भगवानेन छाचला बुल
फीलेमोन 1
पोलुस भीणी सी जु मसी ईसु मां जेल मां छे, ने भाय तीमुथीयुस भीणी सी,
हामरु लाटेक्लु साती मदत करने वाळु फीलेमोन, ने बहणीस अपफीया, ने हामरु साती सीपायड़ा अरखीप्पुस ने फीलेमोनेन घरेन भेळी हवणे वाळी मंडळी काजे:
आपणा भगवान बास ने मालीक ईसु मसी भीणी सी गीण-दया ने सुक-सांती आखा काजे जड़ती रहे।
फीलेमोनेन परम ने भुरसु
मे जलम भगवान काजे वारु छे करीन कहं, ने मारी दुवा मां तुसे हेर करो। काहाकी मे तारा तीना परम ने भुरसान वात सामळीन, जु मालीक ईसु पर ने आखा चुखला माणसेन साते छे। मे दुवा करो की, भुरसा मां तारु हीस्सु लेणेन आखी मदतेन समज वाटे असर हवे, जे मसी मां हामरे धड़े छे। ए भायस, मेसे तारा परम सी बेसकी खुसी ने सुक-सांती जड़ी, काहाकी तारे सी चुखला माणसेन मन खुसी सी भर गुयला छे।
पोलुस वाटे उनेसीमुसेन लीलघायणु
तेरेमां मसी मां मटीत हिम्मत छे, काहाकी जी वात वारु छे, ची हुकुम तुसे आपो। तेबी मे डाहलु पोलुस जु हय मसी ईसुन नाव सी जेल मां छे, ने ज अळी बी भलायन वात छे की परम सी लीलघाय करु। मे आपणु पुर्यु उनेसीमुस वाटे जु मारे सी मारी बांदण मां पयदा हवलु छे, तारे सी लीलघायो। हयु ते पेहले तारे काय कामकु नी हतलु, बाकुन हय तारे ने मारे दुयुन बेसकु कामकु छे।
तीनात काजे मतलब जु मारा काळजांन कटकु छे, मे तीना काजे तारे धड़े मकली देदलु छे। तीनाक मे मारेत धड़े मेकणे हींडी रवलु, काहाकी तार भीणी सी ईना बांदण मां खुस-खबरेन वजे सी छे, ने मारी सेवा कर सके। बाकुन मे तारी मरजी पाखुर काय बी नी करने हींडतेलु की तारी जी दया जबरान मां नी बाकुन खुसी सी रहे।
काहाकी कुण जाण्यो की हयु तारे सी ईतराक दाहड़ा लगुन असु करीन छेटे हय गुयलु, जत्यार चु तारेन चां पछु आवे, ती जलम तारे पुठ्ये रवे। पावर्यान तसु नी हय, बाकुन पावर्या सी बी अदुस, मतलब भाय बराबर रहे, जु मारु खास लाटेक्लु साते ते छे, बाकुन हय डीलेम ने मालीक मां बी, तारु बी खास साती बणे।
कदी तु मेसेक हीना काम मां तारु साजेल्यु समजे, ती मारु आव-भाव करे, तसुत हीना उनेसीमुसेन आव-भाव करीन हीना आवरी ले। ने कदी चु तारा वीरुद काय बी गुनु करलु हय, नीते चु तारु करजा वाळु हय ती चे पयस्या मां छुट जायस। मे पोलुस मारा हात सी लिखो, की मेत भर दीस, ने ईनाक कहणेन काय बी जरुड़ी नी हय, की मारु करजु जु तार पर छे चु तुत छे। ए भाय, जी खुसी मेसेक मालीक तार भीणी सी जड़े, मसी मां उनेसीमुसेन काजे माफी आपीन मारा जीवेक खुस कर देदु।
मेसेक पाक्कु भुरसु छे की मे ज काय तुसेक कहलु, तेरे सी जादा तु हेरु आव-भाव करसी। ने ज बी, की मारे वाटे रुकणेन जागु तीयार राख, मेसे आस छे, की तुंद्री दुवा सी मेसे तुंद्रेन्चां आवाय जासे।
आकरी वातेन बुले
ईपर्फास जु मसी ईसु मां मार भेळु जेल मां छे, तीना काजे बी वारु छे की करीन पुछी रयु, आवजी करीन कय रयु। ने मरकुस ने अरीस्तारकुस ने देमास ने लुकु जे मारा काम करने वाळा साती छे, हींद्रे भीणी सी बी तुसेक वारु छे की करीन कहें।
तुहुं आखा पर मालीक ईसु मसीन गीण-दया तुंद्री आत्मा साते बणीन रवे। आमीन।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.