलब जो चुखलु भगवान मान लेदु, की राजा पर हवे, चो जो छे, की तुसेक माणसेन ईचमां सी नीकाळ देसे ने खयड़ान ढुरे भेळे रवसी; तु बेलेन तसु चारु चरसी ने सरगेन उस्टा सी भीगी जासी; ने सांत साल लग तारे पर वीतसे, जत्यार लग की तु जाण नी लेय की माणसेन राज मां मुखी भगवानुत राज करे, ने जीनाक चाहे तीनाक दी देय। तीना झाड़कान खुटड़ाक मुळ समेत छुड़नेन हुकुम छे, तेर मतलब ज छे की तेरो राज तेर वाटे बणीन रहे; ने जत्यार लग तु जाण लेसी की कळीन मालीक सरगेत मां छे,1 तत्यार तु फीर सी राज करसी। हेरेन करीन ए राजा, तु मारी जी वात मान ले, कदी तु पाप काजे छुड़ीन धरमेन काम करने लागे, ती गलत काम छुड़ीन भुळा माणसे पर दया करसी ती, ते वारु छे की तु असु करने सी सांती सी रवसी।
जो आखो काय नबुकदनेस्सर राजा पर कम हय गुयो। बारे महना वीतणे पर जत्यार चु बेबीलोन राजान बंगलान छत पर हींडणे बाजी रह्लु, तत्यार चु कह्णे बाजी गुयु, “काय जो मटलो बेबीलोन नी हय, तीनाक मेत मारी ताकत ने सक्ती सी राजधानी हवणे, ने आपसा मटा नावेन बड़ाय वाटे वसाल्लु?”
जो बुल राजान मुंहडाम सी नीकळी बी सक्यो ने सरगे सी अवाज सामळाय देदी की, “ए राजा नबुकदनेस्सर तारा बारामां जी हुकुम नीकळी की राज तारा हातेम सी नीकळी गुयो?” ने तु माणसेन ईचमां सी नीकळी जासी, ने खळदाण मायन जानवर साते रवसी, ने बेल साय चारु खासी, ने सात साल लग तारे पर वीतसे, जत्यार तु जाणी नी लेय की चुखलु भगवान माणसेन राज मां हक करसे, ने तीनुक चाहजे तीनु आपी देसे।
तीनी टेमे जो बुल नबुकदनेस्सर राजान बारामां पुरो हयो, चो माणसेन ईचमां सी नीकळी गुयो, ने बेलेन तसु चारु खाणे बाजी गुयो, ने आपसो डील सरगेन उस्टा सी भीगतेलो, जां लग की तेरा कान्या सरगेम उडण्या घुवड़ान पाखड़ान तसा हय गुया। ने तेरा नखड़्या चिरलान पायेन तसा वदी गुया।
नबुकदनेस्सर भगवानेन बड़ाय करे
तीनु दाहड़ान वीतणेन बात, मे नबुकदनेस्सर मारा डुळा सरग भीणी भाळ्यु, ने जु जलम जीवतेलु छे तेरी बड़ाय ने आव भाव असु कहीन करने लाग्यु:
तेरु राज जलम छे,
ने तेरु राज पीड़ी सी पीड़ी लग बणीन रवसे।
धरती पर रह्णे वाळा आखा तेरे अगळ काय नी मानाये,
ने चु सरगेन सेना ने धरती पर रह्णे वाळान
ईचमां आपसी मरजीन अनसारे काम करतेला छे,
ने कुय तीनाक रुकीन तीनाक नी कय सकतेला,
की तु जो काय कय देदलु छे।
तीनी टेमे, मारी अक्कल जां की चां रय गुय, ने मारा राजेन सेक-सींगार मार वाटे मारो वीजाळो ने मुकुट मार पर अळी आय गुयो। ने मारा मंतरी ने डाहला माणसे मेसेक भेळा हवणे करीन मार धड़े आया, ने मे मारा राज मां टीकीन रयु, ने मारी अळी जादा बड़ाय हवणे बाजी गुय।
हय मे नबुकदनेस्सर सरगेन राजान बड़ाय करो; ने तेरात गुणे गावो ने बड़ाय करो, काहाकी तेरा आखा काम छाचला छे, ने तेरा सब वेहवार नीयावेन छे, ने जे माणसे मटाय करीन चाले, तीनुक चु नेचु कर देय।
Source notes (1)
- Footnote की सरग मां राज करे
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.