तीतुस 3

दीसरान भलाय कनेन काळजी करता रहु

1ईसु पर भुरसु करन्‌या काजे तु असा हेर कराड़, की राज करन्‌या नेतान ने आखी भातीन मुख्‌या माणसेन हक मां रहु, ने तींद्‌रु हुकुम मानु, ने आखा वारलु काम करने वाटे तीयार रहु। 2कुयन बी नाव-बद्‌दी घुण करजु, ने लड़ाय मां करु; बाकुन आखा हेळी-मेळीन रहु, ने आखा माणसे साते नीचळा बणीन वेहवार करु। 3काहाकी आपणु बी पेहले, डेड़-अकल्‌या हतला।1 ने हुकुम नी मानने वाळा हतला, ने गलत वात मां पड़ला हतला। छीनाळा मां ने पापेन गुलाम हतला ने असली आखी कुहरली वात करन्‌या हतला जां लग की माणसे आपणे सी कुहराय करतेला ने आपणु बी एक दीसरा सी रीस करतेला ने हामु बुरफाय ने कुहराय मां जीवतेला। 4बाकुन जत्‌यार हामरु छुटकारु आपणे वाळु भगवाननेन भलाय, ने माणसे पर तेरु परम उजेंतु हयु, ने आपणु तेरे पर भुरसु कर्‌या। 5ती चु आपणु छुटकारु कर्‌यु; ने ज धरमेन कामेन वजे सी नी, जो हामु आपसात कर्‌या, बाकुन आपणी दयान अनसारे नवला जनमेन उंघळने सी, ने चुखली-आत्‌मा सी हामुक नवला बणावणेन वजे सी हयो। 6तीनाक हयु आपणु छुटकारु देणेवाळु ईसु मसी सी आपणे पर अदु सी अदु चुखली-आत्‌मा रेचव्‌यु, 7भगवान तेरेमां आपणुक तेरी दया सी हामु धरमी ठहरीन अमर जीवनेन आसेन अनसारे वारीस बण्‌या। 8जी वात संय छे ने मे चाहो की तु हीनी वातेन बारामां पुरा मन सी कहलु काहाकी जे भगवान पर भुरसु कर्‌या, चे भला काम मां लागला रवे,

असला भला काम माणसे वाटे बेसको वारु छे। ने ईसुन भुरसाम लावणे मां नफावाळा छे। 9बाकुन डेड़-अकल्‌या बणीन वात मां वात देण्‌या, ने बाप दादा, ने मन मां रीस राखीन रुकावट, ने तीना झगड़ा सी, जो नीयमेन बारामां छे, तेरेसी बचीन रहु; काहाकी चे काय बी फळ लावण्‌या नी हय2 ने फालतु छे। 10काहनाक ढंगड़ा करने वाळा काजे एक दुय कावा समजाड़ीन तेरेसी अलग हय जाणु। 11काहाकी तुहुं जाणु की असा करीन जे माणसे भटकी गुयला छे ने आपणे आप काजे गुनाळु ठहरावीन पाप करता रवे।

हेर राखणे वाटे चिट्‌ठीन खास वात

12जत्‌यार मे तारे धड़े अरतीमास नेते तुखीकुस काजे मकलो, ती मारे धड़े नीकुपुलीस आवणेन कुसीत करजी, काहाकी मे चांहान सींगेन दाहड़ा काटणेन पाक्‌कु वीच्‌यार करलु छे। 13जेनास नावेन वकील ने अपुल्‌लोस तारेन चां आवणे वाळा छे, चां सी बी अगास जाण्‌या छे, तीनु काजे ज बी चाहजे तेरी पुर्‌ती करीन तु तीनुक छाटुस मकली देजी। 14तु अतरुत नी आपणा मंडळ्‌यान आखा माणसे जी वात सीकणु चाहजे माणसे ते चारे मेर बेसका कसरायला छे, हेरे सी मंडळीन माणसे काजे तु असु सीकाड़जु की, तुहुं बेसका कसरायला माणसे वाटे भला काम करने मां लागला रवु। असा करसु ती तुंद्‌री जीवाय बेसकी काम की रवसे।

15जतरा बी साती मारे पुठ्‌ये छे, चे आखा तुसेक वारलु छे की? पुछ रया ने आवजी कय रया। मेसेक मालुम छे की, करेत वाळा बेसका ईसुन चेला हामु काजे भुरसा मां साजेल्‌या समजीन परम करे। तीनुक बी मार वाटीन वारलु छे की? करीन पुछ लेजी ने आवजु कय देजी।

तुहुं आखा काजे भगवान गीण-दया जड़ती रहणु चाहजे।