भगवानेन छाचला बुल
युहन्ना 15
ईसु कह्वे मे खरलु अंगुरेन वेलु छे
ईसु कह्यु, “अंगुरेन खरलु वेलु मेत छे। ने ईना अंगुरेन वेलान राखवाळ्यु किरसाण1 मारु भगवान बास छे।” मारा डाळ्या मायन जे डाळ्या नी फळे, तीनुक मारु भगवान बास काट नाखे। ने जे डाळ्या फळे, चे डाळ्या अळी बी अदु फळनु चाहजे करीन तीनुक छाटे। तुहुं काजे जी वात सीकाड़लु छे, तीनी वात सी तुहुं चुखा हय गुयला। अळी अळीन फळ लावणे करीन मे तुहुंक चुखा करलु छे, जीनु डाळ्या काजे अंगुरेन वेला मां सी काट नाख्या, चे डाळ्या मारेम जुड़ायला नी हय, ने चे आपसात नी फळे। तीने रीते मारेम जुड़ायला नी रहे ती फळ बी नी लावे, ने तुहुं मारेम जुड़ायला रहु ने मे तुंद्रेम जुड़ायलु रवीस।
“चु अंगुरेन वेलु छे, ने तुहुं मारा डाळ्या छे, मार सी छेटे रय्न तुहुं काय बी नी कराये। ने जु मारेम जुड़ायलु रहे ने मे तेरेमां जुड़ायलु रवसे, चु बेसकु फळसे।” जे मारेम जुड़ायला नी रहे चे तीनु डाळ्यान तसा छे, तीनुक किरसाण काटीन नाख देय ने चे सुक जाय ने किरसाण ईछीन आकठा मां नाख देय ने चे धप जाय। कदी तुहुं मारेम जुड़ायला रवसु ने मारी सीकाड़ली वात काजे मान्ता रवसु, ती च बी चाहजे च दुवा करीन मांगजु ने मे तुहुंक आपी दीस। असा करीन तुहुं बेसका फळ लावसु, ती मारा भगवान बासेन बड़ाय हवसे ने तत्यार तुहुं मारा पक्का चेला बण जासु। जसु भगवान बास मारे सी परम2 राखलु छे तसुत मे बी तुंद्रे सी परम राखलु छे। तुहुं मारा ईना परम मां बणीन रवजु। मे मारा भगवान बासेन हुकुम पाळतु जाय्न तेरा परम मां बणीन रवु, तसात तुहुं बी मारा हुकुम पाळसु ती मालम पड़से की तुहुं मारा परम मां बन्ला छे।
मे तुहुं काजे ज असु करीन कह्यु की, तुहुं काजे मारु हुकुम पाळनेन खुसी जड़ती रवे ने ची खुसी पुरी की पुरी जड़ जाय। मारु हुकुम जु छे की जसु मे तुंद्रे सी परम करलु, तसा तुहुं बी एक दीसरा सी परम करता रवजु। आपसा दुस्तीदार सी परम करीन तींद्रे वाटे मरनु आखा सी मटु परम छे। असलु परम सी मटु काहनु बी परम नी हय। कदी तुहुं मारा हुकुम पाळसु ती तुहुं मारा खरला दुस्तीदार3 कहंवायसु। पावर्या काजे मालम नी पड़े की तेरा मालीकेन मरजी काय छे, ने चु काय करने वाळु छे। बाकुन मे मारा बास सी सामळ्ळु च आखो तुहुंक कय देदलु छे, ने हय सी मे तुहुंक पावर्या नी कहं बाकुन दुस्तीदार कहीन। “तुहुं मेसेक नी नेवाड़्या, बाकुन मे तुहुंक नेवाड़ीन तुहुंक मारे कामे लागाड़लु छे, की तुहुं मारो नाव लीन भगवान बास सी ज काय दुवा करीन मांगसु च भगवान तुहुंक आप देसे मे तुहुं काजे जे हुकुम असु करीन आप र्यु की, तुहुं एक दीसरा पर परम राखता रहु।”
ईनी कळीन माणसे ईसुन चेला काजे वारु नी कह्वे
“कदी ईनी कळीन माणसे तुंद्रे पर भुंडा सुचे, ती तुहुं ज हेर राख्जु की तुंद्रे सी पेहेल चे मारे पर भुंडा सुचे।” कदी तु ईनी कळीन माणसे रहता तत्यार चे तुहुंक आपणा समजीन परम राखता बाकुन मे तुहुं काजे ईनी कळीन माणसेम सी नेवाड़ लेदलु छे, करीन चे तुंद्रे बारामां भुंडा सुचसे। मे तुहुंक जी वात कह्यु तीनीक हेर राख्जु की, पावर्यु आपसा मालीक सी मटु नी हय। मे तुंद्रु मालीक छे, तेबी माणसे मेसेक वेला पाड़्या असला माणसे तुहुंक बी वेला पाड़से ईनी कळीम वाळा माणसे मारी सीकाड़ली वात काजे नी मान्या ती तुंद्री सीकाड़ली वात बी नी माने। असला माणसे, मेसेक मकेलन्या भगवान काजे नी उळख्या, ने मारी वीरुद कर्या, तुहुं ते मारो नाव ली र्या ने चे तुहुं काजे भुंडात करीन तुहुंक वेला पाड़से। कदी मे नी आवतु ने हीनुक पापेन बारामां भगवानेन छाचली वात नी सीकाड़तु, ती हीनुक पाप नी लागतु बाकुन हय ते हींद्रे धड़े आपसा पापेन बारामां ढंगड़ा करनेन मुखु नी हय। जु मेसेक भुंडु समजे, चु मारा भगवान बास काजे भुंडु समजे। कदी मे तींद्रे अगळ चे मटा कामे नी करतु, चे कामे कुय बी दीसरु कदी नी कर्यु, ती तीनुक पाप नी लाग्तु बाकुन हय ते चे असा काम देखीन बी मेसेक नी मान्या ने सांबा मार भीणी ने मारा भगवान बास काजे भुंडा करला छे। ज असो काहा हयो काहाकी खरला सास्तुर मां लिखलो हतलो च पुरो हवे चां असो लिखलो छे, की चे माणसे फालतु मां मारा वेरी बण गुयला छे।
मे तुंद्रेन्चां सात देण्या काजे मतलब छाचली जीव-आत्मा काजे भगवान बासेन चां सी मकलीस, जत्यार चु छाचली जीव-आत्मा भगवान बासेम सी आवसे ती चु मारे बारामां गवा देसे। ने तेरे पुठ्ये तुहुं बी मारी गवाय देसु काहाकी तुहुं सुरु सीत मारे पुठ्ये रवला छे।
Source notes (3)
- Footnote किसान
- Footnote प्रेम
- Footnote मित्र
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.