भगवानेन छाचला बुल
उजेंता बुले 19
तेरे पछेन सरग सी मट्ली गड़दी काजे उची अवाज सी असो कवतो सामळ्यु, “भगवानेन बड़ाय हवे! छुटकारु, ने सेक-सींगार, ने ताकत हामरा भगवानेत ने छे। काहाकी तेरा नीयाव संय ने वारु छे, तेरेमां की हयु तीनी मट्ली रंडीन जी आपसा छीनाळा सी धरती काजे भुंडी कर देदली, नीयाव कर्यु, ने तीनी सी आपसा पावर्यान लुहीन पलटु लेदलु छे।” अळी दीसरी कावा चे कह्या, “बड़ाय! तेरे धपणेन कुळु जलम जातु रवसे।” ने वीस ने चारु डाहला मुख्या ने चारु जीव जनवार्या पड़ीन भगवानेन बड़ाय कर्या; जु राजगादी पर बठलु हतलु, ने कह्यु, “आमीन! हाल्लेलुया!”
गाडरान ईयावेन पंगत
ने राजगादी मां सी एक बुल सामळाय, “ए आपणा भगवान सी आखा बीहणेवाळा पावर्या, काय नानला, काय मटला; तुहुं आखा तेरी बड़ाय करु।” तत्यार मे मटला टुळान तसी ने बेसको पाणीन जसी अवाज, ने गाजणेन जसों मटलो अवाज सामळ्यु “बड़ाय करु! तेरेमां की मालीक आपणु भगवान, आखाम सी ताकत भर्यु राज करे। आवु, हामु धव हय्न खुस हवजे, ने तेरी बड़ाय करजे, काहाकी गाडरान ईयाव आय गुयलु छे, ने तेरी लाडी आपसा काजे तीयार कर लेदली छे। तीनीक चुखलो ने चमकण्यो सणेन पुथल्यो पेहरने करीन हक आप्यु।” काहाकी तीनु खास पुथल्यान मतलब चुखला माणसेन धरमेन काम छे।
तत्यार सरग वाळु काहवाळ्यु मारे सी कह्यु, “की वारु चे छे, जे गाडरान ईयावेन पंगत मां बुलावला छे।” अळी हयु मारे सी कह्यु, “जे बुले भगवानेन छाचला बुले छे।”
तत्यार मे तीनाक आंधणे करीन तेरे पाये पर पड़्यु। हयु मारे सी कह्यु, “असु मां करे, तारु ने तारा भायस्येन सगु पावर्यु छे, जे ईसुन गवाय देणे मां काठा छे। भगवान काजे आंध।”
काहाकी ईसुन गवाय भगवानेन अघी सी आवणे वाळी वात देखाड़नेन आत्मा छे।
धवळ्या घुल्ला पर बसीन आवण्यु राजु
तत्यार मे सरग काजे खुली रवलो देख्यु, ने देखो की एक धवळु घुल्लु छे; ने तीना पर एक सवारी छे, जु भुरसा वाळा, ने छाचलु कहवाये; ने चु धरमेन साते नीयाव ने लड़ाय करे। तेरा डुळा आकठान आंच छे, ने तेरे मुणका पर बेसका राज मुड़े छे। ने तेरो एक नाव तीना पर लिखलो छे, ज तीनाक छुड़ीन अळी कुय नी जाणे। चु लुही मां डुबाड़ला पुथल्या पेहरलु छे, ने तेरो नाव भगवानेन बुल छे। ने सरगेन सीपायड़ा धवळा घुल्ला पर बठी रवला ने चुखला ने धवळा चमकण्यो सणेन पुथल्यो पेहेरीन तेरे पछळ-पछळ आवणे बाजी र्या। जाती-जाती काजे मारने करीन तेरे मुंहडा सी एक पाजावली तलवार नीकळे, ने लुहड़ान डेंगु लीन तीनु पर राज करसे1 ने हयु आखाम सी ताकत सी भरलु भगवानेन रीस सी कुंड मां अंगुरेन रस रंदळसे। ने तेरा पुथल्या ने सातळ्या पर असो नाव लिखलो छे: “राजान राजा ने मालक्यान मालीक।”
ने मे एक सरग वाळा काहवाळ्या काजे दाहड़ा पर हुबु हय रवलु देख्यु, ने हयु मट्ली अवाज सी आयड़ीन उपर सरग मां सी उडणेवाळा आखा चिरला सी कह्यु, “आवु, भगवानेन मट्ली पंगत वाटे भेळा हय जावु, तेरेसी तुहुं राजान मास, ने सीपायड़ान मुख्यान मास, ने ताकतवाळान माणसेन मास, ने घुल्लान ने घुल्ला पर बठण्या माणसेन मास, ने काय छुटला, काय बांदायला, काय पावर्या, काय नानला, काय मटला, आखा माणसेन मास खाणे आवु।”
तत्यार मे तीना पेहला जनवार्या काजे ने धरतीन राजा काजे देख्यु। ने तींद्रे पुठ्ये तींद्रा सीपायड़ान मेळा बी हतला चे आखा, धवळ्ळा घुल्ला पर बठी रवलु, तीना भगवानेन पावर्या साते, ने तेरा सीपायड़ान मेळा साते लड़ाय करने भेळा हय रवला। ने हयु जनवार्या ने तेरे भेळु चु लुच्चु अघी सी आवणे वाळी वात बताड़न्यु धराय गुयु, जु तेरे अगळ असा सहलाणी देखाड़ला, तीनु सी हयु तीनुक भटकाड़्यु, जीनु पर तीना जनवार्यान छाप हतली, ने जे तेरे मुरतीन पुजा करतेला। जे दुयु जीवता जीवतात तीना आकठान कुंडा मां, जो गंधक सी जलम धपे, चां नाख्या। ने रवला माणसे तीना घुल्लान सवारीक तलवार सी, जी तेरे मुंहडा सी नीकळतेली, मार नाख्या; ने आखा चिरला तींद्रा मास सी आफरी गुया।
Source notes (1)
- Footnote लुहड़ान डेंगु लीन तींद्रे पर राज करसे मतलब चु दया करे बीगुर तींद्रे पर राज करसे
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.