Bhilali Bible
दानीयल 3
सनान मुरती
नबुकदनेस्सर राजु सनान एक मुरती बणायु, ची सांठ हात उंची हतली, ने तेरी चवड़ाय छव हात हतली। चु तीनी मुरती काजे बेबीलोन राजेन दुरा नावेन खळदाण मां उबु कराड़्यु। अळतेन नबुकदनेस्सर राजु, हकदार्याक, राज करन्याक, मुख्याक, राय आपण्याक, पयस्या-टकान हीसाब राखण्याक, नीयाव करन्याक जीलान हकदार्या ने दीसरा राजेन आखा हकदार्याक बुलाय मांग्यु। ने हेरेसी की चे राजान साहरे उभी करली मुरतीन उजघाटन करनेन मीटींग मां हीस्सु लेसे। अळतेन राजा नबुकदनेस्सरेन साहरे उभी कराड़ली मुरतीन उजघाटन करनेन मीटींग मां हीस्सु लेणे करीन हकदार्या, राज करन्या, मुख्या, राय आपण्या, पयस्या टकान हीसाब राखण्या, नीयाव करन्या, जीलान हकदार्या ने दीसरा राजेन आखा हकदार्या भेळा हया। तत्यार चवकीदार जुर-जुर सी आयड़ीन कह्यु, ए राज-राजेन माणसे, ने भाती-भातीन बुली बुलने वाळा, तुहुंं काजे जो हुकुम सामळावे की, तीनी टेमे तुहुंं फेपार्या, पावळी, तुमड़ु, सारंगी, सीतार, सहनाइ आखी भातीन वाजा सामळु, तुहुंं तत्यारुत पायें पड़ीन नबुकदनेस्सर राजा उबी कराड़ली सनान मुरती काजे आंदु। ने जु काहनुक मांडा टेकीन नी आंधे तीना काजे तत्यारुत धपतेला आकठान भाटान ईचमां नाख देसे। हेरे वजे सी तीनी टेमे जसात आखा माणसे काजे, फेफर्या, पावळीन तुमड़ु, सारंगी, सीतार, सहनाइ आखा भातीन वाजान अवाज सामळाय पड़ी, तसात राज-राजेन आखा माणसे ने भाती-भाती बुली बुलनेवाळा ढंगा वळीन तीनी सनान मुर्ती काजे, जे नबुकदनेस्सर राजु उभी कराड़ने वाळु हतलु, आंध्या।
दानीयलेन दुस्तीदार पर हुकुम नी मान्नेन गुनु
तीनीत टेमे बेसका कसदी नावेन माणसे राजान्चां आया, ने मटाय सी यहुदी माणसेन बारामां चुगली कर्या। चे राजा नबुकदनेस्सर सी कह्या, “ए राजा, तु जलम जीवतेलु रवसी।” ए राजा, तु असु हुकुम आपलु की जे फेफर्या, पावळी, तुमड़ु, सारंगी, वीणवाजो, ने अळी आखी भातीन वाजो वाजतेलो सामळे, ती चे पांये पड़ीन मार साहरे बणाय मांगली मुरतीन पुजा पाट करजु; ने जु काहनुक मांडा टेकीन मुरती काजे नी आंधे, तीनाक चु धपला आकठान भाटा मां नाख देसे। देखु सदरक, मेसक, ने अबेदनगो नावेन थुड़ाक यहुदी माणसे छे, तीनुक तु बेबीलोनेन देस मां काम करने नक्खी करलु छे। चे माणसे, ए राजा तारी हुकुमेन काही बी फीकुर नी कर्या चे तारा देवतान पुजा पाट नी करे, ने जो तु सनान मुरती तु उभी करलु तीनीक नी आंदता।
तत्यार नबुकदनेस्सर रीसवाय गुयु, ने हुकुम आप्यु, की सदरक, मेसक ने अबेदनगो काजे लावु तत्यार चे माणसे राजा अगळ लाया ने अगा कर्या। नबुकदनेस्सर राजु तीनुक पुछ्यु, “ए सदरक, मेसक ने अबेदनगो, तुहुंं मारी देवधाणीन पुजा पाट नी करता ने मारी घड़ावीन उभी कराड़ली सोनान मुर्ती काजे नी आंदता, ती तुहुंं काय जाणी बुजीन असो करु?” कदी तुहुंं हंय तीयार हवु, की जत्यार फेपार्या, पावळी, तुमड़ु, सारंगी, सीतार, सहनाइ ने काहीं भातीन वाजान बुले सामळु, ने तीनीत घड़ी आडा पड़ीन मारी बणावली मुरती काजे आंदु, ती बची जासु; ने कदी तुहुंं आंदसु नी ती ईनीत घड़ी आकठान भाटा मां नाख देसे; अळतेन असो काहना देवता छे, जो तुहुंंक मार हात सी छुड़ाय सके?
