भगवानेन छाचला बुल
उजेंता बुले 20
भुतड़ा काजे हजार साल वाटे उंडला कुंड मां नाखे
ने मे एक सरग वाळा काहवाळ्याक सरग सी उतेरतेलो देख्यु; तेरे हाते मां उंडला कुंडेन कुची, ने एक मट्ली साकळ हतली। ने हयु तीना अजगर, मतलब पुराणु घड़साक, जु भुतड़ु छे; धरीन हजार साल लग बांद देदा, ने तीनाक उंडला कुंड मां नाखीन बंद कर देदा ने तीना पर सील लागाड़ देदा, की हयु हजार साल पुरा हवता लग जाती-जातीन माणसेक अळी नी भटकाड़े। तेरे पछेन जरुड़ी छे की थुड़ीक वार वाटे अळी छुड़ाय जासे।
तत्यार मे राजगाद्या देख्यु, ने तीनु पर माणसे बठ गुया, ने तीनुक नीयाव करनेन हक देदु। ने तींद्री आत्मा काजे बी देख्यु, तींद्रा मुणका ईसुन गवाय देणे ने भगवानेन बुलेन परचार करने वजे सी काटाय्ला, ने जे नी हीना जनवार्यान, ने नी हेरी मुरतीन पुजा करला, ने नी हेरी छाप आपणा मुणका ने हात पर लेदला चे जीवता हय्न मसी साते हजार साल लग राज करता रवे। जत्यार लग चे हजार साल पुरा नी हवे तत्यार लग बाकी मरला नी जीव हवे। ज ते पेहलो मर्या-सर्याम सी जीवता हवणेन छे। वारु ने चुखलु हयु छे, जु ईना पेहला मर्या-सर्याम सी जीवता हवणे मां साजल्या छे, असला पर दीसरी मुतेन काय बी हक नी हय, बाकुन चे भगवान ने मसीन पुजारा बणसे, ने तेरे साते हजार साल लग राज करसे।
भुतड़ान नास
जत्यार हजार साल पुरा हय गुया ती भुतड़ु काजे जेल सी छुड़ी देसे। ने चु तीनु जाती काजे जे धरतीन चारु भीणी रवसे, मतलब गोग ने मागोन काजे तींद्री गिन्ती दरीयान रेतेन बराबर हवसे, भटकाड़ीन लड़ाय वाटे भेळा करने करीन नीकळसे। ने चे आखी धरती पर जासे ने चुखला माणसेन तम्बु ने वारलु परमवाळा सहर काजे घेरवी लेसे ने आकठो सरग सी उतरीन तीनुक उजाड़ देसे। तींद्रु भटकाड़ने वाळु भुतड़ु आकठो ने गंधकेन तीना कुंडा मां, तेरेमां चो जनवार्या ने लुच्चु अघी सी आवणे वाळी वात बताड़न्यु बी रवसे, चां नाख देसे; ने चे रात दाहड़ु जलम पीड़ा मां तड़पता रवसे।
धवळी मट्ली राजगादी ने आकरी नीयाव
तत्यार मे एक मट्ली धवळी राजगादी ने तीनाक जु तीना पर बठलु हतलु, देखु, तेरे अगळ सी धरती ने सरग ढासी गुई, ने तींद्रे वाटे जागु नी जड़्यु। ने मे नानला मटला आखा मरला काजे राजगादीन अगळ हुबा देख्यु, ने किताप खुळ्यु, ने तत्यार एक अळी किताप खुळ्यु, मतलब जीवनेन किताप, ने जसों तीनु किताप मां लिखलो हतलो, तींद्रा कामेन अनसारे मरलान नीयाव हयो। ने दरीया तीनु मरलाक जे तेरेमां हतला आपी देदी, ने मरण ने पाताळ बी, जे तेरेमां हतला; ने तेरेमां सी हरेकेन कामेन अनसारे तींद्रु नीयाव हयो। ने मरण ने पाताळ बी आकठान कुंडा मां नाख देदा। जी आकठान कुंडो ते दीसरी मरण छे। ने काहनाक ने नाव जीवनेन किताप मां लिखलो नी जड़्यो, तीनाक आकठान कुंडा मां नाख देदा।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.