सदरक, मेसक, ने अबेदनगो ने राजा सी कह्या, “ए नबुकदनेस्सर, हेरे बारामां तुसेक काय जपाप आपणेन हामुक काय जरुड़ी नी हय।” हामरु भगवान, तेरी हामु भक्ती करजे, चु हामुक तीना धपतेला आकठान भाटाम सी वाचाड़नेन ताकत राखे; बाकुन ए राजा, चु हामुक तारा हातेम सी बी वाचाड़ सके। बाकुन कदी नी, ते ए राजा तुसेक मालुम छे, की हामरा माणसे तारा देवतान पुजा-पाट नी कर्या, ने नी तारी उभी करली सनान मुरती काजे आंधसे।
दानीयलेन तीनु दुस्तीदार्या काजे मरनेन सजा सामळाय गुई
तत्यार नबुकदनेस्सर बेसकु रीसवाय गुयु, ने तेरा मुंहडान रंग सदरक, मेसक ने अबेदनगोन तसो हय गुयो। जु हुकुम आप्यु की आकठान भाटा काजे अळी सांत गुणा जादा धपाड़ देदा। अळी तींद्रा सीपायड़ान टुळा मां सी काहनाक एक ताकतवाळा माणुस काजे चु हुकुम आप्यु, की सदरक, मेसक ने अबेदनगो काजे बांधीन तीनुक धपतेला ईंगाळान आकठा मां नाख देवु। तत्यार चे माणसे आपसा मुज्या, झगल्या, टुपा ने अळी दीसरा पुथल्या भेळेत बांधीन, तीना आकठान भट्टा मां नाख देदा। चु धपतेलु आकठान भाटु ते राजान काठी हुकुम सी वदुस धपतो गुयो, तेरेसी तीनु माणसे काजे सदरक, मेसक ने अबेदनगो काजे हाकल्या, चीत धपतेला आकठान ईंगाळाम बळीन मर गुया। ने तीना धपतेला आकठान भाटान ईचमां तीनु अदमी काजे सदरक, मेसक ने अबेदनगो काजे बांदीन नाख देदा।
तत्यार नबुकदनेस्सर राजु चकराय गुयु ने घाबरायन उठ्यु, ने आपसा मदत करन्या काजे पुछणे बाजी गुयु, “काय हामु तीना आकठान ईचमां तीन अदमी बांदला नी नाख्या?”
चे राजा काजे जपाप आप्या, “हव राजा, छाचली वात छे।”
ने अळी चु कह्यु, “हंय मे देखणे बाजी रयु की, चार माणुस आकठान ईचमां अथान-अथा हींडी-फीरी रया, ने तींद्रे काय बी नुकसाण नी हवतो, ने चोवथा माणसेन मुंहडो भगवानेन पुर्यान तसो छे।”
दानीयलेन तीनु दुस्तीदार्यान ईज्जत करु
पछेन नबुकदनेस्सर तीना धपतेला आकठान बारना धड़े जाय्न कह्णे बाजी गुयु, “ए सदरक, मेसक ने अबेदनगो, ए डाहला मुखी भगवानेन पावर्या, नीकळीन जां आवु!” जो सामळीन सदरक मेसक ने अबेदनगो आकठान ईचमां सी नीकळीन आया। जत्यार अदीकारीन मुखी, सीपायड़ु, राज करन्यु ने राजान मदत करन्यु, जे भेळा हवला, तीनु माणसे भीणी भाळ्या, तत्यार तींद्रा डीले मां आकठान असर नी देखायु; ने तींद्रा मुणकान एक बी कान्यो झुलसायो नी, ने नी तींद्रा मुज्या बी नी बीगड़्या, ने नी तींद्रेम धपणेन गंद हतली।
नबुकदनेस्सर राजु कह्यु कवणे बाजी गुयु, “वारु छे सदरक, मेसक ने अबेदनगोन भगवान चु आपसा सरगेन काहवाळ्या काजे मकलीन आपसा पावर्या काजे हेरेसी वाचाड़्या, काहाकी चे राजान हुकुम नी मान्या ने तार पर भुरसु कर्या, ने सुचीन आपसो डील बी आप्यु की हामु आपणा भगवान काजे छुड़ीन, काहना बी देवतान पुजा-पाट नी करजे ने नी आंदजे।”
तेरेमां हंय मे जी हुकुम आपो की राज-राजेन माणसे ने भाती-भातीन बुली बुलने वाळा मां सी जे काहनाक सदरक मेसक ने अबेदनगोनेन भगवानेन बुराई करसे, चु टुकड़ा-टुकड़ा हय जासे, ने तेरो घर बीगड़ीन ढेर हय जासे; काहाकी असो काहनो बी ने काहनु देवता नी हय जो ईनी रीती सी बचाड़ सके।
तत्यार राजु बेबीलोनेन देस सदरक, मेसक ने अबेदनगोन पद अळी उचु कर्यु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.